ជីវិតកម្សាន្ដ

តួកុនសិង្ហបុរី នាង Eleanor ប្រមាថមើលងាយជនជាតិចិនថា ជា«មនុស្សល្ងង់»

បានផុស

១២ ខែ មុន

នៅ

ថ្ងៃចន្ទ ១២ ឧសភា ២០២៥

ដោយ

តារាសម្ដែងស្រីជនជាតិសិង្ហបុរី អ្នកនាង Eleanor Lee ដែលជាកូនស្រីរបស់ពិធីករទូរទស្សន៍ដ៏មានប្រជាប្រិយភាព Quan Yifeng ត្រូវមហាជនព្រួតរិះគន់យ៉ាងខ្លាំង បន្ទាប់ពីវីដេអូឃ្លីបមួយ បានលេចចេញដោយចោទប្រកាន់ថា នាងបានប្រមាថមើលងាយជនជាតិចិនថា សុទ្ធតែមនុស្សល្ងង់ខ្លៅ។

យោងតាមសារព័ត៌មាន South China Morning Post បានចុះផ្សាយថា ការថតរយៈពេល ៣១វិនាទី ដែលត្រូវបានគេរាយការណ៍ ថា បែកធ្លាយដោយមនុស្សម្នាក់ជាអតីតជំនួយការរបស់នាង ត្រូវបានបង្ហោះនៅលើវេទិកាប្រព័ន្ធផ្សព្វផ្សាយសង្គមរបស់ចិន RedNote ហើយចាប់តាំងពីពេលនោះមក បានរីករាលដាលនិងទាក់ទាញការខឹងសម្បារយ៉ាងខ្លាំង។

ក្នុងឃ្លីបវីដេអូថតសំឡេងនោះ ស្ត្រីម្នាក់អាចត្រូវបានគេឮនិយាយថា នាងធ្វើនេះមិនមែនដើម្បីកេរ្តិ៍ឈ្មោះទេ ប៉ុន្តែដើម្បីប្រាក់ ហើយថាមនុស្សភាគច្រើននៅប្រទេសចិនគឺជាមនុស្សល្ងង់។

សំឡេងនេះបានទាក់ទាញការថ្កោលទោសយ៉ាងទូលំទូលាយពីអ្នកលេងអ៊ីនធឺណិតចិន ដោយមនុស្សជាច្រើនបានចោទប្រកាន់លើតួសិង្ហបុរីវ័យក្មេងថា បានប្រមាថដល់ប្រទេសចិន និងប្រជាជនរបស់ខ្លួន។ អ្នកប្រើប្រាប់អ់ីនធើណេតមួយចំនួន បានអំពាវនាវឲ្យនាងបោះបង់កេរ្តិ៍ឈ្មោះជាតារាសម្ដែង ព្រោះនាងបានប្រើពាក្យប្រមាថដល់ជនជាតិចិនជាច្រើន។

ទោះជាយ៉ាងណាក៏ដោយ តារាស្រីរូបនេះស្រាប់តែចូលទៅបណ្ដាញសង្គមទាំង Instagram, Weibo និង Facebook កាលពីថ្ងៃសៅរ៍ទី១០ ខែឧសភា ថា «ខ្ញុំសោកស្ដាយដែលបានបង្កឲ្យមានភាពចម្រូងចម្រាសជាខ្លាំង ខ្ញុំមានការតក់ស្លុតជាខ្លាំង នៅពេលដែលខ្ញុំបានឮការថតសំឡេង។ នេះមិនមែនជាអ្វីដែលខ្ញុំនិយាយនោះទេ»។

តារាជំនាន់ទី ២ ដែលមានម្តាយជាពិធីករទូរទស្សន៍សិង្ហបុរីដើមកំណើតតៃវ៉ាន់ Quan Yifeng ហើយឪពុកជាតារាសម្តែង Peter Yu បាននិយាយថា «ពេលនេះខ្ញុំមានអាយុ ២៦ ឆ្នាំ ហើយបានចំណាយពេលជិតពាក់កណ្តាលជីវិតរបស់ខ្ញុំនៅក្នុងប្រទេសចិន។ នៅទីនេះ ខ្ញុំបានទទួលឱកាសជាច្រើន ហើយអាចបញ្ចេញពន្លឺក្នុងអាជីពដែលខ្ញុំស្រលាញ់។ ខ្ញុំពិតជាមានសេចក្តីស្រឡាញ់ និងដឹងគុណចំពោះទឹកដីនេះ»។

តារាសម្តែងវ័យ ២៥ ឆ្នាំរូបនេះបានបង្ហាញមុខនៅក្នុងប្រទេសចិនចាប់តាំងពីឆ្នាំ ២០១៦ នាងត្រូវគេរាយការណ៍ថា ត្រូវគេដកចេញពីតួសម្ដែងក្នុងរឿងភាគចិន «The Journey of Legend» នាពេលខាងមុខនេះ ដោយសារតែមានប្រតិកម្មផ្ទុយគ្នា។ ទោះជាយ៉ាងណាក៏ដោយ សារព័ត៌មានចិន Zaobao បានរាយការណ៍ថា ឈ្មោះរបស់តារាស្រី នៅតែលេចឡើងក្នុងបញ្ជីតួសម្តែង ដោយបង្ហាញថានាងមិនទាន់ត្រូវបានដកចេញពីកម្មវិធីជាផ្លូវការនៅឡើយទេ។

ភាពយន្តភាគចិន «The Journey of Legend» ផ្អែកលើប្រលោមលោករបស់អ្នកនិពន្ធជនជាតិម៉ាឡេស៊ី Woon Swee Oan សម្តែងដោយតួសម្តែងចិន Cheng Yi និង Gulnazar Bextiyar ។ ចំណែក Eleanor Lee ដើរតួជា Tang Fang ដែលជាតួអង្គសំខាន់មួយនៅក្នុងរឿងភាគ ខណៈដែលរឿងនេះមិនបានកំណត់កាលបរិច្ឆេទចាក់បញ្ចាំងនោះ ការលើកឡើងរបស់នាង ត្រូវគេរំពឹងថា បានបង្កឲ្យមានការពន្យារពេលការចាក់ផ្សាយរបស់កម្មវិធី ដែលដំបូងត្រូវបានគ្រោងធ្វើនៅដើមខែឧសភា៕