ព័ត៌មានអន្ដរជាតិ

លោកត្រាំឲ្យលោកម៉ាឌូរ៉ូ លាលែង ហើយនាំគ្រួសារវេចបង្វេចរត់ចេញពីវ៉េណេស៊ុយអេឡា

បានផុស

៧ ខែ មុន

នៅ

ថ្ងៃចន្ទ ១ ធ្នូ ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានចេញឱសានវាទដោយត្រង់ៗទៅកាន់មេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ ក្នុងអំឡុងពេលហៅទូរសព្ទថ្មីៗ ដោយប្រាប់លោកឲ្យលាលែងពីតំណែង និងចាកចេញពីប្រទេស បើមិនដូច្នេះទេនឹងប្រឈមមុខនឹងផលវិបាកមិនខាន។ នេះបើយោងតាមការរាយការណ៍របស់ Miami Herald និង New York Times ដែលដកស្រង់ប្រភពដែលដឹងពីការសន្ទនានោះ។

*លោកត្រាំ និងលោកម៉ាឌូរ៉ូ (រូបថត៖ Reuters)*

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ លោកម៉ាឌូរ៉ូ បានស្នើសុំរក្សាការគ្រប់គ្រងកងកម្លាំងប្រដាប់អាវុធរបស់វ៉េណេស៊ុយអេឡា ហើយបានស្វែងរកការលើកលែងទោសជាសកលសម្រាប់រូបលោក និងគ្នីគ្នារបស់លោក ជាថ្នូរនឹងការអនុញ្ញាតឲ្យមានការបោះឆ្នោតដោយសេរីក្នុងប្រទេស។ កាសែត Herald បានរាយការណ៍ថា លោកត្រាំ បានប្រាប់មេដឹកនាំវ៉េណេស៊ុយអេឡាថា លោកម៉ាឌូរ៉ូអាច«ជួយសង្គ្រោះខ្លួនឯង និងអ្នកដែលនៅជិតស្និទ្ធនឹងលោកបំផុតបាន ប៉ុន្តែលោកត្រូវតែចាកចេញពីប្រទេសឥឡូវនេះ»។

របាយការណ៍ដដែល បានបញ្ជាក់ទៀតថា ការផ្តល់ជូនច្រកចេញប្រកបដោយសុវត្ថិភាពនេះគឺសម្រាប់តែលោកម៉ាឌូរ៉ូ ភរិយារបស់លោកគឺលោកស្រី Cilia Flores និងកូនប្រុសរបស់ពួកគេប៉ុណ្ណោះ។ យ៉ាងណាមិញ ការស្នើសុំលើកលែងទោស និងការចង់នៅគ្រប់គ្រងកងកម្លាំងដែលជាសំណូមពររបស់លោកម៉ាឌូរ៉ូ ត្រូវបានលោកត្រាំបដិសេធ។

ការហៅទូរសព្ទនេះ ដែលត្រូវបានរាយការណ៍ថាបានកើតឡើងនៅពាក់កណ្តាលខែវិច្ឆិកា បានបញ្ចប់ទៅដោយគ្មានការព្រមព្រៀងគ្នានោះឡើយ។ ក្រោយមក លោកត្រាំ បានបញ្ជាឲ្យបិទដែនអាកាសរបស់អាមេរិកជុំវិញប្រទេសវ៉េណេស៊ុយអេឡា ហើយបានព្រមានថា ប្រតិបត្តិការយោធាតាមដីគោកនឹងចាប់ផ្តើម«ឆាប់ៗនេះ»។ នាវាផ្ទុកយន្តហោះ USS Gerald R. Ford និងអង្គភាពបេសកកម្មម៉ារីនប្រមាណ១៥០០០នាក់នៅតែឈរជើងនៅឯនាយសមុទ្រក្នុងតំបន់ការ៉ាប៊ីន។

អាមេរិកបានធ្វើការវាយប្រហារយ៉ាងតិច២១ដងទៅលើនាវាដែលសង្ស័យថាជួញដូរគ្រឿងញៀននៅសមុទ្រការ៉ាប៊ីនចាប់តាំងពីខែកញ្ញាមក ដោយសម្លាប់មនុស្សអស់ជាង៨០នាក់។

សូមជម្រាបថា ជម្លោះកើតឡើង ខណៈដែលទីក្រុងវ៉ាស៊ីនតោនចោទប្រកាន់ថា ក្រុមភេរវករគ្រឿងញៀន «Cartel de los Soles» ត្រូវបានដឹកនាំដោយលោកម៉ាឌូរ៉ូ និងមន្ត្រីកំពូលៗរបស់លោក ដែលជាការអះអាងមួយដែលវ៉េណេស៊ុយអេឡាបាន«ច្រានចោលយ៉ាងដាច់អហង្ការ»។ លោកម៉ាឌូរ៉ូ និងសម្ព័ន្ធមិត្ត បានថ្កោលទោសយុទ្ធនាការដាក់សម្ពាធរបស់អាមេរិកថាជា «ការឈ្លានពានបែបអាណានិគម» ដោយចោទទីក្រុងវ៉ាស៊ីនតោនថាគ្រាន់តែចង់គ្រប់គ្រងទុនបម្រុងប្រេងដ៏ធំរបស់វ៉េណេស៊ុយអេឡាប៉ុណ្ណោះ៕

ប្រែសម្រួល៖ ឈាង