ស៊ែប៊ីត្រៀមលក់គ្រាប់​រំសេវ​មួយ​ចំនួន​ធំឲ្យ EU ហើយ​ថា ចង់ប្រើ​យ៉ាង​ម៉េច​ស្រេចតែចិត្ត

ប្រធានាធិបតីស៊ែប៊ីលោក Aleksandar Vučić បាននិយាយថា ប្រទេសរបស់លោកបានត្រៀមខ្លួនរួចជាស្រេច ក្នុងការលក់គ្រាប់រំសេវ​មួយ​ចំនួន​ធំ​ទៅកាន់​សហភាពអឺរ៉ុប រួមទាំង គ្រាប់កាំភ្លើងត្បាល់ ផងដែរ ហើយនឹងមិនដាក់កម្រិតពីរបៀបដែលប្លុកនេះប្រើប្រាស់អាវុធនោះទេ ពោល​គឺ​ពួក​គេ​ចង់​ប្រើ​ក្នុង​ន័យ​អ្វី​ក៏បាន​ដែរ។

យោង​តាម​ការ​ចុះ​ផ្សាយ​របស់ Militarnyi លោក Vučić បានប្រាប់​ថា ស៊ែប៊ី បើកចំហក្នុងការចុះហត្ថលេខាលើកិច្ចសន្យារយៈពេលវែងជាមួយសហភាពអឺរ៉ុប ដើម្បី​ឲ្យ​ឧស្សាហកម្មការពារជាតិស៊ែប៊ី រៀបចំផែនការផលិតកម្មរបស់ខ្លួន​ឲ្យ​កាន់តែប្រសើរឡើង។ លោក​បាន​​​បញ្ជាក់​ថា​ «​អឺរ៉ុប​អាច​ធ្វើ​តាម​អ្វី​ដែល​ពួកគេ​ចង់​ធ្វើ» ដោយ​សង្កត់ធ្ងន់​ថា​ ​ស៊ែប៊ី​នឹង​​មិន​ដាក់​កម្រិត​ការ​ប្រើ​ប្រាស់​​ណា​មួយ​​លើ​គ្រាប់​​រំសេវ​ទាំង​​នោះ​​ឡើយ។

ការកត់សម្គាល់របស់មេដឹកនាំស៊ែប៊ី ធ្វើឡើងនៅពេលដែលបណ្តាប្រទេសអឺរ៉ុបបន្តកិច្ចខិតខំប្រឹងប្រែងដើម្បីបង្កើនផលិតកម្មការពារ ចំពេលមានការខ្វះខាតដែលបណ្តាលមកពីការគាំទ្រផ្នែកយោធាដែលកំពុងបន្តសម្រាប់អ៊ុយក្រែន។

ឆ្លើយតបទៅនឹងការរិះគន់ជុំវិញការចូលរួមរបស់ស៊ែប៊ីនៅក្នុង​ក្បួនដង្ហែយោធារុស្ស៊ី លោក Vučić បាន​និយាយ​ការពារ​ខ្លួ​ន​ថា នេះជា​ប្រពៃណីប្រវត្តិសាស្ត្រ ដែលចងភ្ជាប់ទៅនឹង​ការរំដោះទីក្រុងបែលក្រាដ ដោយកងទ័ពក្រហម និងពួកយូហ្គោស្លាវី ក្នុងអំឡុងសង្គ្រាមលោកលើកទីពីរ។

លោកក៏បានគូសបញ្ជាក់ផងដែរថា ប្រទេសស៊ែប៊ី មិនបានបើកកិច្ចប្រជុំណាមួយជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន ចាប់តាំងពីការចាប់ផ្តើមនៃសង្រ្គាមនៅអ៊ុយក្រែន និងបានរំលឹកឡើងវិញថា ទីក្រុង​បែលក្រាដបានថ្កោលទោសចំពោះការឈ្លានពានរបស់ទីក្រុងមូស្គូ។

លោក Vučić បានបន្ថែមថា ប្រទេសស៊ែប៊ីបានផ្តល់ជំនួយមនុស្សធម៌ និងហិរញ្ញវត្ថុដល់អ៊ុយក្រែន ដោយអះអាងថា វិភាគទានរបស់ខ្លួនបានលើសពីប្រទេសផ្សេងទៀតនៅតំបន់បាល់កង់។

ការអត្ថាធិប្បាយនេះ បានគូសបញ្ជាក់ពី​ការ​ប្រកាន់​យក​ទង្វើតុល្យភាពរបស់ស៊ែប៊ី រវាងការរក្សាទំនាក់ទំនងជាប្រវត្តិសាស្ត្រជាមួយរុស្ស៊ី និងការពង្រឹងកិច្ចសហប្រតិបត្តិការជាមួយសហភាពអឺរ៉ុប ដែលនៅតែជាដៃគូពាណិជ្ជកម្មដ៏ធំបំផុតរបស់ខ្លួន និងជាដៃគូសន្ទនានយោបាយដ៏សំខាន់៕

ដោយ៖ ឈាង