ទស្សនិកជនខកចិត្តខ្លាំង ក្រោយលោកត្រាំ ថា​ពិចារណាលើកលែងទោសតារារ៉េប​ Diddy

កាលពីថ្ងៃទី ៣០ ខែឧសភា ក្នុងអំឡុងពេលសន្និសីទកាសែតនៅការិយាល័យ Oval ជាមួយលោក Elon Musk ប្រធានាធិបតីអាមេរិក ដូណាល់ ត្រាំ ត្រូវបានចោទសួរដោយមិនបានរំពឹងទុកអំពីមិត្តភាពរបស់គាត់ជាមួយ តារារ៉េប លោក Diddy ដែល​មាន​រឿង​អាស្រូវ​ពីបទ​ឆបោក ក្លែង​បន្លំ ជាដើម និងលទ្ធភាពនៃការលើកលែងទោសចំពោះតារារ៉េបរូបនេះ។

ជាការឆ្លើយតបនឹងប្រព័ន្ធផ្សព្វផ្សាយ លោក ដូណាល់ ត្រាំ បាននិយាយថា លោកមិនទាន់ទទួលបានសំណើសុំលើកលែងទោសចំពោះតារាចម្រៀង Sean Diddy Combs  នៅឡើយទេ ប៉ុន្តែនឹងពិចារណាពីលទ្ធភាពនេះ។

ប្រធានាធិបតីវ័យ៨០ឆ្នាំ បានឆ្លើយតបថា «ខ្ញុំមិនបានឃើញគាត់ ហើយមិនបាននិយាយជាមួយគាត់ច្រើនឆ្នាំមកហើយ គាត់ធ្លាប់ស្រលាញ់ខ្ញុំណាស់ ប៉ុន្តែ​ខ្ញុំគិតថា តាំងពីខ្ញុំចូលប្រឡូកក្នុងឆាកនយោបាយ ទំនាក់ទំនងរបស់យើងហាក់សោះ​អង្គើយ​លែង​ដូចពីមុនហើយ។ ពេលនេះខ្ញុំមិនដឹងច្បាស់ទេ ព្រោះគាត់មិនបានប្រាប់ខ្ញុំដោយផ្ទាល់ ប៉ុន្តែខ្ញុំបានអានព័ត៌មាន​ជាច្រើន​ដែល​បាន​ចុះផ្សាយអំពីរូបគាត់»។

ទោះបីជាទំនាក់ទំនងផ្ទាល់ខ្លួនរបស់ពួកគេលែងមានភាពស្និទ្ធស្នាលដូចពីមុនក៏ដោយ ប៉ុន្តែលោក ដូណាល់ ត្រាំ បានបញ្ជាក់​ថា លោកនឹងនៅតែពិចារណាដោយប្រុងប្រយ័ត្ននូវកាលៈទេសៈ ប្រសិនបើគាត់ស្នើសុំការលើកលែងទោសលើ Diddy។​ លោកថា «ប្រសិនបើ​ខ្ញុំមានអារម្មណ៍​ថា ​មាននរណាម្នាក់ត្រូវបានគេប្រព្រឹត្តដោយអយុត្តិធម៌ មិនថាពួកគេចូលចិត្តខ្ញុំ ឬអត់ នោះមិនប៉ះពាល់ដល់ការសម្រេចចិត្តរបស់ខ្ញុំទេ»។

សេចក្តីថ្លែងការណ៍របស់ប្រធានាធិបតីអាមេរិកភ្លាមៗបានក្លាយជាប្រធានបទក្តៅនៅក្នុងប្រព័ន្ធផ្សព្វផ្សាយរបស់ប្រទេស។ កាសែតធំៗមួយចំនួនដូចជា The New York Times, USA Today, People, Time បានចោទសួរថា តើ Diddy នឹងក្លាយជាតារាល្បី បន្ទាប់ដែលត្រូវបានប្រធានាធិបតីលើកលែងទោសឬអត់។

ទន្ទឹមនោះទៀតសោត កាលពីពេលថ្មីៗនេះ លោក ដូណាល់ ត្រាំ ទើបតែបានលើកលែងទោសដល់លោក Todd និងនាង Julie Chrisley ដែលជាគូស្នេហ៍ដ៏ល្បីល្បាញពីកម្មវិធី Chrisley Knows Best ។ គូ​ស្នេហ៍​នេះ​ធ្លាប់​ត្រូវ​បាន​កាត់ទោស​ពី​បទ​គេច​ពន្ធ។

នៅ​លើ​បណ្ដាញ​សង្គម ទស្សនិកជន​បាន​បញ្ចេញ​ប្រតិកម្ម​យ៉ាង​ខ្លាំង។ មតិភាគច្រើនបានជំទាស់នឹងការលើកលែងទោសទៅលើតារារ៉េបវ័យ៥៥ឆ្នាំ ទោះបីជាវាគ្រាន់តែជាគំនិតមួយ និងចាត់ទុកថា វាមិនសមហេតុផលទេ ប្រសិនបើពិរុទ្ធភាពផ្លូវភេទត្រូវបានដោះលែង។ អ្នកផ្សេងទៀតបានបញ្ចេញមតិថា ប្រសិនបើវាត្រូវបានធ្វើ នោះកេរ្តិ៍ឈ្មោះរបស់លោកត្រាំនឹងខូចខាតយ៉ាងធ្ងន់ធ្ងរ មនុស្សជាច្រើនដែលបានបោះឆ្នោតឲ្យគាត់នឹងសោកស្តាយហើយខកចិត្តមិនស្ទើរ។ ជាពិសេស មានរឿងសំខាន់ជាងនេះទៀតដែលគួរឲ្យព្រួយបារម្ភ ហេតុអ្វីបានជាលោកត្រាំលើកលែងឲ្យមនុស្សប្រភេទនេះ។

កាលពីមុន លោកត្រាំ និង Diddy មានទំនាក់ទំនងជិតស្និទ្ធ។ ពួកគេបានចូលរួមកម្មវិធី Art for Life Gala ឆ្នាំ ២០០៥ ជាមួយគ្នាដែលប្រារព្ធឡើងនៅក្លឹបឯកជន Mar-a-Lago របស់ប្រធានាធិបតីនៅ Palm Beach រដ្ឋ Florida សហរដ្ឋអាមេរិក។ Diddy ក៏​បាន​ថត​រូប​ជាមួយ​លោក និង​ភរិយា​ក្នុង​ព្រឹត្តិការណ៍​របស់​អង្គការ​សហប្រជាជាតិ​ក្នុង​ឆ្នាំ ២០០៨។

សម្រាប់ Diddy តារារ៉េបរូបនេះបានចាប់ផ្តើមការកាត់ក្តីរបស់គាត់ នៅតុលាការសហព័ន្ធ Manhattan ទីក្រុងញូវយ៉ក សហរដ្ឋអាមេរិក ចាប់ពីថ្ងៃទី ១២ខែឧសភា។ ការកាត់ក្តីរំពឹងថា នឹងមានរយៈពេល ៨-ទៅ១០ សប្តាហ៍។ អាជ្ញាធរសហព័ន្ធ​បានចោទប្រកាន់លោក Diddy ពីបទ​បង្ខិតបង្ខំ ការក្លែងបន្លំ ឬជំរិតទារប្រាក់ ដោយប្រើប្រាស់ក្រុមហ៊ុនដូចជា Combs Enterprise ដើម្បីធ្វើសកម្មភាពខុសច្បាប់ទាំំងនោះ។

តារាបរទេសរូបនេះ​ក៏​ត្រូវ​បាន​ចោទ​ប្រកាន់​ពី​បទ​ជួញ​ដូរ​ផ្លូវ​ភេទ និង​ធ្វើ​ពេស្យាចារ។ នៅ​ក្នុង​តុលាការ លោកបាន​បដិសេធ​យ៉ាង​ម៉ឺងម៉ាត់​ចំពោះ​ការ​ចោទ​ប្រកាន់​ទាំង​អស់ ហើយ​បាន​សារភាព​ថា​គ្មាន​កំហុស។ បើ​ត្រូវ​កាត់​ទោស នោះ ​Diddy ប្រឈម​នឹង​ការ​ជាប់​ពន្ធនាគារ​អស់​មួយ​ជីវិត៕

អត្ថបទ៖ សាង ស្រីល័ក្ខ

ចុចអាន៖​តារាចម្រៀង Justin ធ្លាក់ខ្លួន ខូច​ចិត្ត​ ប៉ុន្តែ​បាន​អាជីវកម្ម​គ្រឿងសំអាង Hailey ជាប្រពន្ធយោង​