អនុ​ប្រធាន EU ជម្រុញឲ្យកម្ពុជា-ថៃមានបទឈប់បាញ់ជាបន្ទាន់ និងផ្តល់ការតាមដានតាមរយៈផ្កាយរណប

សហភាពអឺរ៉ុប (EU) បានអំពាវនាវឲ្យមានបទឈប់បាញ់ជាបន្ទាន់រវាងប្រទេសកម្ពុជា និង​ថៃ ដោយព្រមានថា ជម្លោះនេះមិនត្រូវអនុញ្ញាត​ឲ្យ​រីករាលដាលបន្តទៀតនោះទេ។

លោកស្រី Kaja Kallas អនុប្រធានគណៈកម្មការអឺរ៉ុប និង​ជា​តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ បានបង្ហោះ​សារ​នៅ​លើ​បណ្ដាញ​សង្គម X កាល​ពី​ថ្ងៃ​ទី​១៧​ខែធ្នូ​ឆ្នាំ​២០២៥​ថា លោកស្រីបានបញ្ជូនសារនេះដោយផ្ទាល់ទៅកាន់រដ្ឋមន្ត្រីការបរទេសនៃប្រទេសទាំងពីរ ដោយសង្កត់ធ្ងន់លើតម្រូវការក្នុងការបញ្ចប់វដ្តនៃអំពើហិង្សា និងការស្តារឡើងវិញនូវភាពស្ងប់ស្ងាត់។

លោកស្រី Kallas បានបញ្ជាក់ថា «បទឈប់បាញ់ត្រូវតែត្រូវបានស្តារឡើងវិញជាបន្ទាន់» ដោយលោកស្រីបានបន្ថែមថា សហភាពអឺរ៉ុបត្រៀមខ្លួនជាស្រេចក្នុងការជួយដល់កិច្ចខិតខំប្រឹងប្រែងកាត់បន្ថយភាពតានតឹង។

លោកស្រីបានបន្តថា ប្លុកអឺរ៉ុបអាចផ្តល់នូវរូបភាពពីផ្កាយរណប ដើម្បីគាំទ្រដល់ការតាមដានបទឈប់បាញ់ ដោយបញ្ជាក់ពីការប្តេជ្ញាចិត្តរបស់សហភាពអឺរ៉ុបក្នុងការដើរតួនាទីជាក់ស្តែង ដើម្បីបង្ការការប៉ះទង្គិចគ្នាបន្ថែមទៀតនៅតាមបណ្តោយព្រំដែន។

លោកស្រី Kallas បានលើកឡើងថា លោកស្រីនឹងបន្តការចូលរួមជាមួយភាគីទាំងពីរ ដើម្បីជួយបញ្ឈប់ការរីករាលដាលនៃជម្លោះ និងគាំទ្រដល់កិច្ចខិតខំប្រឹងប្រែងឆ្ពោះទៅរកស្ថិរភាពក្នុងតំបន់៕

ប្រែសម្រួល៖ ឈាង