វេណេស៊ុយអេឡា ប្រកាស​បិទស្ថានទូតនៅន័រវេស និងអូស្ត្រាលី ក្រោយ​មេ​បក្ស​ប្រឆាំង​ទទួល​ពាន​ណូបែល​សន្តិភាព

វេណេស៊ុយអេឡាបានប្រកាសកាលពីថ្ងៃចន្ទ​ទី​១៣​ខែ​តុលា​ថា ខ្លួននឹងបិទស្ថានទូតនៅក្នុងប្រទេសន័រវេស និង​អូស្ត្រាលី ហើយបើកស្ថានទូតថ្មីនៅក្នុង​ប្រទេសប៊ូគីណាហ្វាសូ និងហ្ស៊ីមបាវ៉េ ដែលជាផ្នែក​មួយ​នៃ«ការចាត់តាំងធនធានឡើងវិញជាយុទ្ធសាស្ត្រ» បន្ទាប់ពីភាពតានតឹងកើនឡើងជាមួយសហរដ្ឋអាមេរិក និង​ជា​ពិសេស​ក្រោយ​ពេល​មេ​បក្ស​ប្រឆាំង​ក្នុង​ស្រុក​ទទួល​បាន​ពាន​រង្វាន់​ណូប៊ែល​សន្តិភាព​កាល​ពី​ពេល​ថ្មីៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយ រដ្ឋាភិបាលរបស់ប្រធានាធិបតី នីកូឡាស ម៉ាឌូរ៉ូ បាននិយាយថា ការសម្រេចចិត្តនេះ គឺជា​​ការរៀបចំរចនាសម្ព័ន្ធឡើងវិញកាន់តែទូលំទូលាយនៃទីភ្នាក់ងារ​បរទេសរបស់ខ្លួន ក្នុងគោលបំណងពង្រឹងទំនាក់ទំនងជាមួយនឹងអ្វីដែលគេហៅថា «ប្រទេសបងប្អូន និងសម្ព័ន្ធមិត្តជាយុទ្ធសាស្រ្តក្នុងការប្រយុទ្ធប្រឆាំងនឹងអាណានិគម និងការតស៊ូប្រឆាំងនឹងសម្ពាធអនុត្តរភាព»។

រដ្ឋាភិបាលវេណេស៊ុយអេឡា​បានបន្ថែមថា ភ្នាក់ងារ​កុងស៊ុលសម្រាប់ប្រជាជនវេណេស៊ុយអេឡានៅន័រវេស និងអូស្ត្រាលី នឹងបន្តផ្តល់ជូនតាមរយៈបេសកកម្មការទូតផ្សេងទៀត ជាមួយនឹងព័ត៌មានលម្អិតបន្ថែមនឹងត្រូវប្រកាសក្នុងពេលឆាប់ៗនេះ។

ក្រសួងការបរទេសន័រវេសបានអះអាងថា ខ្លួនបានទទួលការជូនដំណឹងអំពីការបិទ ប៉ុន្តែបាន​លើក​ឡើង​ថា មិនមានការពន្យល់​ពី​មូលហេតុ​នៃ​ការ​បិទ​នោះឡើយ។ អ្នកនាំពាក្យក្រសួង​ការ​បរទេស​ន័រវេស​បានប្រាប់​ថា «នេះគឺជាការសោកស្តាយ។ ទោះបីជាការពិតដែលថា យើងមានទស្សនៈផ្សេងគ្នាលើបញ្ហាជាច្រើនក៏ដោយ ប្រទេសន័រវេសចង់រក្សាការសន្ទនាជាមួយវេណេស៊ុយអេឡាដោយបើកចំហ ហើយនឹងធ្វើ​ការ​ដោះស្រាយ​​លើ​រឿង​ទាំង​នោះ»។

ការប្រកាសនេះ បានធ្វើឡើងតែប៉ុន្មានថ្ងៃបន្ទាប់ពីគណៈកម្មាធិការណូបែលន័រវេស នៅទីក្រុង Oslo បានផ្តល់រង្វាន់ណូបែលសន្តិភាពឆ្នាំ​២០២៥ ដល់មេដឹកនាំបក្សប្រឆាំងវេណេស៊ុយអេឡាលោកស្រី María Corina Machado សម្រាប់យុទ្ធនាការដើម្បីលទ្ធិប្រជាធិបតេយ្យ។ លោកស្រី​ Machado បានឧទ្ទិសរង្វាន់​នេះ​ដល់​ប្រធានាធិបតីអាមេរិក ដូណាល់​ ត្រាំ ដែលលោកស្រីបានសរសើរថា «គាំទ្រការតស៊ូដើម្បីសេរីភាពក្នុងប្រទេសវេណេស៊ុយអេឡា»។

ប្រទេសន័រវេស ដែលពីមុនបានបម្រើការជាអ្នកសម្រុះសម្រួលក្នុងការចរចានយោបាយរបស់វេណេស៊ុយអេឡា បានសង្កត់ធ្ងន់ថា គណៈកម្មាធិការណូបែលដំណើរការដោយឯករាជ្យពីរដ្ឋាភិបាលរបស់ខ្លួន។

ស្ថានទូត​វេណេស៊ុយអេឡា នៅទីក្រុង Oslo មិនបានឆ្លើយតបទៅនឹងសំណើសុំការអត្ថាធិប្បាយទេ។

ការប្រឈមមុខដាក់គ្នា​កើន​ឡើង​កាន់តែខ្លាំងរវាងវេណេស៊ុយអេឡា និងសហរដ្ឋអាមេរិក។ វេណេស៊ុយអេឡា​ បានថ្កោលទោស​ការវាយប្រហារ​ជាបន្តបន្ទាប់​របស់យោធាអាមេរិក លើនាវានៅឆ្នេរសមុទ្រការាប៊ីនរបស់ខ្លួន ដែលទីក្រុងវ៉ាស៊ីនតោនអះអាងថា មានទំនាក់ទំនងនឹងការជួញដូរគ្រឿងញៀន។ វេណេស៊ុយអេឡា បានអំពាវនាវទៅកាន់អង្គការសហប្រជាជាតិសម្រាប់ការគាំទ្រ ដោយព្រមានថា ខ្លួនប្រឈមមុខនឹងលទ្ធភាពពិតប្រាកដនៃការវាយប្រហាររបស់អាមេរិក។

លោក ម៉ាឌូរ៉ូ បានចោទប្រកាន់ទីក្រុងវ៉ាស៊ីនតោន ពីការព្យាយាមបង្កើតការផ្លាស់ប្តូររបប ដោយហៅសហរដ្ឋអាមេរិកថាជាការគំរាមកំហែងដល់អធិបតេយ្យភាពរបស់វេណេស៊ុយអេឡា។ សហរដ្ឋអាមេរិក បានដាក់ឈ្មោះលោក ម៉ាឌូរ៉ូ ថា​ជា«មេដឹកនាំខុសច្បាប់នៃរដ្ឋ​គ្រឿងញៀន» ហើយថ្មីៗនេះ បានចាប់ផ្តើម​ក្រុមការងារប្រឆាំងគ្រឿងញៀន​ថ្មីមួយ នៅក្រោម​បញ្ជាការភាគខាងត្បូង​របស់ខ្លួន ដែលទទួលខុសត្រូវចំពោះប្រតិបត្តិការនៅទូទាំងអាមេរិកឡាទីន។

អ្នកវិភាគការទូតនិយាយថា ការបិទបេសកកម្មនៅក្នុងប្រទេសន័រវេស និងអូស្ត្រាលី ដែលជាសម្ព័ន្ធមិត្តសំខាន់របស់អាមេរិកទាំងពីរ គឺជាជំហានមួយទៀតក្នុងការជំរុញរបស់វេណេស៊ុយអេឡាឆ្ពោះទៅកាន់ប្លុកដែលមានសម្ព័ន្ធភាពជាមួយរុស្ស៊ី និងចិន ខណៈដែលវេណេស៊ុយអេឡាស្វែងរកការពង្រឹងភាពជាដៃគូជាសកលនៅខាងក្រៅតំបន់លោកខាងលិច៕

ដោយ៖ ឈាង