ថៃ៖ កិច្ចព្រមព្រៀងសន្តិភាពជាមួយកម្ពុជា នឹងចុះហត្ថលេខានៅថ្ងៃសៅរ៍នេះ

ជាមួយក្តីសង្ឃឹមនៃសុខសន្តិភាព រដ្ឋមន្ត្រីការបរទេសថៃ Sihasak Phuangketkeow អះអាងថា កម្ពុជា-ថៃ កំពុងបង្ហាញសញ្ញាល្អឈានឆ្ពោះទៅរកការដោះស្រាយជម្លោះព្រំដែន ហើយកិច្ចព្រមព្រៀងសន្តិភាពនឹងត្រូវបានចុះហត្ថលេខានៅថ្ងៃសៅរ៍ទី២៥ខែតុលាឆ្នាំ២០២៥ ក្នុងប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងរបស់លោក Sihasak កើតឡើងក្រោយពេល គណៈប្រតិភូនៃប្រទេសទាំងពីរជួបគ្នាក្នុងកិច្ចប្រជុំ GBC នៅម៉ាឡេស៊ី ដែលទទួលបានលទ្ធផលគូរឲ្យចាប់អារម្មណ៍។

តាមការផ្សាយរបស់ The Nation នៅថ្ងៃព្រហស្បតិ៍ទី២៣ខែតុលាឆ្នាំ២០២៥, លោក Sihasak កត់សម្គាល់ថា វឌ្ឍនភាពក្នុងអំឡុងថ្ងៃដំបូងនៃកិច្ចប្រជុំ GBC គឺភាគីទាំងពីរ បានយល់ព្រមជាគោលការណ៍ចំពោះលក្ខខណ្ឌដែលបានស្នើឡើង។

ដោយឡែកសម្រាប់ពិធីចុះហត្ថលេខាលើកិច្ចព្រមព្រៀងសន្តិភាពក្នុងអំឡុងកិច្ចប្រជុំអាស៊ានវិញ គឺនឹងមានការចូលរួមជាសាក្សីពីសំណាក់មេដឹកនាំធំៗ រួមទាំងប្រធានាធិបតីសហរដ្ឋអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ផងដែរ ដែលបុរសម្នាក់នេះហើយ បានដើរតួនាទីជាអ្នកសម្របសម្រួលពេញមួយការចរចា។

ជាដំណឹងល្អមួយទៀត ប្រមុខការពារជាតិកម្ពុជា ក៏បញ្ជាក់ដែរថា កិច្ចព្រមព្រៀងសន្តិភាពកម្ពុជា-ថៃ ដែលចុះនៅមុខលោកត្រាំ នឹងបង្កលក្ខណៈដល់ការដោះលែងយោធិនកម្ពុជាទាំង១៨រូប៕

អត្ថបទ៖ សុខ សុវណ្ណ

ចុចអាន៖ កម្ពុជា-ថៃ ឯកភាពបោះបង្គោលព្រំដែនបណ្តោះអាសន្ននៅតំបន់តានតឹងភូមិជោគជ័យនិងព្រៃចាន់តាមផែនទីដែលបារាំងគូស