ព័ត៌មានអន្ដរជាតិ

ហេតុអ្វីបានជាតម្លៃផ្លែឈើថៃ ធ្លាក់ចុះនៅឆ្នាំនេះ?

បានផុស

២ ខែ មុន

នៅ

ថ្ងៃចន្ទ ២ មិថុនា ២០២៥

ដោយ

កាសែតបាងកកប៉ុស្តិ៍បានផ្សាយថា កាលពីឆ្នាំមុន កសិករថៃទទួលបានអត្ថប្រយោជន៍ពីការឡើងថ្លៃផ្លែឈើ ខណៈការនាំចេញបានកើនឡើងដោយសារកិច្ចខិតខំប្រឹងប្រែងក្នុងការផ្សព្វផ្សាយផលិតផលក្នុងចំណោមដៃគូពាណិជ្ជកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញ តម្លៃផ្លែឈើបានធ្លាក់ចុះនៅឆ្នាំនេះ ហើយកសិករចង់បានវិធានការគាំទ្រពីរដ្ឋាភិបាលដើម្បីហែលឆ្លងនូវពេលវេលាបែបនេះ។ ហេតុអ្វីបានជាតម្លៃធ្លាក់ចុះនៅឆ្នាំនេះ?

អគ្គនាយកនៃនាយកដ្ឋានពាណិជ្ជកម្មផ្ទៃក្នុងថៃ លោក Wittayakorn Maneenetr បាននិយាយថា តម្លៃផ្លែឈើបានធ្លាក់ចុះយ៉ាងខ្លាំងនៅឆ្នាំនេះ ដោយសារការផ្គត់ផ្គង់កើនឡើងច្រើន ហើយផ្លែឈើមួយចំនួនមានគុណភាពទាប។

លោកយ៉ាងដូច្នេះថា៖ «មានការផ្គត់ផ្គង់លើសតម្រូវការសម្រាប់ការប្រើប្រាស់ក្នុងស្រុក ខណៈផ្លែឈើជាច្រើនមុខ បានហូរចូលទីផ្សារក្នុងពេលដំណាលគ្នា រួមមាន ទុរេន មង្ឃុត និងសាវម៉ាវមកពីតំបន់ភាគខាងកើត ក៏ដូចជាផ្លែស្វាយ និងផ្លែគូលេនពីតំបន់ភាគខាងជើង»។ លើសពីនេះ លោកបន្តថា៖ «ផ្លែឈើនាំចូលច្រើនមុខ បានបន្តមកដល់ ដែលផ្តល់ជូនអ្នកប្រើប្រាស់ក្នុងស្រុកនូវជម្រើសចម្រុះ»។

បើតាមអ្នកជំនាញដដែល កត្តាធំៗ២ដែលភាគច្រើនរួមចំណែកលើការកំណត់តម្លៃផ្លែឈើថៃ រួមមានគុណភាព និងបរិមាណផ្គត់ផ្គង់នៅពេលជាក់លាក់ណាមួយ។

ផ្លែឈើខ្លះមានរយៈពេលកំណត់ក្នុងការផ្គត់ផ្គង់មុនខូចត្រឹម ៧ ទៅ ១០ ថ្ងៃ ក្រោយប្រមូលផល ហើយសម្បូរនៅតាមតំបន់ណាមួយជាដើម។ ក្រោមហេតុផលនេះ ផ្លែឈើនោះហូរចូលទៅក្នុងទីផ្សារក្នុងពេលជាមួយគ្នា ដែលធ្វើឱ្យតម្លៃធ្លាក់ចុះ។

លើសពីនេះ កសិករថៃជាច្រើនមានដំណាំផ្លែឈើទ្រង់ទ្រាយតូច ដែលមិនផ្ដោតលើស្ដង់ដារគុណភាព ទៅតាមតម្រូវការទីផ្សារ ខណៈមានការបង្កើនការដាំដុះនៅតំបន់ផ្សេងៗ ដែលធ្វើឱ្យការផ្គត់ផ្គង់កាន់តែច្រើន។

លោក Wittayakorn បាននិយាយថា ពី ៧០-៨០ ភាគរយ នៃទិន្នផលផ្លែឈើថៃប្រចាំឆ្នាំ ត្រូវបានកំណត់សម្រាប់ការនាំចេញ ដោយផ្តោតលើទីផ្សារសំខាន់ៗដូចជាចិន អាស៊ីអាគ្នេយ៍ កូរ៉េខាងត្បូង ជប៉ុន និងសហភាពអឺរ៉ុប។ ទីផ្សារអន្តរជាតិទាំងនេះ ដើរតួនាទីយ៉ាងសំខាន់ក្នុងការកំណត់តម្លៃផ្លែឈើ។ ផ្លែឈើដែលមានគុណភាពខ្ពស់ស្របតាមស្តង់ដារអន្តរជាតិ មានទំនោរតម្លៃខ្ពស់។

យ៉ាងណាមិញ លោក Wittayakorn បាននិយាយថា ការនាំចេញផ្លែឈើអាចមានការលំបាកដោយសារតែរបាំងមិនមែនពន្ធគយ ស្តង់ដារអន្តរជាតិមិនច្បាស់លាស់ ការចំណាយលើការនាំចេញខ្ពស់ និងឧបសគ្គផ្នែកដឹកជញ្ជូន ដូចជាកង្វះកុងតឺន័រ និងថ្លៃជួលក្នុងរដូវប្រមូលផលធំជាដើម។

លើសពីនោះ លោកបន្តថា លក្ខខណ្ឌសេដ្ឋកិច្ចក្នុងប្រទេសនាំចូល ប៉ះពាល់ដល់តម្រូវការផ្លែឈើរបស់ថៃ។កត្តាដូចជាកំណើនសេដ្ឋកិច្ចយឺតយ៉ាវ ការថយចុះនៃអំណាចទិញរបស់អ្នកប្រើប្រាស់ និងកំណើនតម្លៃប្រតិបត្តិការសម្រាប់អ្នកនាំចូលទាំងអស់ អាចប៉ះពាល់ដល់បរិមាណនាំចេញ។

ក្រោមបញ្ហាបែបនេះ កន្លងមក ក្រសួងពាណិជ្ជកម្មថៃបានដាក់ចេញនូវវិធានការគ្រប់គ្រងផ្លែឈើសម្រាប់ឆ្នាំ ២០២៥ ដោយបង្ហាញពីយុទ្ធសាស្ត្រ និងផែនការសកម្មភាពគ្រប់គ្រងផ្លែឈើចំនួន ៩៥០ ០០០ តោន។ យុទ្ធសាស្រ្តទាំងនេះគ្របដណ្តប់ខ្សែច្រវ៉ាក់ផ្គត់ផ្គង់ទាំងមូល និងរួមបញ្ចូលការជំរុញទំនុកចិត្តលើគុណភាពផលិតកម្ម ការបង្កើនទីផ្សារក្នុងស្រុក ការពង្រីកទៅកាន់ទីផ្សារអន្តរជាតិ ការលើកកម្ពស់ស្តង់ដារផ្លែឈើថៃ ការលើកកម្ពស់ការកែច្នៃ ការកែលម្អតំបន់ដាំដុះ ការដោះស្រាយបញ្ហារបាំងពាណិជ្ជកម្ម និងការសម្របសម្រួលនីតិវិធីពាណិជ្ជកម្មជាដើម៕