ព័ត៌មានអន្ដរជាតិ

ក្រសួងការបរទេសឥណ្ឌា ថ្កោលទោសថៃ រឿងកម្ទេចរូបសំណាក ព្រហ្មញ្ញសាសនា

បានផុស

៤ ខែ មុន

នៅ

ថ្ងៃព្រហស្បតិ៍ ២៥ ធ្នូ ២០២៥

ដោយ

ក្រសួងការបរទេសឥណ្ឌា បានចេញសេចក្តីថ្លែងការណ៍មួយដោយថ្កោលទោសថៃ ចំពោះទង្វើដែលមិនអាចទទួលយកបាន នៃការកម្ទេចរូបសំណាក ព្រហ្មញ្ញសាសនា។

អ្នកនាំពាក្យក្រសួងការពារឥណ្ឌា Shri Randhir Jaiswal (រូបថត៖ PTI)

ក្នុងសេចក្តីថ្លែងការណ៍ចុះថ្ងៃពុធទី២៤ខែធ្នូឆ្នាំ២០២៥ អ្នកនាំពាក្យក្រសួងការបរទេសឥណ្ឌា Shri Randhir Jaiswal បាននិយាយថា៖ «យើងបានឃើញនូវរបាយការណ៍ស្តីពីការកម្ទេចរូបសំណាកព្រះនៃ ព្រហ្មញ្ញសាសនា ដែលទើបកសាងឡើងក្នុងពេលថ្មីៗ និងមានទីតាំងស្ថិតនៅតំបន់រងផលប៉ះពាល់ដោយសារជម្លោះព្រំដែនថៃ-កម្ពុជា ដែលកំពុងបន្តកើតមាន។ ទេវរូបនៃសាសនាព្រហ្មញ្ញ និងព្រះពុទ្ធ ត្រូវបានទទួលនូវការគោរពសក្ការៈយ៉ាងជ្រាលជ្រៅបំផុតពីសំណាក់ប្រជាជននៅទូទាំងតំបន់ ដែលនេះគឺជាផ្នែកមួយនៃបេតិកភណ្ឌអរិយធម៌រួមគ្នារបស់យើង។ ទោះបីជាមានការទាមទារកម្មសិទ្ធិលើទឹកដីក៏ដោយ ក៏សកម្មភាពដែលខ្វះការគោរពបែបនេះ បានធ្វើឲ្យប៉ះពាល់ដល់សេចក្តីថ្លៃថ្នូរ និងមនោសញ្ចេតនារបស់អ្នកដើរតាមសាសនានៅជុំវិញពិភពលោក ហើយសកម្មភាពបែបនេះមិនគួរកើតមានឡើងនោះទេ។ យើងសូមទទូចម្តងទៀតដល់ភាគីទាំងពីរ ឲ្យត្រឡប់មករកកិច្ចសន្ទនា និងផ្លូវការទូតវិញ ដើម្បីស្តារសន្តិភាពនិងចៀសវាងការបាត់បង់ជីវិតមនុស្សបន្ថែមទៀត ក៏ដូចជាការខូចខាតដល់ទ្រព្យសម្បត្តិ និងបេតិកភណ្ឌផងដែរ»។

សេចក្តីថ្លែងការណ៍របស់ក្រសួងការបរទេសឥណ្ឌា (រូបថត៖ ក្រសួងការបរទេសឥណ្ឌា)

សេចក្តីថ្លែងការណ៍នេះ កើតឡើងមួយថ្ងៃ បន្ទាប់ពីអតីតសមាជិកសភាឥណ្ឌាម្នាក់ ក៏បានថ្កោលទោសកងទ័ពថៃផងដែរ ចំពោះការវាយកម្ទេចរូបសំណាកនេះ ដែលកម្ពុជាជាអ្នកសាងសង់នៅក្បែរព្រំដែន។

យោងតាមសារព័ត៌មាន Disha Daily លោក Vijayasai Reddy អតីតសមាជិកសភា បានហៅការបំផ្លិចបំផ្លាញនេះថាជា «រឿងដែលមិនអាចទទួលយកបាន» នៅក្នុងការបង្ហោះលើបណ្តាញសង្គម X កាលពីថ្ងៃអង្គារទី២៣ខែធ្នូឆ្នាំ២០២៥។ លោកព្រមានថា ការវាយប្រហារលើកេរ្តិ៍តំណែលសាសនា ក្រោមលេសនៃជម្លោះទឹកដី «គ្រាន់តែបង្ហាញឲ្យឃើញពីការខ្វះការអត់ឱនប៉ុណ្ណោះ»។

លោក Reddy បានសរសេរថា «ទោះបីជាត្រូវបានដាក់ដោយកម្ពុជា ឬមិនមែនក៏ដោយ ការវាយប្រហារលើជំនឿ និងកេរ្តិ៍តំណែល មិនអាចយកមកធ្វើជាលេសបានឡើយ»។ លោកបានគូសបញ្ជាក់ថា ទាំងថៃ និងកម្ពុជា សុទ្ធតែជាប្រទេសដែលកាន់ព្រះពុទ្ធសាសនាភាគច្រើន ប៉ុន្តែ«ប្រវត្តិសាស្ត្របានកត់ត្រាទុកនូវការធ្វើទុក្ខបុកម្នេញដដែលៗលើប្រាសាទព្រហ្មញ្ញសាសនា និងការប៉ុនប៉ងលុបបំបាត់ចោល»។

លោកបានបន្ថែមថា «គ្មានសាសនាណាដែលបង្ហាញពីសន្តិភាពរបស់ខ្លួន តាមរយៈការបំផ្លាញជំនឿសាសនារបស់អ្នកដទៃនោះទេ» ហើយលោកក៏បាន Tag ឈ្មោះនាយករដ្ឋមន្ត្រីឥណ្ឌា លោក Narendra Modi នៅក្នុងការបង្ហោះនោះផងដែរ។

បើតាម Disha Daily ក្រៅតែពីអតីតសមាជិកសភាឥណ្ឌារូបនេះ ប្រជាជនកាន់សាសនាហិណ្ឌូនៅក្នុងប្រទេសឥណ្ឌាជាច្រើនទៀត ក៏កំពុងសម្ដែងការខឹងសម្បារយ៉ាងខ្លាំងផងដែរចំពោះទង្វើបំពានសាសនាដោយកងទ័ពថៃ នៅក្នុងជម្លោះព្រំដែនជាមួយកម្ពុជា។ ដោយថ្កោលទោសសកម្មភាពកងទ័ពថៃ អ្នកប្រើប្រាស់បណ្ដាញសង្គមបាននាំគ្នាទាមទារឲ្យមានអន្តរាគមន៍ការទូតពីរដ្ឋាភិបាលឥណ្ឌា៕

អត្ថបទ៖ សុខ សុវណ្ណ