អនុប្រធានសមាគមសិល្បករខ្មែរ សរសើរឆន្ទ: កុយ អេនណា និងចាត់ទុកជាគំរូសម្រាប់អ្នកសិល្បៈ

ទស្សនិកជនបានដឹងហើយថាកញ្ញា កុយ អេនណា បាននិងកំពុងធ្វើដំណើរដោយថ្មេីជេីងពីរាជធានីភ្នំពេញ ទៅកាន់ខេត្តសៀមរាប​ ខណ:មកដល់ពេលនេះជាថ្ងៃទី១៣ នៃដំណើរថ្មេីជេីងរបស់នាងប្រកបដោយសុវត្ថិភាព និងទទួលបានការស្វាគមន៍យ៉ាងកក់ក្តៅពីប្រជាពលរដ្ឋគ្រប់មជ្ឈដ្ឋានទាំងក្មេងចាស់ប្រុសស្រី។

ក្នុងដំណើរដោយថ្មេីរជេីងពីរាជធានីភ្នំពេញទៅកាន់ខេត្តសៀមរាបរបស់ កុយ អេនណា នាពេលនេះគឺគោល បំណង ដេីម្បីរៃអង្គាសថវិកាជួយកុមារ​ និងជនពិការ​ក្នុងមណ្ឌលខ្វះខាតនៅកម្ពជា។ ម្យ៉ាងទៀត ក៏ភ្ជាប់នឹងការផ្សព្វផ្សាយនូវតំបន់ទេសចរណ៍នៅក្នុងប្រទេសកម្ពុជា ពីខេត្តមួយទៅកាន់ខេត្តមួយ។

ស្របពេលឃើញសកម្មភាពនិងឆន្ទ:របស់កញ្ញា កុយ អេនណា ខាងលើនេះ រៀមច្បងសិល្ប: និងជាអនុប្រធានសមាគមសិល្បករខ្មែរលោកស្រី នៅ សូនីតា បានចេញមកកោតសរសើរឆន្ទ: កុយ អេនណា ថាក្លាយជាគំរូដ៏ល្អសម្រាប់សិល្បករនិងមហាជនព្រោះនាងបានធ្វើដើម្បីប្រយោជន៍សង្គម។

អនុប្រធានសមាគមសិល្បករខ្មែររូបនេះថា “នាងជាក្មេងស្រីសុភាពមានសីលធម៌តាំងពីខ្លួនជួបនាងដំបូងមកម្ល៉េះ ពេលនេះនាងក្លាយជាគំរូមួយដ៏ល្អសម្រាប់បងប្អូនសិល្បករ និងមហាជនជាច្រើន រួមទាំងអ្នកនាងផងដែរ ដែលបង្ហាញពីឆន្ទ:ភាពអត់ធ្មត់ការតស៊ូ ដើម្បីគោលដៅដែលនាងចង់បានដើម្បីប្រយោជន៍សង្គមជារួម”។

បន្ថែមពីនេះ អនុប្រធានសមាគមសិល្បករខ្មែរ បញ្ជាក់ថា “ខ្ញុំពិតជាមានមោទកភាពចំពោះនាងណាស់ Koy Anna បងមិនបានជួបផ្ទាល់ជាមួយប្អូនតែក៏មានកូន និង ប្តីលើកទឹកចិត្តប្អូនស្រីផ្ទាល់ដែរ”។

សូមជម្រាបថា គិតមកដល់ថ្ងៃទី១៦ ខែកញ្ញា ឆ្នាំ២០២៥នេះ គឺជាដំណើរថ្មើរជើងមានរយ:ពេល១៣ថ្ងៃហើយដែលកុយ អេនណា បានចាកចេញពីភ្នំពេញឆ្ពោះទៅកាន់ខេត្តសៀមរាប ដោយថ្ងៃនេះនាងបានចាកចេញពីទឹកដីខេត្តកំពង់ធំ បន្តដំណើទៅគោលដៅខេត្តសៀមរាប៕ ចាន់រ៉ា