ប្រយ័ត្ន! ងូតទឹកពេលយប់ក្នុងខែរងា ប្រឈមដាច់សរសៃឈាមខួរក្បាល

ជារឿងគួរឲ្យយកចិត្តទុកដាក់និងប្រុងប្រយ័ត្នខ្ពស់ ព្រោះថា នៅប្រទេសវៀតណាម កាលពីខែរងាឆ្នាំមុន មានមនុស្សដាច់សរសៃឈាមខួរក្បាលស្លាប់ ក្នុងកម្រិតគួរឲ្យបារម្ភ ដោយសារការងូតទឹកពេលយប់ អំឡុងអាកាសធាតុចុះត្រជាក់។

តាមការផ្សាយរបស់គេហទំព័រ NBTV, ត្រឹមមួយខែធ្នូកាលពីឆ្នាំ២០២៤ មន្ទីរពេទ្យយោធា១០៨នៃប្រទេសវៀតណាម បានកត់ត្រាពីការកើនឡើងនៃអ្នកជំងឺដាច់សរសៃឈាមខួរក្បាល ១០-១៥%ក្នុងខែរងា បើប្រៀបធៀបនឹងខែធម្មតា។ យ៉ាងណា មិនទាន់មានរបាយការណ៍ក្នុងឆ្នាំនេះនៅឡើយទេ។

វេជ្ជបណ្ឌិត Nguyen Ngoc Uyen ផ្នែកសង្គ្រោះបន្ទាន់នៅមន្ទីរពេទ្យបានឲ្យដឹងថា អាកាសធាតុត្រជាក់ ធ្វើឲ្យសរសៃឈាមរួមតូច នាំឲ្យឡើងសម្ពាធឈាម និងបង្កើនហានិភ័យនៃការកកឈាម ឈានដល់ការដាច់សរសៃឈាមខួរក្បាល។ ដូច្នេះហើយ វេជ្ជបណ្ឌិតបានណែនាំឲ្យអ្នកមានទម្លាប់ងូតទឹកពេលយប់ ត្រូវលាយទឹកក្តៅងូត ចៀសវាងការងូតទឹកត្រជាក់ ឬពេលងូត សូមកុំងូតពីក្បាលទៅមុន។

នេះជាអ្វីដែលត្រូវយកចិត្តទុកដាក់ ព្រោះឥឡូវអាកាសធាតុក្នុងប្រទេសកម្ពុជា បានចាប់ផ្តើមចុះត្រជាក់ខ្លាំងហើយ។

លើសពីនេះ វិជ្ជបណ្ឌិត ក៏ព្រមានពីការទទួលទានគ្រឿងស្រវឹងនិងជក់បារីលើសកម្រិតក្នុងរដូវរងាផងដែរ ព្រោះវាបង្កហានិភ័យនៃជំងឺគាំងបេះដូចនិងដាច់សរសៃឈាមខួរក្បាល៕

អត្ថបទ៖ សុខ សុវណ្ណ