ខេមរៈ សិរីមន្ត រំភើបខ្លាំងបានគ្រងឈុត “ស្តេចស្វា ស” លើកដំបូង

កំពូលតារាចម្រៀងលោក ខេមរ: សិរីមន្ត បានបង្ហាញក្តីរំភើបចិត្តខ្លាំងបន្ទាប់ពីមានឱកាសបានគ្រងឈុត “ស្តេចស្វា ស ” ជាលើកដំបូង នៅក្នុងពេលថត MV ចម្រៀងរបស់ខ្លួន ត្រៀមអបអរឱកាសពិធីបុណ្យចូលឆ្នាំថ្មីប្រពៃណីជាតិខ្មែរឆាប់ៗខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការកត់សម្គាល់ តារាចម្រៀង ខេមរៈ សិរីមន្ដ ថ្មីៗនេះ បានចេញបទកន្ទ្រឹមជាបន្តបន្ទាប់ដូចជាបទ ” សៅអើយ នាងសៅ” បទ “ព្រមទៅយកបងធ្វើប្តី” ដែលមានបញ្ចូលល្ខោនខោល និងបញ្ចូលល្ខោនស្បែកផងដែរ។ ម្យ៉ាងទៀត ក៏កំពុងត្រៀមចេញបទ “មករាំកន្ទ្រឹមឆ្នាំថ្មី” សម្រាប់ពិធីបុណ្យចូលឆ្នាំថ្មីប្រណៃណីជាតិខ្មែរ ដែលនេះជាការបត់មកលេង ស្ទីលចាស់ដូចកាលនៅផលិតកម្មមុនឡើងវិញ។

បើចាប់អារម្មណ៍មកបទ “ព្រមទៅយកបងធ្វើប្តី” របស់លោក ខេមរ: សិរីមន្ត ទើបនឹងចេញថ្មីៗមុននេះ លោកបានបង្ហាញមោទនភាពនិងភាពសប្បាយចិត្តខ្លាំងដោយលើកឡើងថា ខ្ញុំបាទរំភើបខ្លាំងណាស់បានមានកិត្តិយសគ្រងឈុតស្ដេចស្វា ស លើកដំបូងក្នុង MV ថ្មី សម្រាប់ចូលឆ្នាំខ្មែរឆ្នាំថ្មីនេះ។

លោក ខេមរ: សិរីមន្ត បន្ថែមថា ឆ្នាំនេះកក្រើកទៀតហើយ សុំលេងឈុតធំហើយឆ្នាំនេះ បទ “ព្រមទៅយកបងធ្វើប្តី” មានបញ្ចូលល្ខោនខោលផង មានបញ្ចូលល្ខោនស្បែកផង និងឈុតសម្លៀកបំពាក់ជនជាតិដើមខ្មែរលើផង។

លោក ខេមរៈ សិរីមន្ដ ត្រូវបានអ្នកជំនាញសិល្បៈលើកឡើងថា លោកមិនងាយធ្លាក់ចុះទេព្រោះមានខ្នងក្រាស់នោះ គឺបងប្រុសរបស់ខ្លួនលោក ខេមរ: ភារុណ ដែលជាអ្នកសរសេរបទចម្រៀងឱ្យច្រៀងតាំងពីឆ្នាំ២០០៤ រហូតដល់បច្ចុប្បន្ន៕ អត្ថបទ៖ ចាន់រ៉ា