មេទ័ពអាល្លឺម៉ង់ ព្រមានថា រុស្ស៊ី អាចវាយ «ណាតូ» ៤ឆ្នាំទៀត

ក្នុងបទសម្ភាសផ្តាច់មុខជាមួយ BBC ដែលចេញផ្សាយកាលពីថ្ងៃអាទិត្យទី១ខែមិថុនាឆ្នាំ២០២៥ មេទ័ពអាល្លឺម៉ង់ ព្រមានថា ប្រទេសរុស្ស៊ី អាចវាយប្រហារអង្គការណាតូ ក្នុងរយៈពេលត្រឹម៤ឆ្នាំទៀតប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះគឺចេញពីមាត់មេទ័ព Carsten Breuer ដែលអះអាងថា រុស្ស៊ីកំពុងខិតខំផលិតរថក្រោះខ្លាំងណាស់ ដោយមួយឆ្នាំៗផលិតបានរាប់ពាន់គ្រឿង ហើយអាចប្រើក្នុងការវាយប្រហារលើរដ្ឋណាតូនៅតំបន់បាល់ទិក ត្រឹមឆ្នាំ២០២៩ឬអាចមុននេះក៏ថាបាន។ ដូច្នេះសមាជិកនៃសម្ព័ន្ធភាពដឹកនាំដោយអាមេរិកនេះទាំងអស់ ត្រូវតែត្រៀមខ្លួនឲ្យមែនទែន សម្រាប់ការវាយប្រហារគ្រប់ទម្រង់។

លោកបន្ថែមថា រុស្ស៊ីក៏ផលិតបានគ្រាប់កាំភ្លើងធំ១៥២មិល្លីម៉ែត្រចំនួន៤លានគ្រាប់ក្នុងឆ្នាំ២០២៤ផងដែរ ហើយមិនមែនគ្រាប់ទាំងអស់ ត្រូវយកទៅប្រើនៅប្រទេសអ៊ុយក្រែននោះទេ។

លោកអះអាងដែរថា តាំងពីលោកធ្វើជាមេទ័ពអស់រយៈពេល៤០ឆ្នាំមកនេះ លោកមិនដែលឃើញអង្គការណាតូ ត្រូវរងការគំរាមកំហែងពីរុស្ស៊ី ធ្ងន់ធ្ងរខ្លាំងដូចពេលនេះទេ។

ការព្រមានរបស់លោក Breuer ធ្វើឲ្យគេនឹកឃើញដល់សម្តីរដ្ឋមន្ត្រីការបរទេសអេស្តូនី Margus Tsahkna ដែលបង្ហាញក្តីបារម្ភកាលពីខែមេសាថា រុស្ស៊ីនឹងវាយប្រហាររដ្ឋបាក់ទិកដែលជាសមាជិកអង្គការណាតូមួយនេះ នៅប៉ុន្មានឆ្នាំខាងមុខ។

កាលនោះលោក Tsahkna បាននិយាយក្នុងបទសម្ភាសជាមួយ France 24 ថា «យើងនៅសល់ពេលតែពីរបីឆ្នាំទៀតប៉ុណ្ណោះ ក្នុងការត្រៀមខ្លួនឲ្យបានពេញលក្ខណៈនៅតាមព្រំដែនរបស់ប្លុកនេះ ដើម្បីទប់ទល់នឹងការវាយលុករបស់រុស្ស៊ី។ ខ្ញុំធ្លាប់ជារដ្ឋមន្ត្រីការពារជាតិអេស្តូនីក្នុងឆ្នាំ២០១៦និង២០១៧ ហើយខ្ញុំបានឃើញផ្នែកម្ខាងទៀតនៃព្រំដែនរបស់យើងគឺព្រំដែនណាតូនិងសហភាពអឺរ៉ុប ដែលមានកងទ័ពចំនួន១២០ ០០០នាក់បានត្រៀមខ្លួនរួចជាស្រេច ចេញពីខាងរុស្ស៊ីក្នុងរយៈពេល៤៨ម៉ោង។ យើងមិនមែននិយាយតែពីអេស្តូនីទេ ប៉ុន្តែយើងនិយាយពីណាតូទាំងមូលផងដែរ។ ទ័ពរុស្ស៊ីឥឡូវមិនមែនដូចទ័ពរុស្ស៊ីពីមុនទេ»។

អ្វីដែលគេព្រួយបារម្ភខ្លាំងគឺថា កាលពីឆ្នាំមុន រុស្ស៊ីក៏ប្រកាសរួចហើយដែរថា ប្រទេសនេះត្រៀមខ្លួនរួចជាស្រេចចំពោះសង្គ្រាមដោយផ្ទាល់ជាមួយអង្គការណាតូ ដែលអាចផ្ទុះឡើងនៅរយៈពេលប៉ុន្មានឆ្នាំខាងមុខ៕

អត្ថបទ៖ សុខ សុវណ្ណ

ចុចអាន៖ អ្នកវិភាគអន្តរជាតិបារម្ភថា ការលូកដៃកាន់តែជ្រៅរបស់អាល្លឺម៉ង់ អាចបញ្ឆេះសង្គ្រាមលោកលើកទី៣