ព័ត៌មានអន្ដរជាតិ

ផែនការសន្តិភាពថ្មីរបស់លោកត្រាំ អាចជំរុញឲ្យអ៊ុយក្រែនប្រគល់ដីខ្លះទៅរុស្ស៊ី

បានផុស

៨ ខែ មុន

នៅ

ថ្ងៃព្រហស្បតិ៍ ២០ វិច្ឆិកា ២០២៥

ដោយ

Chheang

លោក ដូណាល់ ត្រាំ បានផ្តល់សញ្ញាដល់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ថា ទីក្រុងកៀវប្រហែលជាត្រូវទទួលយកកិច្ចព្រមព្រៀងសន្តិភាពដែលតម្រូវឲ្យខ្លួនបោះបង់ទឹកដីទៅឲ្យរុស្ស៊ី។ នេះបើយោងតាមការចេញផ្សាយដូចៗគ្នានៅក្នុងសារព័ត៌មាន Financial Times, Reuters និង Axios កាលពីថ្ងៃទី១៩ខែវិច្ឆិកាឆ្នាំ២០២៥។

*លោកហ្សេលេនស្គី និងលោកត្រាំ (រូបថត៖ Reuters)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Financial Times បានឲ្យដឹងថា ផែនការដែលកំពុងត្រូវបានពិភាក្សានឹងឃើញអ៊ុយក្រែនប្រគល់ផ្នែកខ្លះនៃតំបន់ដុនបាស (Donbas) ភាគខាងកើត កាត់បន្ថយកងទ័ពរបស់ខ្លួនពាក់កណ្តាល លុបចោលអាវុធសំខាន់ៗ និងកាត់បន្ថយជំនួយយោធាអាមេរិក។ ផែនការនេះក៏ស្នើឲ្យផ្តល់ឋានៈផ្លូវការដល់ភាសារុស្ស៊ី និងផ្តល់ការទទួលស្គាល់ជាផ្លូវការដល់វិហារគ្រិស្តអូស្សូដក់របស់រុស្ស៊ី (Russian Orthodox Church) ផងដែរ។

ចំណែកឯ Axios បានរាយការណ៍ថា ក្រុមការងាររបស់លោកត្រាំ និងមន្ត្រីរុស្ស៊ីបានធ្វើការសម្ងាត់លើផែនការ២៨ចំណុច ដែលត្រូវបានរៀបចំតាមគំរូផែនការបទឈប់បាញ់នៅតំបន់ហ្គាហ្សារបស់លោកត្រាំ។ កិច្ចចរចានេះត្រូវបានដឹកនាំដោយបេសកជនអាមេរិក លោក Steve Witkoff ដែលបានជួបសមភាគីរុស្ស៊ី លោក Kirill Dmitriev ហើយបានផ្តល់សេចក្តីសង្ខេបដល់មន្ត្រីអឺរ៉ុបមួយចំនួន។

មន្ត្រីអ៊ុយក្រែនបានប្រាប់ទីភ្នាក់ងារ Reuters ថា ទីក្រុងកៀវមិនមានតួនាទីក្នុងការតាក់តែងសេចក្តីព្រាងសន្តិភាពនេះទេ គឺបានត្រឹមតែទទួល«ដំណឹង»អំពីវាប៉ុណ្ណោះ។

កន្លងមក កិច្ចព្រមព្រៀងដែលបានលើកឡើង តែងប្រឈមមុខនឹងឧបសគ្គធំៗ ខណៈទីក្រុងមូស្គូបន្តទាមទារឲ្យអ៊ុយក្រែនបោះបង់ចោលការប៉ុនប៉ងចូលរួមអង្គការណាតូ និងដកកងកម្លាំងចេញពីតំបន់ចំនួនបួនដែលរុស្ស៊ីទាមទារ ដែលជាលក្ខខណ្ឌដែលទីក្រុងកៀវបដិសេធដាច់អហង្ការ។

សូមជម្រាបថា មិនមានការចរចាដោយផ្ទាល់រវាងទីក្រុងកៀវ និងទីក្រុងមូស្គូទេ ចាប់តាំងពីកិច្ចប្រជុំនៅអ៊ីស្តង់ប៊ូលកាលពីខែកក្កដា ហើយបច្ចុប្បន្នរុស្ស៊ីកំពុងគ្រប់គ្រងប្រហែល១៩%នៃទឹកដីអ៊ុយក្រែន៕

ប្រែសម្រួល៖ ឈាង