មីយ៉ាន់ម៉ា ចាប់ផ្ដើមធ្វើយុទ្ធនាការឃោសនាបោះឆ្នោត ទោះបីសង្គ្រាមស៊ីវិលមិនទាន់បញ្ចប់ក៏ដោយ

គណបក្សនយោបាយក្នុងប្រទេសមីយ៉ាន់ម៉ា បានចាប់ផ្ដើមធ្វើយុទ្ធនាការឃោសនាបោះឆ្នោតហើយ សម្រាប់ការបោះឆ្នោតដែលរៀបចំឡើងដោយរដ្ឋាភិបាលយោធាដឹកនាំដោយ​​ ឧត្ដមសេនីយ៍ មីន អ៊ុងឡាំង ទោះបីជាប្រទេសនេះមិនទាន់រួចផុតពីសង្គ្រាមស៊ីវិលក៏ដោយ។ នេះបើយោងតាមការចេញផ្សាយរបស់សារព័ត៌មាន The Irrawaddy នៅថ្ងៃទី២៨ខែតុលា។

ការបោះឆ្នោតនេះ គ្រោងនឹងធ្វើឡើងចាប់ថ្ងៃទី ២៨ ខែធ្នូ ប៉ុន្តែត្រូវបានអ្នកសង្កេតការណ៍ក្នុងស្រុក និងអ្នកសង្កេតការណ៍អន្តរជាតិមើលឃើញយ៉ាងទូលំទូលាយថាជាការប៉ុនប៉ងរបស់របបយោធាដើម្បីធ្វើឱ្យការគ្រប់គ្រងរបស់ខ្លួនស្របច្បាប់ជាជាងស្តារលទ្ធិប្រជាធិបតេយ្យឡើងវិញ។

ចាប់តាំងពីរដ្ឋប្រហារមក ការប្រយុទ្ធគ្នាបានរីករាលដាលពាសពេញប្រទេសរវាងកងទ័ព ក្រុមគាំទ្រលទ្ធិប្រជាធិបតេយ្យ និងកងកម្លាំងប្រដាប់អាវុធជនជាតិភាគតិច។ យោធាបានបាត់បង់ការគ្រប់គ្រងលើតំបន់ជាច្រើន ហើយពួកឧទ្ទាមបាននិយាយថាពួកគេនឹងធ្វើពហិការការបោះឆ្នោត។

ការបោះឆ្នោតនេះនឹងមានគណបក្សនយោបាយចំនួន ៥៧ ចូលរួម ប៉ុន្តែមិនមានគណបក្សសម្ព័ន្ធជាតិដើម្បីប្រជាធិបតេយ្យ (NLD) ដ៏ពេញនិយមរបស់លោកស្រី អ៊ុងសាន ស៊ូជី ទេ។ របបយោធាបានហាមឃាត់គណបក្សសម្ព័ន្ធជាតិដើម្បីប្រជាធិបតេយ្យ (NLD) និងចាប់លោកស្រី ស៊ូជី ដាក់ពន្ធនាគារ បន្ទាប់ពីចោទប្រកាន់លោកស្រីពីបទក្លែងបន្លំការបោះឆ្នោត ខណៈការអះអាងនេះត្រូវបានគេមើលឃើញយ៉ាងទូលំទូលាយថាមិនមែនជាការពិត។

គណបក្សសាមគ្គីភាព និងអភិវឌ្ឍន៍សហភាព (USDP) ដែលគាំទ្រយោធាបានចាប់ផ្តើមយុទ្ធនាការរបស់ខ្លួននៅក្នុងរដ្ឋធានី Naypyitaw ជាមួយនឹងផ្ទាំងប៉ាណូ និងការផ្សាយពាណិជ្ជកម្មប្រព័ន្ធផ្សព្វផ្សាយរដ្ឋ។ ទោះជាយ៉ាងណាក៏ដោយ យុទ្ធនាការត្រូវបានគេរំពឹងថានឹងស្ងប់ស្ងាត់ និងត្រូវបានរឹតត្បិតយ៉ាងខ្លាំងដោយសារតែសង្គ្រាមដែលកំពុងបន្ត និងច្បាប់សន្តិសុខដ៏តឹងរ៉ឹង។

មនុស្សជាច្រើននិយាយថា ពួកគេមិនចាប់អារម្មណ៍ការបោះឆ្នោតទេ ពីព្រោះពួកគេផ្តោតលើការរស់រានមានជីវិតដែលកំពុងខ្វះខាតស្បៀងអាហារ បាត់បង់ការងារ និងប្រឈមនឹងការប្រយុទ្ធគ្នាឥតឈប់ឈរ។ ចំណែកប្លុកតំបន់អាស៊ានបានសម្រេចចិត្តមិនបញ្ជូនអ្នកសង្កេតការណ៍បោះឆ្នោតទេ ដោយនិយាយថាដំណើរការនេះខ្វះភាពយុត្តិធម៌។ ក្រុមសិទ្ធិមនុស្សក៏បានរិះគន់ការបោះឆ្នោតនេះផងដែរ ដោយព្រមានថាវាអាចធ្វើឱ្យការគ្រប់គ្រងរបស់យោធាកាន់តែរឹងមាំ។

លើសពីនេះរបបយោធាបានបង្កើតច្បាប់ចាប់អ្នកដែលតវ៉ា ឬរិះគន់ការបោះឆ្នោត ជាមួយនឹងការផ្តន្ទាទោសដាក់ពន្ធនាគាររហូតដល់១០ឆ្នាំ ហើយនឹងមិនធ្វើការបោះឆ្នោតនៅក្នុងតំបន់ដែលហែកហួរដោយសង្គ្រាមក្រោមច្បាប់អាជ្ញាសឹកឡើយ។អ្នកវិភាគនិយាយថា ការបោះឆ្នោតនេះនឹងមិននាំមកនូវសន្តិភាព ឬលទ្ធិប្រជាធិបតេយ្យទេ ប៉ុន្តែផ្ទុយទៅវិញជួយយោធារឹតបន្តឹងការគ្រប់គ្រងរបស់ខ្លួនលើប្រទេសដែលនៅតែបែកបាក់ដោយសង្គ្រាមស៊ីវិលទៅវិញ៕

អត្ថបទ៖ ប៊ុន សុភាព