ជីវិតកម្សាន្ដ

វ័យកាន់តែកៀក៥០ឆ្នាំ Shu Qi មិនខ្លាចបញ្ចេញសម្រស់ពិតបង្ហាញទស្សនិកជន

បានផុស

៤ ថ្ងៃ មុន

នៅ

ថ្ងៃពុធ ៤ មិថុនា ២០២៥

ដោយ

កាលពីថ្ងៃទី ៣១ ខែឧសភា តារាសម្តែង និងម៉ូដែលតៃវ៉ាន់ Shu Qi បានផ្ញើរសារជូនពរក្នុងពិធីបុណ្យ Dragon Boat Festival ទៅកាន់អ្នកគាំទ្ររបស់នាង រួមជាមួយនឹងការថតរូប Selfie នៅក្នុងបន្ទប់តុបតែងមុខ។ នៅក្នុងរូបថត តារាស្រីកើតឆ្នាំ ១៩៧៦ ពាក់អាវពណ៌ប្រផេះធម្មតា ហើយកំពុងធ្វើម៉ូតសក់សក់របស់នាង។ អ្វីដែលគួរឲ្យកត់សម្គាល់នោះគឺមុខរបស់នាងនៅក្នុងសភាពដើមដោយគ្មានការតុបតែងមុខ ស្អាតក្មេងលើសពីការរំពឹងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីដ្បិតតែមិនមានភាពទាក់ទាញ និងមានមន្តស្នេហ៍ដូចក្នុងទស្សនាវដ្ដី ឬពេលចូលរួមកម្មវិធីនានាក៏ដោយ ក៏តារាស្រីតៃវ៉ាន់នៅតែទទួលបានការសរសើរជាច្រើន ចំពោះមុខទទេរស្អាតដោយគ្មានការតុបតែងដែលរូបនាងបង្ហោះជាសាធារណៈ។ ទោះបីជាសញ្ញានៃភាពចាស់បានលេចឡើង ប៉ុន្តែមិនគួរឲ្យកត់សម្គាល់ទេ បើប្រៀបធៀបទៅនឹងស្ត្រីធម្មតាក្នុងវ័យ ៥០ ឆ្នាំ។ នាងត្រូវបានគេនិយាយថា មើលទៅក្មេងជាងអាយុពិតរបស់នាងសឹងតែតែមើលមិនដឹង។

លើសពីនេះ ទំនុកចិត្តរបស់ Shu Qi ក្នុងការបង្ហាញមុខទទេររបស់នាង ត្រូវបានទស្សនិកជនចូលបញ្ចេញមតិលើកសរសើរតារាស្រីរូបនេះថា នាងមានអាកប្បកិរិយាល្អសមសួនហ៊ានទទួលយកអាយុពិត និងបើកបង្ហាញមហាជនបានឃើញពីមុខមាត់ពិតដោយមិនភ័យខ្លាចឡើយ។

មានភាពល្បីល្បាញជាតារាស្រីដែលឲ្យតម្លៃទៅលើភាពស្អាតស្អំ រាល់ពេលដែលនាងបង្ហាញមុខជាសាធារណៈ តួស្រីរូបនេះតែងតែលេចធ្លោទាំងរូបរាង និងការស្លៀកពាក់។ ជាពិសេស កាលពីពេលថ្មីៗនេះ នៅពេលចូលរួមក្នុងមហោស្រពភាពយន្តទីក្រុង Cannes ឆ្នាំ ២០២៥ នៅថ្ងៃទី ២២ ខែឧសភា នាងបានក្លាយជាចំណុចកណ្តាលនៃការចាប់អារម្មណ៍ ជាមួយនឹងភាពទាក់ទាញបែបបុរាណមិនហៃសូពេកឡើយ។

ទោះជាយ៉ាងណាក៏ដោយ នៅក្នុងជីវិតប្រចាំថ្ងៃ តារាស្រីវ័យ ៤៩ឆ្នាំ ចង់មានលក្ខណៈធម្មជាតិតាមដែលអាចធ្វើទៅបាន។ នាងធ្លាប់ចែករំលែកជាមួយទស្សនាវដ្ដី Elle ថា ការមិនស្លៀកពាក់ពេលមិនចាំបាច់ ហើយទុកឲ្យស្បែកសម្រាក គឺជាវិធីមួយក្នុងការរក្សាស្បែកឲ្យមានសុខភាពល្អ និងស្រស់ស្អាត។

នាងក៏ចំណាយកម្លាំងច្រើនលើការថែរក្សាស្បែកពីខាងក្នុងមកក្រៅ។ នាងថែរក្សាស្បែករបស់នាងជារៀងរាល់ថ្ងៃ ដោយផ្តោតលើការសម្អាត និងផ្តល់សំណើម។ សម្រាប់ Shu Qi ការលុបគ្រឿងសម្អាងចេញគឺជាជំហានសំខាន់មួយដែលមិនអាចមើលរំលងបាន។ ទោះហត់ប៉ុណ្ណាក៏តារាស្រីរូបនេះ នៅតែលុបគ្រឿងសម្អាងមុនចូលគេង។ នាងជឿជាក់លើឧបករណ៍សម្អាតផ្ទៃមុខ ព្រោះវាជាឧបករណ៍ដែលជួយសម្អាតបានជ្រៅ កម្ចាត់ភាពកខ្វក់ និងគ្រឿងសម្អាង។

មិនតែប៉ុណ្ណោះ Shu Qi ក៏តឹងរ៉ឹងចំពោះរបបអាហាររបស់នាងដែរ។ នាងផឹកតែទឹកនិងទឹកស្មៅស្រូវសាលី ធ្វើឲ្យប្រាកដថាត្រូវបានទឹកយ៉ាងហោចណាស់ ២ លីត្រក្នុងមួយថ្ងៃ។ នាងក៏ជ្រើសរើសអាហារដែលមានសុខភាពល្អ ស្រស់ និងស្អាត ដូចជាបន្លែ មើម ផ្លែឈើ គ្រាប់។ នាងក៏មិនដែលទទួលទានអាហារចៀន ហើយណែនាំស្ត្រីឲ្យញ៉ាំយ៉ាងហោចណាស់ ៥ម៉ោងមុនពេលចូលគេង។

Shu Qi សារភាពថា នាងមិនមែនជាមនុស្សដែលចូលចិត្តហាត់ប្រាណនោះទេ។ យ៉ាងណាមិញ ដើម្បីរូបរាងនាងរក្សាលំហាត់ប្រាណឱ្យបានទៀងទាត់ប្រហែល៣ដងក្នុងមួយសប្តាហ៍។

Shu Qi ធ្លាប់បានចែករំលែកជាច្រើនដងថា នាងមិនខ្លាចភាពចាស់នោះទេ អ្វីដែលសំខាន់គឺរស់នៅឲ្យមានសុខភាពល្អ និងសប្បាយរីករាយ។ យ៉ាងណាមិញ បើតាមរាជិនីសម្រស់ដែលបម្រើការងារក្នុងវិស័យសិល្បៈ រូបរាងជាគុណសម្បត្តិធំ និងចាំបាច់សម្រាប់ការងារ។ នាងបញ្ជាក់ថា អ្នកសិល្បៈត្រូវរក្សាលំហាត់ប្រាណ និងរក្សារាង ព្រោះនោះជាការបង្ហាញពីការគោរពវិជ្ជាជីវៈ ៕

អត្ថបទ៖ សាង ស្រីល័ក្ខ

ចុចអាន៖Kim Soo-hyun ដែលជួបរឿងអាស្រូវ របូតតំណែងជាតួឯកទៅ Kim Woo-bin តំណាងភោជនីយដ្ឋានល្បីមួយ