ព័ត៌មានអន្ដរជាតិ

ខណៈយោធាថៃកំពុងឈ្លានពានកម្ពុជា សភាថៃបើកផ្លូវឲ្យធ្វើវិសោធនកម្មរដ្ឋធម្មនុញ្ញ

បានផុស

៧ ខែ មុន

នៅ

ថ្ងៃពុធ ១០ ធ្នូ ២០២៥

ដោយ

របបស្តេចថៃ និងយោធានិយមរបស់ថៃ ត្រូវតែធ្វើកែទម្រង់តាមការចង់បានរបស់គណបក្សប្រជាជនថៃ និងគណបក្សភឿថៃ ដែលគណបក្សទាំងពីរនោះធ្លាប់រងគ្រោះដោយសាររដ្ឋធម្មនុញ្ញលម្អៀងទៅរករបបរាជនិយមនិងក្រុមយោធា ដែលតាក់តែងឡើងក្នុងឆ្នាំ២០១៧ ក្រោមកណ្តាប់ដៃក្រុមយោធានៅពីក្រោមឥទ្ធិពលរបស់ស្តេចថៃ។

ប្រធានសភាថៃ Wan Muhamad Noor Matha និង ប្រធានគណបក្សប្រជាជន លោក Natthapong Ruengpanyawut។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណបក្សប្រជាជនថៃ ដឹកនាំដោយ លោក Natthapong Ruengpanyawut ដែលគាំទ្រឲ្យលោក អានុទីន ឆានវីរៈគុល ឲ្យឡើងកាន់អំណាចកាលពីដើមខែកញ្ញា បានដាក់លក្ខខណ្ឌឲ្យលោក អានុទីន ដឹកនាំរដ្ឋាភិបាលសំឡេងភាគតិចដើម្បីធ្វើកែប្រែរដ្ឋធម្មនុញ្ញដែលត្រូវបានចោទប្រកាន់ថា លម្អៀងទៅរករបបរាជានិយម និង ក្រុមយោធា ជ្រុលហួសហេតុ។

គណបក្សប្រជាជនថៃ ដែលកើតចេញពីគណបក្សឆ្ពោះទៅមុខ (Move Forward Party) បានឈ្នះការបោះឆ្នោតកាលខែឧសភាឆ្នាំ២០២៣ ប៉ុន្តែមិនបានឡើងកាន់អំណាចដឹកនាំរដ្ឋាភិបាលនោះទេ ដោយក្រុមព្រឹទ្ធសភានិយមយោធាបានបោះឆ្នោតជំទាស់បេក្ខភាពនាយករដ្ឋមន្ត្រីមកពីគណបក្សនេះ ដោយចោទប្រកាន់ក្នុងសំណុំរឿងប្រមាថព្រះមហាក្សត្រ ដោយសារតែការប៉ុនប៉ងធ្វើវិសោធនកម្មរដ្ឋធម្មនុញ្ញ។

ក្រោយការរារាំងបេក្ខជននាយករដ្ឋមន្ត្រីពីគណបក្សដែលប្រមូលផ្តុំដោយយុវជន និងជាអ្នកកែទម្រង់និយម តុលាការធម្មនុញ្ញថៃក៏បានរំលាយគណបក្សនេះចោលទៀតកាលពីខែសីហាឆ្នាំ២០២៤។

តាមសេចក្តីរាយការណ៍របស់ The Standard សម័យប្រជុំសភាថៃបានអនុម័តដោយសំឡេង ៣២៨ទល់នឹង២៦៦ ដែលបើកផ្លូវឲ្យធ្វើវិសោធនកម្មរដ្ឋធម្មនុញ្ញ។ ការបោះឆ្នោតនៅសភាថៃថ្ងៃទី១០ខែធ្នូនេះ កំណត់ការបង្កើតគណៈកម្មាធិការតាក់តែងរដ្ឋធម្មនុញ្ញ និងគណៈកម្មាធិការពិគ្រោះយោបល់សាធារណៈ ដែលគណៈកម្មាធិការនីមួយៗមានសមាជិក ៣៥ រូប។

មិនត្រឹមតែគណបក្សប្រជាជនថៃធ្លាប់រងគ្រោះដោយសារតែក្រុមយោធាថៃ និងអំណាចរាជានិយមថៃ សូម្បីគណបក្សភឿថៃរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រ ក៏តែងតែរងគ្រោះដោយសារក្រុមយោធាធ្វើរដ្ឋប្រហារក្នុងឆ្នាំ២០០៦ និងឆ្នាំ២០១៤ និង ការរារាំងមិនឲ្យកាន់អំណាចក្នុងឆ្នាំ២០១៩ ពេលដែលខ្លួនឈ្នះការបោះឆ្នោត។

ក្នុងរយៈពេលចុងក្រោយនេះ នយោបាយថៃកាន់តែបែកបាក់កាន់តែខ្លាំង បន្ទាប់ពីនាយករដ្ឋមន្ត្រី អានុទីន ឆានវីរៈគុល (Anutin Charnvirakul) ដែលនឹងឡើងកាន់អំណាចត្រឹម៤ខែនោះ បានជំរុញឲ្យមានជម្លោះកើនឡើងជាមួយកម្ពុជា និង បង្កើនអរិភាពជាមួយមហាអំណាច សូម្បីសហរដ្ឋអាមេរិក។

លោក Natthapong Ruengpanyawut មេដឹកនាំគណបក្សប្រជាជនថៃ ដែលជាបក្សប្រឆាំងដ៏មានប្រជាប្រិយភាព បានព្រមានថា ការបដិសេធរបស់លោកនាយករដ្ឋមន្ត្រី អានុទីន ឆានវីរៈគុល ក្នុងការបន្តការចរចាសន្តិភាពជាមួយកម្ពុជា គឺជាជំហរដ៏គ្រោះថ្នាក់របស់ប្រទេសថៃ។

ជម្លោះនយោបាយក្នុងប្រទេសថៃ បានធ្វើឲ្យប្រទេសនេះប្តូរនាយករដ្ឋមន្ត្រីរហូតដល់ទៅ៣ក្នុងរយៈពេលមិនដល់៣ឆ្នាំ ហើយ កាន់តែធ្ងន់ធ្ងរបំផុតគឺ ជម្លោះនយោបាយថៃ បានពង្រីកជម្លោះមកកាន់ព្រំដែនកម្ពុជា រហូតដល់បង្កសង្គ្រាមផ្ទុះអាវុធរហូតដល់ទៅពីរលើករួមទាំងលើកនេះផង៕

រ៉ាន់ រើយ