ខេម ហាក់អន់ចិត្ត ខណ:មានបុគ្គលខ្លះចាំចាប់កំហុស

ស្របពេលដែលការប្រកាសត្រៀមរៀបចំកម្មវិធី នៃការប្រកួតបាល់ទាត់សប្បុរសធម៌នាចុងខែតុលា ឆាប់ៗខាងនេះ ស្រាប់តែតារាចម្រៀងខេម បានលើកឡើងនូវខ្លឹមសារថា “ពិភពលោកពោរពេញដោយការប្រកួតប្រជែង កីឡា សិល្បៈ ការងារ សិក្សា ។ល។” លោកថា អ្នកធ្វើមិនដូចអ្នកអង្គុយមើល ពេលអ្នកធ្វើវារមែងតែងមានកំហុសខ្លះ តែវាប្រសើរជាងមិនធ្វើ ដូចពេលដែលលោកព្យាយាមរកគ្រាប់បាល់ជូនក្រុម។

តារាចម្រៀងលោក ខេម បាននិយាយឲ្យដឹងទៀតថា “ខ្ញុំគ្មានពេលមើលកញ្ចក់ឬត្រៀមទឹកមុខថតឲ្យស្អាតដូចអ្នកមិនលេងនោះទេ ដូច្នេះព្យាយាមធ្វើប្រសើរជាងអង្គុយមើលហើយចាំចាប់កំហុសអ្នកដទៃ Cambodia Football Super Stars”។

សូមជម្រាបដែរថាថ្មីៗនេះ ខេម ប្រកាសថា ក្រុមបាល់ទាត់​តារា​កម្ពុជា បានសហការជាមួយគុនខ្មែរអលស្តាររៀបចំបង្កើតកម្មវិធីបាល់ទាត់មិត្តភាពដោយជ្រើសរើសយកប្រធានបទ” យើងរួមគ្នាលើកស្ទួយជួយគុនខ្មែរ” ក្នុងគោលបំណងដើម្បីរកមូលនិធិជួយដល់តាមបណ្តាក្លឹបដែលមានការខ្វះខាតសម្ភារ:ឬធនធានផ្សេងៗជាដើម។

សម្រាប់ការប្រកួតបាល់ទាត់រវាងក្រុមបាល់ទាត់​តារា​កម្ពុជា និងគុនខ្មែរអលស្តារធ្វើឡើង នៅថ្ងៃទី២៩ ខែតុលាឆ្នាំ២០២៤ ទីតាំងស្តាតចាស់ចាប់ពីម៉ោង២ រសៀល តទៅនឹងមានផ្សាយបន្តផ្ទាល់នៅ BTV ។ មហាជននិងអ្នកគាំទ្រវិស័យកីឡាទាល់ទាត់នឹងគុនខ្មែរអាចចូលរួមទស្សនាដោយសេរីហើយអាចចូលរួមបរិច្ចាគបវិកាផ្ទាល់ខ្លួនទៅតាមលទ្ធភាពរៀងៗខ្លួន៕ អត្ថបទ៖ ចាន់រ៉ា