ផ្ទុះរថយន្តក្នុងទីក្រុងញូវដេលី ប្រទេសឥណ្ឌា សម្លាប់​​មនុស្ស៨នាក់និងរបួស២០នាក់

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១១ខែ វិច្ឆិកា យ៉ាងហោចណាស់មនុស្ស ៨នាក់បានស្លាប់ និង ២០នាក់ផ្សេងទៀតរងរបួសធ្ងន់ធ្ងរនៅក្នុងហេតុការណ៍ផ្ទុះរថយន្តមួយនៅទីក្រុងញូវដេលី ប្រទេស​ឥណ្ឌា។

ការផ្ទុះនេះបានកើតឡើងមុនម៉ោង ៧ យប់ ម៉ោងក្នុងស្រុក នៅចំណុចភ្លើងក្រហមមួយក្នុងផ្លូវកកស្ទះមួយក្បែរស្ថានីយ៍រថភ្លើងក្រោមដី ដោយបានបំផ្លាញយានយន្តនៅក្បែរនោះ និងដុតបំផ្លាញរថយន្តជាច្រើនគ្រឿង រួមមានរថយន្តចំនួន ៦ គ្រឿង និងរ៉ឺម៉កចំនួន ៣ គ្រឿង។

ក្រុមប៉ូលិស និងក្រុមកោសល្យវិច្ច័យបានទៅដល់តំបន់នោះយ៉ាងឆាប់រហ័ស ដោយមានរថយន្តសង្គ្រោះបន្ទាន់ប្រហែល ៣០ ទៅ ៤០ គ្រឿងបានទៅជួយជនរងគ្រោះ។ បើតាមអ្នកស្រុកបានពណ៌នាអំពីការផ្ទុះនេះថា «ខ្លាំងក្លា» ដោយសាក្សីបានរាយការណ៍ពីសំឡេងខ្លាំងៗ និងភាពវឹកវរភ្លាមៗ។

ស្ថានទូតសហរដ្ឋអាមេរិកនៅទីក្រុងញូវដេលីបានចេញសេចក្តីជូនដំណឹងសន្តិសុខ ដោយព្រមានពលរដ្ឋខ្លួនឱ្យជៀសវាងតំបន់នោះផងដែរ។ ជាការឆ្លើយតបអាជ្ញាធរឥណ្ឌាក៏បានដាក់ស្ថានីយ៍រថភ្លើងសំខាន់ៗនៅទូទាំងប្រទេសឥណ្ឌា ឱ្យស្ថិតក្នុងការប្រុងប្រយ័ត្នខ្ពស់។ ទោះយ៉ាងណាចំពោះមូលហេតុនៃការផ្ទុះនៅតែស្ថិតក្រោមការស៊ើបអង្កេតនៅឡើយ ដោយពុំទាន់ដឹងមូលហេតុច្បាស់លាស់នោះទេ។

គួររម្លឹកថា ទីក្រុងញូវដេលីធ្លាប់បានជួបប្រទះការវាយប្រហារពីមុនមក រួមទាំងការបំផ្ទុះគ្រាប់បែកនៅទសវត្សរ៍ឆ្នាំ ១៩៨០ និង ១៩៩០ និងការផ្ទុះកាបូបនៅខាងក្រៅតុលាការជាន់ខ្ពស់ដេលីក្នុងឆ្នាំ ២០១១ ដែលបានសម្លាប់មនុស្សប្រហែលដប់នាក់៕

អត្ថបទ៖ ប៊ុន សុភាព