វិមានក្រឹមឡាំង៖ ពូទីនមិនបានបញ្ជា​ឲ្យ​ធ្វើតេស្ត​នុយក្លេអ៊ែរទេ ទោះ​មាន​ការ​អត្ថាធិប្បាយ​បង្ក​ហេតុ​របស់​ត្រាំ

វិមានក្រឹមឡាំងបាន​ប្រកាស​ថា ប្រធានាធិបតី វ្ល៉ាឌីមៀរ ពូទីន មិនបានបញ្ជា​​​ឲ្យ​មានការសាកល្បងអាវុធនុយក្លេអ៊ែរណាមួយ​ឡើយ ដោយបញ្ជាក់ជាថ្មីពីការប្រកាន់ខ្ជាប់របស់រុស្ស៊ីចំពោះ​ការផ្អាកការសាកល្បងនុយក្លេអ៊ែរ ដែលបានធ្វើឡើងអស់រយៈពេលជាងបីទសវត្សរ៍មកហើយ។

ចេញ​ផ្សាយ​កាល​ពី​ថ្ងៃ​អាទិត្យ​ទី​៩ខែ​វិច្ឆិកា​ឆ្នាំ​២០២៥ សេចក្តីថ្លែងការណ៍នេះបានធ្វើ​ឡើង​​បន្ទាប់​ពី​ប្រធានាធិបតីអាមេរិកលោក ដូណាល់ ត្រាំ បាន​បញ្ជា​ឲ្យ​មន្ទីរបញ្ចកោណ​បន្តការសាកល្បងអាវុធនុយក្លេអ៊ែរឡើងវិញ ដោយ​និយាយ​ថា នេះ​គឺ​«ផ្អែក​លើ​មូលដ្ឋានស្មើ​ភាព​គ្នា»ជាមួយប្រទេសដទៃទៀត។

អ្នកនាំពាក្យវិមានក្រឹមឡាំង លោក Dmitry Peskov បាន​លើក​ឡើង​ថា រុស្ស៊ីនឹងបន្តសង្កេតមើលការផ្អាកនេះ ប៉ុន្តែបានព្រមានថា ទីក្រុងមូស្គូនឹង«បង្ខំ​ឲ្យ​ឆ្លើយតប» ប្រសិនបើទីក្រុងវ៉ាស៊ីនតោន​បន្ត​​ការធ្វើ​តេស្ត​នុយក្លេអ៊ែរ។

លោក Peskov បាននិយាយថា «រុស្ស៊ីនឹងរក្សាការផ្អាករបស់ខ្លួនលើការធ្វើតេស្តអាវុធនុយក្លេអ៊ែរ។ ប៉ុន្តែបើ​អាមេរិក​បំពាន​ការ​​ផ្អាក​អន្តរជាតិ​រយៈពេល​បី​ទសវត្សរ៍​នោះ យើង​នឹង​ត្រូវ​បង្ខំ​ឲ្យ​ឆ្លើយតប​ដើម្បី​រក្សា​សមភាព​យុទ្ធសាស្ត្រ​ជាមួយ​មហាអំណាច​នុយក្លេអ៊ែរ​ផ្សេងទៀត»។

លោកបានបន្ថែមថា ភាពស្មើគ្នានៃនុយក្លេអ៊ែរ នៅតែជា«សមាសធាតុសំខាន់បំផុត»នៃសន្តិសុខពិភពលោក។

លោកត្រាំ​ នៅក្នុងការបង្ហោះលើ​បណ្ដាញ​​សង្គម Truth Social បាន​ប្រាប់​ថា អាមេរិកមានអាវុធនុយក្លេអ៊ែរច្រើនជាងប្រទេសណាណា​ទាំងអស់ ហើយបានអះអាងថា រដ្ឋបាលរបស់លោកបានត្រួតពិនិត្យ «ការធ្វើបច្ចុប្បន្នភាពពេញលេញ និងការជួសជុលឡើងវិញ»នៃឃ្លាំងស្តុកទុកដែលមានស្រាប់។ លោក​បានសរសេរថា ខណៈពេលដែលលោក​«ស្អប់»​ក្នុងការបន្តការសាកល្បងនុយក្លេអ៊ែរ លោក​«គ្មានជម្រើសទេ» ដើម្បីធានាភាពរឹងមាំរបស់សហរដ្ឋអាមេរិកប្រឆាំងនឹងរុស្ស៊ី និងចិន។

នៅក្នុងបទសម្ភាសន៍ដាច់ដោយឡែកមួយដែលត្រូវបានចេញផ្សាយដោយ RIA Novosti រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា ទីក្រុងមូស្គូនៅតែរង់ចាំការឆ្លើយតបពីទីក្រុងវ៉ាស៊ីនតោនលើសំណើមុនរបស់លោកពូទីន ក្នុងការ​រក្សាការបង្កកបរិមាណលើអាវុធនុយក្លេអ៊ែរជាយុទ្ធសាស្ត្រ បន្ទាប់ពី​សន្ធិសញ្ញា New START ផុតកំណត់ក្នុងខែកុម្ភៈ​ឆ្នាំ​២០២៦ខាង​មុខ។

លោក Lavrov បាន​លើក​ឡើង​ថា «យើងត្រូវបានប្រាប់តាមរយៈបណ្តាញការទូតថា បញ្ហានេះកំពុងត្រូវបានពិចារណា។ យើងមិនព្យាយាមបញ្ចុះបញ្ចូលនរណាម្នាក់ទេ។ យើងជឿថា សកម្មភាពរបស់យើងគឺស្ថិតនៅក្នុងផលប្រយោជន៍របស់ភាគីទាំងពីរ និងសហគមន៍អន្តរជាតិទាំងមូល»។

លោក Lavrov បានបន្ថែមថា រុស្ស៊ីនៅតែត្រៀមខ្លួនសម្រាប់«ការអភិវឌ្ឍណាមួយ» ប៉ុន្តែសង្ឃឹមសម្រាប់«លទ្ធផលវិជ្ជមាន»។

សន្ធិសញ្ញា New START ដែលបានចុះហត្ថលេខាក្នុងឆ្នាំ​២០១០ និងបានបន្ត​នៅក្នុងឆ្នាំ២០១៨ បាន​ដាក់​កម្រិត​ប្រទេសទាំងពីរ​ឲ្យ​ដាក់ពង្រាយក្បាលគ្រាប់យុទ្ធសាស្ត្រត្រឹម​ចំនួន១៥៥០​គ្រាប់ និង​ប្រព័ន្ធចែកចាយយុទ្ធសាស្ត្រចំនួន៧០០ប៉ុណ្ណោះ។ ការត្រួតពិនិត្យជាផ្លូវការ ត្រូវបានផ្អាកបន្ទាប់ពីការលុកលុយរបស់រុស្ស៊ីលើអ៊ុយក្រែន ទោះបីជាភាគីទាំងសងខាងបានសង្កេតមើលការកំហិតក្រៅផ្លូវការតាំងពីពេលនោះមកក៏ដោយ។

លោកពូទីន កាលពីខែកញ្ញា បានស្នើបន្តការផ្អាកដោយ​ស្ម័គ្រចិត្តរយៈពេលមួយឆ្នាំទៀត ចាប់ពី​ខែកុម្ភៈ​ឆ្នាំ២០២៥។

រុស្ស៊ី​បាន​ធ្វើ​តេស្ត​នុយក្លេអ៊ែរ​លើក​ចុង​ក្រោយ​ក្នុង​​ឆ្នាំ​១៩៩០ និង​​​​អាមេរិក​​នៅ​ក្នុង​ឆ្នាំ​១៩៩២។ ក្នុងរយៈពេលប៉ុន្មានខែថ្មីៗនេះ ទីក្រុងមូស្គូបានអនុវត្តការសាកល្បង​មីស៊ីល​ដើរ​ដោយថាមពលនុយក្លេអ៊ែរ Burevestnik និង យន្តហោះគ្មានមនុស្សបើកក្រោមទឹក Poseidon ដែលទាំងពីរត្រូវបានរចនាឡើងសម្រាប់ការរារាំងរយៈចម្ងាយឆ្ងាយ៕

ប្រែសម្រួល៖ ឈាង