មហាជននិងអ្នកសិល្បៈ បង្ហាញការសោកស្តាយចំពោះមរណភាព លោក វ័រ សារុន ម្ចាស់បទ “នារី​មាកស៉ី”

ពិតជារឿងដ៏គួរឱ្យសោកស្តាយជាទីបំផុត ដែលតារាចម្រៀងជើងចាស់ល្បីឈ្មោះម្ចាស់បទ “នារី​មាកស៉ី” និង “បទស្រស់អ្វីស្រស់ម្លេះ” បានទទួលមរណភាពហើយក្នុងជន្មាយុ ៧៧ឆ្នាំ។ នេះបើយោងតាមការជូនដំណឹងរបស់ក្រុមព្រះសុរិយា។ 

បើតាមការឱ្យដឹងនៅព្រឹកថ្ងៃទី ០២ ខែមិថុនានេះ លោក វ័រ សារុន បានទទួលមរណភាពដោយជរាពាធ។ លោក វ័រ សារុន គឺជាស្រុកបាត់ដំបងដ៏ល្បីល្បាញដែលសំបូរកវីនិពន្ធអ្នកចម្រៀងប្រុសស្រីជាច្រើន ដែលមានទេពកោសល្យខ្ពស់ក្នុងវិស័យសិល្បៈសម័យទំនើប​។   

ចំណែកឯម្ចាស់គណនីហ្វេសប៊ុកឈ្មោះ Heng Dara បានបញ្ជាក់ដែរថា លោក​ វ័រ​ សារុន​ ក៏ជាកវីនិពន្ធបទចម្រៀងបដិវត្តសម័យសាធារណរដ្ឋប្រជាមានិតកម្ពុជាជាមួយលោក​ ស៉ឹន​ ខាំចាន់តារ៉ុង, លោក​ យិន​ ឌីកាន​ និង​ ទូច​ ឆត្ថា ផងដែរ​។ សូមដួងវិញ្ញាណក្ខន្ធលោកបានសុខស្ងប់ក្នុងសុគតិភពកុំបីឃ្លៀងឃ្លាតឡើយ​ ។

ជាមួយដំណឹងនៃមរណភាពតារាចម្រៀងនិងកវីនិពន្ធរូបនេះ សិល្បករសិល្បការិនីព្រមទាំងមហាជន បានសម្តែងការចូលរួមសោកស្តាយនិងរំលែកទុក្ខដ៏ក្រៀមក្រំនេះជាមួយក្រុមគ្រួសារសព និងបានចាត់ទុកជាការកាត់បង់ធនធានវីរសិល្បករដ៏ឆ្នើមហើយមានសមត្ថភាពរបស់ខ្មែរ ១រូបទៀត៕ អត្ថបទ៖ ចាន់រ៉ា