កាសែតថៃ The Nation ផ្សាយថាមានករណីជនជាតិចិន​ដើរជាន់មីនតាមព្រំដែនកម្ពុជា-ថៃ

កាសែតថៃ The Nation នៅរសៀលថ្ងៃសៅរិ៍នេះ បានរាយការណ៍ពីករណីបុរសជនជាតិចិនម្នាក់ ដើរជាន់មីន​នៅក្នុងព្រៃមួយកន្លែងក្បែរចម្ការមីនមិនទាន់ផ្ទុះ​ តាមបណ្តោយព្រំដែនថៃ-កម្ពុជា ក្នុង «ភូមិបានណងចាន់ ខេត្តស្រះកែវ» កាលពីម៉ោងជិត ៦ ព្រឹក ថ្ងៃសៅរ៍នេះ។

កងកម្លាំង​ប៊ូរ៉ាផា ដែលទទួលបន្ទុកកិច្ចការយោធាក្នុងខេត្តស្រះកែវ បានបញ្ជូនបុរសរងគ្រោះរូបនោះ ​ទៅមន្ទីរពេទ្យស្រុក Khok Sung នៃខេត្តស្រះកែវ ​ខណៈនគរបាលអន្តោប្រវេសន៍ខេត្តស្រះកែវកំពុងស៊ើបអង្កេតករណីនេះ ដោយជឿថា បុរសដដែលដើរជាន់មីននៅពេលព្យាយាមឆ្លងដែនដោយខុសច្បាប់ចូលទៅក្នុងប្រទេសថៃ។ ​

ថាតើមីនដែលផ្ទុះនោះ ជាយុទ្ធភណ្ឌមិនទាន់ផ្ទុះបន្សល់ទុកពីជំនាន់ដើម ឬយ៉ាងណាទេ ថៃមិនទាន់បកស្រាយយ៉ាងណានោះទេ។

យ៉ាងណាមិញ គួររំឭកថា នេះគឺជាករណីជាន់មីនចុងក្រោយបង្អស់ ដែលកើតឡើងចំពេលថៃ និងកម្ពុជា មានភាពតានតឹងព្រំដែន។ រាប់តាំងពីខែកក្កដាមក យោធាថៃបានរាយការណ៍ជាច្រើនដងរួចហើយពីករណីយោធារបស់ខ្លួនដើរជាន់មីនក្នុងអំឡុងពេលល្បាតតាមព្រំដែន ដោយ​ចោទប្រកាន់កម្ពុជាជាអ្នកបង្កប់មីននោះថ្មីៗ ​ដោយ​បង្ហាញភស្តុតាងដែលគ្មានការឆ្លងកាត់ការស៊ើបអង្កេត​អព្យាក្រឹតពីភាគីអន្តរជាតិ រួមទាំងកម្ពុជា។ កម្ពុជា ដែលទាមទារឱ្យ​មាន​ការស៊ើនអង្កេតជាអន្តរជាតិ​ បាន​ច្រានចោលការចោទប្រកាន់របស់ថៃយ៉ាងដាច់អហង្ការ ដោយនិយាយថា យោធាថៃអាចរំលោភលើដែនអធិបតេយ្យភាពរបស់កម្ពុជា ដោយដើរជាន់មីនដែលបន្សល់ទុកពីសម័យសង្រ្គាម៕