អាមេរិក​នឹង​ដាក់​ពង្រាយ​ទ័ព​២០០​នាក់​​ សម្រាប់​ជួយ​ពិនិត្យ​បទ​ឈប់បាញ់​នៅ​តំបន់​ហ្គាហ្សា

យោង​តាម​​ការ​ចុះផ្សាយ​នា​ថ្ងៃ​ទី​១០​ខែ​តុលា​ឆ្នាំ​២០២៥​របស់​ទីភ្នាក់ងារ​ព័ត៍មាន​ Reuters សហរដ្ឋអាមេរិកនឹងបញ្ជូនទាហានរហូតដល់ ២០០នាក់ទៅកាន់ប្រទេសអ៊ីស្រាអែល ដើម្បីបង្កើតក្រុមការងារថ្មីមួយដែលមានគោលបំណងគាំទ្រដល់កិច្ចខិតខំប្រឹងប្រែងរក្សាស្ថិរភាពនៅក្នុងតំបន់ហ្គាហ្សា។ ទោះបីជាយ៉ាងណាក៏ដោយ គ្មានកងកម្លាំងអាមេរិកណាមួយនឹង​ត្រូវ​ដាក់​ពង្រាយ​ចូលទៅក្នុង​តំបន់​ហ្គាហ្សា​នោះទេ។

បញ្ជាការកណ្តាលរបស់សហរដ្ឋអាមេរិក (CENTCOM) នឹងបង្កើតមជ្ឈមណ្ឌលសម្របសម្រួលស៊ីវិល និងយោធា (CMCC) ដែលនឹងត្រួតពិនិត្យការផ្តល់ជំនួយសន្តិសុខ និងជំនួយមនុស្សធម៌ទៅកាន់តំបន់ហ្គាហ្សា។

អ្នកនាំពាក្យសេតវិមានលោកស្រី Karoline Leavitt បាន​ប្រាប់​នៅក្នុងសេចក្តីថ្លែងការណ៍មួយនៅលើប្រព័ន្ធផ្សព្វផ្សាយសង្គមថា បុគ្គលិកអាមេរិកនៅ​ប្រទេស​អ៊ីស្រាអែលនឹងទទួលខុសត្រូវក្នុងការត្រួតពិនិត្យកិច្ចព្រមព្រៀងតំបន់ហ្គាហ្សា ហើយនឹងធ្វើការជាមួយនឹងដៃគូអន្តរជាតិផ្សេងទៀត​នៅ​ទីនោះ។

ប្រភព​​មន្ត្រីអាមេរិកពីររូប​ដែលនិយាយក្នុងលក្ខខណ្ឌមិនបញ្ចេញឈ្មោះ បានលើក​ឡើង​ថា CMCC នឹងរួមបញ្ចូលតំណាងមកពីប្រទេសអេហ្ស៊ីប កាតា តួកគី និង​សហភាពអារ៉ាប់រួម រួមជាមួយភាគីស្នូលអាមេរិកផ្សេង​ទៀត។ មជ្ឈមណ្ឌលនេះនឹងសម្របសម្រួលជាមួយកងកម្លាំងអ៊ីស្រាអែល និងអង្គភាពសន្តិសុខក្នុងតំបន់ ដើម្បីទប់ស្កាត់ការប៉ះទង្គិចដែលអាចកើតមាន។

មន្ត្រី​ម្នាក់​បាន​សង្កត់​ធ្ងន់​ថា «គ្មាន​ទាហាន​អាមេរិក​ណា​ម្នាក់​ទំនង​ចូល​ទៅ​ក្នុង​តំបន់​ហ្គាហ្សា​ឡើយ»។

ប្រភព​ពី​មន្ត្រី​​អាមេរិក​បាន​បន្ថែម​ថា បុគ្គលិក​អាមេរិក​ដែល​ត្រូវ​បាន​ដាក់​ពង្រាយ​មាន​ជំនាញ​ក្នុង​ការ​ធ្វើ​ផែនការ ភស្តុភារ វិស្វកម្ម និង​ប្រតិបត្តិការ​សន្តិសុខ។ ពួកគេបាន​​បញ្ជាក់​ថា គោលដៅចម្បង​របស់បេសកកម្មគឺដើម្បីជួយធ្វើ​ឲ្យ​តំបន់ហ្គាហ្សាមានស្ថិរភាព និងកាត់បន្ថយភាពតានតឹងក្នុងតំបន់បន្ទាប់ពីមានអំពើហិង្សាជាច្រើនខែ។

រដ្ឋាភិបាល​ក្រុង​វ៉ាស៊ីនតោន​បាន​បងា្ហញ​ក្ដី​សង្ឃឹមថា ការអនុវត្តប្រកបដោយជោគជ័យនៃកិច្ចព្រមព្រៀង​​ហ្គាហ្សា អាចបើកទ្វារឆ្ពោះទៅរកវឌ្ឍនភាពការទូតជាថ្មីនៅមជ្ឈិមបូព៌ា រួមទាំងការចរចារវាងអ៊ីស្រាអែល និងបណ្តាប្រទេសអារ៉ាប់ និងមូស្លីមបន្ថែម៕

ដោយ៖ ឈាង