ក្រុងហាត់យ៉ៃ ត្រូវការពេល ១-២ ខែ ដើម្បីស្ដារឡើងវិញ ​ពីទឹកជំនន់ភាគខាងត្បូងថៃប៉៉ុន្មាន​សប្ដាហ៍មុន

វិស័យទេសចរណ៍នៅទីក្រុង ហាតយ៉ៃ នៃខេត្តសុងក្លា ត្រូវការពេលយ៉ាងហោចណាស់ ១-២ ខែ ដើម្បីស្តារឡើងវិញ ដោយសារតែទឹកជំនន់ដ៏មហន្តរាយភាគខាងត្បូងនៃប្រទេសថៃកាលពីប៉ុន្មានសប្ដាហ៍មុន។ នេះបើតាមការចុះផ្សាយរបស់កាសែតបាងកកប៉ុស្តិ៍។

អាជ្ញាធរទេសចរណ៍ថៃ (TAT) បាន​ឱ្យដឹងពីបញ្ហានេះ ទាំងបន្ថែមថា ទឹកជំនន់ភាគខាងត្បូងប្រទេសបណ្ដាលឱ្យភ្ញៀវទេសចរពីម៉ាឡេស៊ី ដែលជាទីផ្សារសំខាន់បំផុតសម្រាប់តំបន់ ធ្លាក់ចុះរហូតដល់ ៥៥% នៅខែធ្នូ និង ១១% ពេលមួយ​ឆ្នាំ ២០២៥។ ​

​ប្រធាន TAT លោកស្រី Thapanee Kiatphaibool ​ បានឱ្យដឹងថា ការមកដល់របស់ភ្ញៀវទេសចរម៉ាឡេស៊ីនៅក្នុងខែធ្នូ ​រំពឹងថាធ្លាក់ចុះ ៥៥% មកត្រឹម ២០៥ ០០០ នាក់ ដោយ​បង្កើតប្រាក់ចំណូល ៤,៤ ប៊ីលាន​បាត ធ្លាក់ចុះ ៥៤% ធៀបនឹងរយៈពេលដូចគ្នាឆ្នាំមុន។ ​

យោងតាម ​​TAT ទឹកជំនន់នៅក្នុងខេត្តភាគខាងត្បូងប្រទេសថៃជាច្រើន ​បាន​រួមចំណែកដល់ការធ្លាក់ចុះចំនួន​​ភ្ញៀវទេសចរបរទេស​សរុប ថៃរំពឹងមានភ្ញៀវមកលេង​ត្រឹម ៣២,៨ លាននាក់ នៅឆ្នាំនេះ ដោយធ្លាក់ចុះ ៨% និងបង្កើតប្រាក់ចំណុល ១,៥២ ទ្រីលានបាត ធ្លាក់ចុះ ៥% ធៀបនឹងឆ្នាំ ២០២៤។ ​

លោកស្រី Thapanee ​បន្តថា ទឹកជំនន់បានបំផ្លាញផ្សារ Kim Yong ក្នុងក្រុង Hat Yai ដែលជាតំបន់សេដ្ឋកិច្ចសំខាន់របស់ខេត្តសុងខ្លា។​

កិច្ចខិតខំប្រឹងប្រែងស្តារទីក្រុង​ឡើងវិញ​បន្ទាន់ គឺរឿងចាំបាច់សម្រាប់សុខភាពសាធារណៈ និងការ​ប្រមូលសំណល់ចេញ ​ខណៈប្រជាជនក្នុងតំបន់ បាន​លើកឡើងពីការព្រួយបារម្ភ​អំពីផលប៉ះពាល់​ និងការគ្រប់គ្រងវិបត្តិរយៈពេលវែង។

បន្ថែមពីលើនេះ លោកស្រី Thapanee បាន​បន្ថែមថា ការផ្លាស់ប្តូរទីតាំងព្រឹត្តិការណ៍កីឡា​ SEA Games ទៅកាន់ទីក្រុងបាងកក ​អាចធ្វើឱ្យប៉ះពាល់ដល់រូបភាព និងទំនុកចិត្ត​សម្រាប់ការធ្វើដំណើររបស់តំបន់​។

គួររំឭកថា ទឹកជំនន់នៅភាគខាងត្បូងថៃកាលពីខែវិច្ឆិកា ត្រូវបានគេរាប់ថាជាទឹកជំំនន់ដ៏អាក្រក់បំផុតមួយក្នុងប្រវត្តិសាស្រ្តសម័យទំនើបថៃ ដោយប៉ះពាល់ខេត្តជាង ១០ នៅភាគខាងត្បូង ប្រជាជនជាង ៣,៨ លាននាក់ និងសម្លាប់មនុស្សប្រមាណ ១៨១ នាក់៕