ប្រធានាធិបតីបារាំង Macron បដិសេធ​មិន​​ចុះ​ចេញ​ពី​តំណែងដាច់ខាត

តាមការចុះផ្សាយពីសារព័ត៌មាន Reuters នាថ្ងៃអង្គារ៍ទី១៤ ខែ​តុលា​ ឆ្នាំ​២០២៥​ ប្រធានាធិបតីបារាំងលោក Emmanuel Macron បានបដិសេធមិនចុះចេញពីតំណែងដាច់ខាត ខណៈដែលរដ្ឋាភិបាលថ្មីរបស់លោកប្រឈមមុខនឹងការមិនទុកចិត្តចំនួនពីរ ដែលអាចមានសក្តានុពលនាំទៅដល់ការដួលរលំនៃរដ្ឋាភិបាល ដែលទើបតែងតាំងថ្មីនៅចុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសបារាំងបាននិងកំពុងប្រឈមមុខនឹងវិបត្តិនយោបាយដ៏អាក្រក់បំផុតរបស់ខ្លួន ក្នុងរយៈពេលជាច្រើនទស្សវត្ស ដោយសាររដ្ឋាភិបាលភាគតិចជាច្រើន ព្យាយាមជំរុញតាមរយៈការកាត់បន្ថយថវិកាតាមរយៈសភា ដែលបែងចែកជាជំរុំមនោគមវិជ្ជាបីផ្សេងគ្នា។

ជាងនេះទៅទៀត លោក Macron ក៏បានផ្លាស់ប្តូរនាយករដ្ឋមន្ត្រីចំនួនប្រាំនាក់ក្នុងរយៈពេលតិចជាងពីរឆ្នាំ ហើយគូប្រជែងជាច្រើនរបស់លោកបានអះអាងថា មធ្យោបាយតែមួយគត់ដើម្បីបញ្ចប់វិបត្តិគឺការហៅការបោះឆ្នោតនីតិបញ្ញត្តិថ្មី ឬលាលែងពីតំណែង ដែលជាជម្រើសលោកបានបដិសេធមិនបន្ត។

បន្ទាប់​ពី​បាន​មក​ដល់​ប្រទេស​អេហ្ស៊ីប​ដើម្បី​ចូល​រួម​សន្និសីទ​ស្តីពី​ការ​បញ្ចប់​សង្រ្គាម​នៅ​ហ្គាហ្សា លោក Macron បាន​ប្រកាន់​ជំហរ​តឹងតែង។ គាត់បានស្តីបន្ទោសគូប្រជែង ចំពោះអស្ថិរភាពរបស់ប្រទេសបារាំង និងឲ្យបក្សប្រឆាំងទទួលខុសត្រូវទាំងស្រុងចំពោះភាពវឹកវរមួយនេះ។

ទន្ទឹមគ្នានោះដែរ ប្រធានាធិបតីបារាំងវ័យ៤៧ឆ្នាំរូបនេះថែមទាំងប្រកាសជំហរថា ខ្លួនមិនមានគម្រោងលាលែងពីតំណែងមុនអាណត្តិ ដែលនឹងបញ្ចប់នៅឆ្នាំ ២០២៧ឡើយ។ លោកបានឆ្លៀតនិយាយដោយមិនភ្លេចសង្កត់ធ្ងន់ថា «ខ្ញុំហ៊ានធានាស្ថិរភាព ហើយខ្ញុំនឹងបន្តធ្វើដូច្នេះ! ប្រជាជនមិនគួរភ្លេចថា កាតព្វកិច្ចរបស់ប្រធានាធិបតីគឺ បម្រើពលរដ្ធ»៕

អត្ថបទ៖ សាង ស្រីល័ក្ខ

ចុចអានព័ត៌មានខាងក្រោមនេះ៖

កូរ៉េខាងត្បូង គ្រោងសាងសង់លេណដ្ឋាន មានសមត្ថភាពទប់ទល់ការវាយប្រហារនុយក្លេអ៊ែរ