វ៉េណេស៊ុយអេឡារិះគន់«ការគំរាមកំហែងបែបអាណានិគម»របស់លោកត្រាំ បន្ទាប់ពីការព្រមានដែនអាកាស

វ៉េណេស៊ុយអេឡាបានថ្កោលទោសលោក ដូណាល់ ត្រាំ កាលពីថ្ងៃសៅរ៍​ទី​២៩​ខែ​វិច្ឆិកា​ឆ្នាំ​២០២៥​ បន្ទាប់ពីប្រធានាធិបតីអាមេរិក​រូប​នេះ​បានជំរុញ​ឲ្យក្រុមហ៊ុនអាកាសចរណ៍​​នានា​ចាត់ទុកដែនអាកាសរបស់​វ៉េណេស៊ុយអេឡា​ថាជាដែនអាកាស​«បិទ» ដោយហៅការលើកឡើងនេះថាជាអំពើឈ្លានពាន «បែបអាណានិគម» និង «ខុសច្បាប់»។

យោង​តាម BBC សាររបស់លោកត្រាំ​​នៅលើបណ្តាញសង្គម Truth Social បានកើតឡើងចំពេលដែលមានការពង្រឹងកម្លាំងយោធាអាមេរិកយ៉ាងសំខាន់នៅក្នុងតំបន់ការីប៊ីន រួមទាំងការដាក់ពង្រាយនាវា USS Gerald Ford និងកងទ័ពប្រហែល១៥០០០នាក់។ ក្រុង​វ៉ាស៊ីនតោននិយាយថា បេសកកម្មនេះមានគោលដៅប្រឆាំងការជួញដូរគ្រឿងញៀន ខណៈក្រុងការ៉ាកាស​លើក​ឡើង​ថា នេះគឺជាលេសដើម្បីផ្តួលរំលំប្រធានាធិបតី Nicolás Maduro។

ប្រទេសវ៉េណេស៊ុយអេឡាបានអះអាង​ថា សហរដ្ឋអាមេរិកគ្មានសិទ្ធិអំណាចក្នុងការបិទដែនអាកាសរបស់ប្រទេសផ្សេងទេ ហើយបានចោទប្រកាន់វ៉ាស៊ីនតោនថាបានបង្កើនភាពតានតឹង បន្ទាប់ពីទីភ្នាក់ងាររដ្ឋបាលអាកាសចរណ៍សហព័ន្ធ បានព្រមានអំពីសកម្មភាពយោធាកើនឡើងនៅជុំវិញប្រទេសនេះ។

លោកត្រាំ បានបង្ហើបថា ប្រតិបត្តិការរបស់​អាមេរិក «តាមផ្លូវគោក» នឹងចាប់ផ្តើមក្នុងពេលឆាប់ៗនេះ។ កងកម្លាំងអាមេរិក​ប្រាប់​ថា ពួកគេបានវាយប្រហារទូកយ៉ាងតិច២១គ្រឿងដែលត្រូវបានគេអះអាងថាដឹកគ្រឿងញៀន ដោយសម្លាប់មនុស្សជាង៨០នាក់ ទោះបីជាគ្មានភស្តុតាងណាមួយត្រូវបានបញ្ចេញក៏ដោយ។

ជម្លោះនេះកើតឡើង ខណៈដែលទីក្រុងវ៉ាស៊ីនតោនចោទ​ប្រកាន់​​ថា ក្រុម​ភេរវករ​គ្រឿងញៀន «Cartel de los Soles» ត្រូវ​បាន​ដឹកនាំដោយលោក Maduro និងមន្ត្រីកំពូល​របស់​លោក ដែលជាការអះអាងមួយដែលវ៉េណេស៊ុយអេឡាបាន​«ច្រានចោលយ៉ាង​ដាច់​អហង្ការ»៕

ប្រែសម្រួល៖ ឈាង