ព័ត៌មានអន្ដរជាតិ

វៀតណាម-ហ្វីលីពីន លើកយកបញ្ហាជម្លោះព្រំដែនកម្ពុជា-ថៃ ទៅពិភាក្សាគ្នា

បានផុស

៧ ខែ មុន

នៅ

ថ្ងៃអង្គារ ១៦ ធ្នូ ២០២៥

ដោយ

Chheang

ប្រទេសវៀតណាម និងហ្វីលីពីន បានសម្តែងការព្រួយបារម្ភចំពោះភាពតានតឹងដែលកើនឡើងនៅតាមព្រំដែនកម្ពុជា-ថៃ ដោយអំពាវនាវដល់គ្រប់ភាគីទាំងអស់ឲ្យមានការអត់ធ្មត់ និងដោះស្រាយភាពចម្រូងចម្រាសតាមរយៈកិច្ចសន្ទនា និងច្បាប់អន្តរជាតិ។

រដ្ឋមន្ត្រីការបរទេសវៀតណាម ក្នុងការហៅទូរសព្ទជាមួយហ្វីលីពីនថ្ងៃទី១៥ធ្នូ២០២៥។ រូបថត៖ VNA/VNS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Viet Nam News ការអំពាវនាវនេះបានធ្វើឡើងកាលពីថ្ងៃទី១៥ខែធ្នូឆ្នាំ២០២៥ ក្នុងអំឡុងកិច្ចសន្ទនាតាមទូរសព្ទរវាងរដ្ឋមន្ត្រីការបរទេសវៀតណាម លោក Lê Hoài Trung និងសមភាគីហ្វីលីពីន លោកស្រី Maria Theresa Lazaro ខណៈដែលការប្រយុទ្ធគ្នារវាងកងទ័ពកម្ពុជា-ថៃនៅតែបន្តកើតមាន ទោះបីជាមានកិច្ចប្រឹងប្រែងក្នុងតំបន់ និងអន្តរជាតិដើម្បីបន្ថយភាពតានតឹងក៏ដោយ។

ក្រសួងការបរទេសវៀតណាមបាននិយាយក្នុងសេចក្តីថ្លែងការណ៍មួយថា រដ្ឋមន្ត្រីទាំងពីរបានសង្កត់ធ្ងន់លើសារៈសំខាន់នៃការជៀសវាងកុំឲ្យមានការកើនឡើងបន្ថែមទៀត និងការធានាសុវត្ថិភាពជនស៊ីវិល ដោយគូសបញ្ជាក់ពីតម្រូវការសម្រាប់ដំណោះស្រាយដោយសន្តិវិធីស្របតាមកិច្ចព្រមព្រៀង និងយន្តការក្នុងតំបន់ដែលមានស្រាប់។

ពួកគេបានអះអាងជាថ្មីនូវតួនាទីរបស់អាស៊ានក្នុងការគ្រប់គ្រងបញ្ហាប្រឈមផ្នែកសន្តិសុខក្នុងតំបន់ និងបានយល់ព្រមថា កិច្ចសន្ទនាដែលបន្តគឺចាំបាច់ដើម្បីរក្សាស្ថិរភាពនៅអាស៊ីអាគ្នេយ៍ ជាពិសេសនៅពេលដែលប្លុកនេះកំពុងប្រឈមមុខនឹងវិបត្តិសន្តិសុខផ្ទៃក្នុងដ៏ធ្ងន់ធ្ងរបំផុតមួយក្នុងប៉ុន្មានឆ្នាំថ្មីៗនេះ។

ភាគីទាំងពីរក៏បានប្តេជ្ញាសម្របសម្រួលយ៉ាងជិតស្និទ្ធនៅក្នុងក្របខ័ណ្ឌអាស៊ាន និងនៅវេទិកាអន្តរជាតិ ដោយព្រួយបារម្ភថា ការប្រយុទ្ធគ្នាដែលអូសបន្លាយតាមព្រំដែនជម្លោះអាចធ្វើឲ្យប៉ះពាល់ដល់សន្តិភាព និងស្ថិរភាពសេដ្ឋកិច្ចក្នុងតំបន់។

វៀតណាមបានលើកឡើងថា ខ្លួនត្រៀមរួចជាស្រេចដើម្បីធ្វើការជាមួយហ្វីលីពីន ដែលនឹងឡើងធ្វើជាប្រធានអាស៊ាននៅឆ្នាំ២០២៦ និងរដ្ឋសមាជិកផ្សេងទៀត ដើម្បីគាំទ្រកិច្ចខិតខំប្រឹងប្រែងបន្ថយភាពតានតឹង និងរក្សាឯកភាព និងមជ្ឈភាពអាស៊ាន៕

ប្រែសម្រួល៖ ឈាង