ត្រាំ ធ្វើជាម្ចាស់ផ្ទះក្នុង​ការ​ចុះហត្ថលេខាកិច្ចព្រមព្រៀង​​សន្តិភាព​រវាង​អាមេនី និងអាស៊ែបៃហ្សង់

ប្រធានាធិបតីអាមេរិក លោក ដូណាល់ ត្រាំ កំពុងធ្វើជាម្ចាស់ផ្ទះទទួលនាយករដ្ឋមន្ត្រីអាមេនី លោក Nikol Pashinyan និងប្រធានាធិបតី​អាស៊ែបៃហ្សង់ លោក Ilham Aliyev នៅសេតវិមាននា​ថ្ងៃសុក្រ​ទី​៨ខែ​សីហា​នេះ សម្រាប់អ្វីដែលលោកបានហៅ​ថាជា «កិច្ចប្រជុំកំពូលសន្តិភាពជាប្រវត្តិសាស្ត្រ»។

កិច្ចព្រមព្រៀងសន្តិភាពផ្លូវការរវាងប្រទេសទាំងពីរ ត្រូវបានគេរំពឹងថានឹង​​បញ្ចប់​​ជម្លោះ​ជុំវិញតំបន់ Nagorno-Karabakh ដែល​អូសបន្លាយ​អស់​​រយៈពេល​ជា​ច្រើន​ទសវត្សរ៍។

ចំណុចសំខាន់នៃកិច្ចព្រមព្រៀង គឺការបង្កើតច្រករបៀងឆ្លងកាត់ថ្មី ដែល​ត្រូវបានគេហៅថា «Trump Route for International Peace and Prosperity (TRIPP)» ដើម្បីភ្ជាប់​ប្រទេស​អាស៊ែបៃហ្សង់ ជាមួយ​ដែន​ដី​របស់​ខ្លួន​នៅ​តំបន់ Nakhchivan ដោយ​ត្រូវ​ឆ្លងកាត់​​​តាមរយៈ​ប្រទេស​អាមេនី។ សហរដ្ឋអាមេរិក នឹងធ្វើអន្តរការី និងត្រួតពិនិត្យការអភិវឌ្ឍ​វិស័យឯកជននៃផ្លូវនេះ ដែលត្រូវបានរចនាឡើងដើម្បីបង្កើនការតភ្ជាប់ក្នុងតំបន់ និងសមាហរណកម្មសេដ្ឋកិច្ច។

គំនិតផ្តួចផ្តើមសន្តិភាពនេះ គឺជាព្រឹត្តិការណ៍ការទូតដ៏សំខាន់មួយ ដោយលោក ត្រាំ បានសង្កត់ធ្ងន់លើការចូលរួមរបស់ភាគីទាំងពីរថាជាសមិទ្ធិផលដ៏សំខាន់នៃកិច្ចខិតខំប្រឹងប្រែងអន្តរជាតិ។

លោក ត្រាំ បាន​លើក​ឡើង​ថា «ប្រទេសទាំងពីរនេះមានសង្រ្គាមអស់រយៈពេលជាច្រើនឆ្នាំ ដោយបានសម្លាប់មនុស្សរាប់ពាន់នាក់។ មេដឹកនាំជាច្រើន បានព្យាយាមបញ្ចប់សង្រ្គាម ប៉ុន្តែមិនទទួលបានជោគជ័យទាល់តែ​មាន​រដ្ឋបាល ត្រាំ។ រដ្ឋបាលរបស់ខ្ញុំបានទាក់ទងជាមួយភាគីទាំងពីរអស់មួយរយៈមកហើយ»។ ប្រធានាធិបតី​ទី៤៧​របស់​អាមេរិករូប​នេះ បាន​បន្ថែម​ថា លោក«មានមោទកភាពណាស់ចំពោះមេដឹកនាំក្លាហានទាំងពីរ​ដែលបានធ្វើរឿងត្រឹមត្រូវ។ ថ្ងៃទី៨ខែសីហានឹងក្លាយជាថ្ងៃប្រវត្តិសាស្ត្រសម្រាប់អាមេនី អាស៊ែបៃហ្សង់ សហរដ្ឋអាមេរិក និងពិភពលោក»៕

ដោយ៖ ឈាង