ផ្ទុះជំងឺអាសន្នរោគនៅព្រំដែនឥណ្ឌា-មីយ៉ាន់ម៉ា សម្លាប់មនុស្ស៩នាក់ និងបង្ខំឲ្យបិទព្រំដែនពីរខែ

ការផ្ទុះឡើងនៃជំងឺអាសន្នរោគនៅរដ្ឋ Mizoram ជិតព្រំដែនឥណ្ឌា-មីយ៉ាន់ម៉ា បានសម្លាប់មនុស្សប្រាំបួននាក់ចាប់តាំងពីថ្ងៃទី ៤ ខែវិច្ឆិកា និងបង្កឲ្យមានការបិទព្រំដែនរយៈពេល២ខែ។ នេះបើយោងតាមការចេញផ្សាយរបស់សារព័ត៌មាន Mizzima នៅថ្ងៃទី២១ខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំងឺនេះត្រូវបានរកឃើញជាលើកដំបូងនៅក្នុងភូមិKakhi ដោយមានមនុស្សប្រហែល៩០ នាក់បានធ្លាក់ខ្លួនឈឺ។ អ្នកជំងឺមួយចំនួននៅតែស្ថិតក្នុងស្ថានភាពធ្ងន់ធ្ងរនៅឡើយ។

ដោយសារតែជំងឺនេះកំពុងរីករាលដាល អាជ្ញាធរបានបិទព្រំដែនរយៈពេលពីរខែចាប់ពីថ្ងៃទី ១៣ ខែវិច្ឆិកាតទៅរហូតគ្រប់២ខែ។ ភូមិKakhi នេះត្រូវបានដាក់ជា «តំបន់ទប់ស្កាត់» មានន័យថាមនុស្សមិនអាចចេញចូល ឬធ្វើអន្តរកម្មជាមួយសហគមន៍នៅក្នុងប្រទេសមីយ៉ាន់ម៉ាបានទេ ខណៈបុគ្គលិកសុខាភិបាលកំពុងធ្វើតេស្តប្រភពទឹកដើម្បីស្វែងរកមូលហេតុនៃការផ្ទុះឡើងជំងឺនេះ។

ការបិទព្រំដែនក៏កំពុងប៉ះពាល់ដល់ភូមិក្បែរៗជាច្រើន ហើយអាចបណ្តាលឱ្យមានការខ្វះខាតស្បៀងអាហារនៅក្នុងប្រទេសមីយ៉ាន់ម៉ា ដែលពឹងផ្អែកលើទំនិញមកពីរដ្ឋMizoram ។ នៅKakhi គ្រួសារខ្លះកំពុងខ្វះខាតស្បៀងអាហាររួចទៅហើយ ហើយមនុស្សជាច្រើនមិនអាចធ្វើការបានដោយសារតែការបិទច្រកព្រំដែន។

ថ្នាក់ដឹកនាំភូមិបានស្នើសុំឱ្យថ្នាក់ស្រុក និងអ្នកបរិច្ចាគជួយជាបន្ទាន់ជាមួយនឹងស្បៀងអាហារ និងថ្នាំពេទ្យ ខណៈភូមិនេះមានប្រជាជនជាង ៨០០ នាក់ រួមទាំងជនភៀសខ្លួនជាច្រើនមកពីក្រុង Paletwa ប្រទេសមីយ៉ាន់ម៉ាផងដែរ៕

អត្ថបទ៖ ប៊ុន សុភាព