ព័ត៌មានជាតិ

ប្រធានាធិបតីអាមេរិក ជំរុញឲ្យថៃនិងកម្ពុជាគោរពបទឈប់បាញ់ឲ្យបានពេញលេញ

បានផុស

៧ ខែ មុន

នៅ

ថ្ងៃអង្គារ ៩ ធ្នូ ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) រំពឹងថាកម្ពុជានិងថៃនឹងគោរពយ៉ាងពេញលេញនូវការប្តេជ្ញាចិត្តរបស់ពួកគេសម្រាប់បទឈប់បាញ់ និងកិច្ចព្រមព្រៀងសន្តិភាព បន្ទាប់ពីការប៉ះទង្គិចគ្នាយ៉ាងនៅតាមព្រំដែនដែលមានជម្លោះរបស់ពួកគេ។ នេះបើយោងទីភ្នាក់ងារព័ត៌មានតួកគី Anadolu ដែលបានស្រង់សម្តីមន្ត្រីរដ្ឋបាលជាន់ខ្ពស់រដ្ឋបាលរបស់លោក ត្រាំ។

ការចុះហត្ថលេខាសន្តិភាពរវាងកម្ពុជានិងថៃក្រោមវត្តមានរបស់លោក ត្រាំ។ REUTERS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍នោះ មន្ត្រីរូបនោះដែលបាននិយាយក្នុងលក្ខខណ្ឌសុំមិនបញ្ចេញឈ្មោះថា៖«ប្រធានាធិបតី ត្រាំ ប្តេជ្ញាបន្តបញ្ឈប់អំពើហិង្សា ហើយរំពឹងថារដ្ឋាភិបាលកម្ពុជា និងថៃនឹងគោរពយ៉ាងពេញលេញនូវការប្តេជ្ញាចិត្តរបស់ពួកគេក្នុងការបញ្ចប់ជម្លោះនេះ»។

សេចក្តីថ្លែងការណ៍នេះបានធ្វើឡើងនៅពេលដែលប្រទេសថៃបានចាប់ផ្តើមការវាយប្រហារតាមផ្លូវអាកាសកាលពីព្រឹកថ្ងៃចន្ទ ជាពេលដែលយោធាថៃបានចាប់ផ្តើមវាយប្រហារមកលើកងទ័ពកម្ពុជាដោយប្រើប្រាស់អាវុធស្ទើរតែគ្រប់ធន់ រួមទាំងយន្តហោះចម្បាំង F-16 ដោយការបង្កើនការវាយប្រហារតាមផ្លូវអាកាសជាច្រើនទីតាំង។

ក្នុងការវាយប្រហាររបស់ថៃ យោធាថៃបានវាយប្រហារមិនត្រឹមតែទីតាំងយោធារបស់កម្ពុជាប៉ុណ្ណោះទេ ប៉ុន្តែសំដៅលើហេដ្ឋារចនាសម្ព័ន្ធស៊ីវិល ទីកន្លែងរស់នៅរបស់ប្រជាជនកម្ពុជា តំបន់បេតិកភ័ណ្ឌពិភពលោក គឺប្រាសាទព្រះវិហារ និង តំបន់ប្រវត្តិសាស្រ្តផ្សេងៗទៀត មានការបំផ្លាញប្រាសាទតាក្របីជាដើម។

លើសពីនោះ យោធាថៃបានពង្រីកតំបន់ប្រយុទ្ធទៅកាន់ខេត្តជាច្រើន ក្រៅពីខេត្តព្រះវិហារ ទៅកាន់ខេត្តជាប់ព្រំដែន ដូចជា ខេត្តឧត្តរមានជ័យ បន្ទាយមានជ័យ ពោធិសាត់ជាដើម៕

រ៉ាន់ រើយ