ពលរដ្ឋ និង​អតីតសមាជិកសភាឥណ្ឌាថ្កោលទោសកងទ័ពថៃ ចំពោះការកម្ទេចរូបសំណាកព្រហ្មញ្ញសាសនានៅកម្ពុជា

អតីតសមាជិកសភាឥណ្ឌាម្នាក់បានថ្កោលទោសកងទ័ពថៃ ចំពោះការវាយកម្ទេចរូបសំណាកព្រហ្មញ្ញសាសនាដ៏ធំមួយ ដែលកម្ពុជាជាអ្នកសាងសង់នៅក្បែរព្រំដែន។ នេះ​បើយោង​តាម​​​សារព័ត៌មាន Disha Daily។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Vijayasai Reddy អតីតសមាជិកសភា បានហៅការបំផ្លិចបំផ្លាញនេះថាជា «រឿងដែលមិនអាចទទួលយកបាន» នៅក្នុងការបង្ហោះលើបណ្តាញសង្គម X កាលពីថ្ងៃអង្គារ​ទី​២៣​ខែ​ធ្នូ​ឆ្នាំ​២០២៥ ដោយបានព្រមានថា ការវាយប្រហារលើកេរ្តិ៍តំណែលសាសនា ក្រោមលេសនៃជម្លោះទឹកដី «គ្រាន់តែបង្ហាញឲ្យឃើញពីការខ្វះការអត់ឱនប៉ុណ្ណោះ»។

លោក Reddy បានសរសេរថា «ទោះបីជាត្រូវបានដាក់ដោយកម្ពុជា ឬមិនមែនក៏ដោយ ការវាយប្រហារលើជំនឿ និងកេរ្តិ៍តំណែល មិនអាចយកមកធ្វើជាលេសបានឡើយ»។ លោកបានគូសបញ្ជាក់ថា ទាំងថៃ និងកម្ពុជា សុទ្ធតែជាប្រទេសដែលកាន់ព្រះពុទ្ធសាសនាភាគច្រើន ប៉ុន្តែ«ប្រវត្តិសាស្ត្របានកត់ត្រាទុកនូវការធ្វើទុក្ខបុកម្នេញដដែលៗលើប្រាសាទព្រហ្មញ្ញសាសនា និងការប៉ុនប៉ងលុបបំបាត់ចោល»។

លោកបានបន្ថែមថា «គ្មានសាសនាណាដែលបង្ហាញពីសន្តិភាពរបស់ខ្លួន តាមរយៈការបំផ្លាញជំនឿសាសនារបស់អ្នកដទៃនោះទេ» ហើយលោកក៏បាន Tag ឈ្មោះនាយករដ្ឋមន្ត្រីឥណ្ឌា លោក Narendra Modi នៅក្នុងការបង្ហោះនោះផងដែរ។

បើ​តាម Disha Daily ក្រៅ​តែ​ពី​អតីត​សមាជិក​សភា​ឥណ្ឌា​រូប​នេះ ប្រជាជន​កាន់​សាសនា​ហិណ្ឌូ​នៅ​ក្នុង​ប្រទេស​ឥណ្ឌា​ជា​ច្រើន​ទៀត ក៏​កំពុង​សម្ដែង​ការ​ខឹង​សម្បារ​យ៉ាង​ខ្លាំង​ផង​ដែរ​ចំពោះ​ទង្វើ​បំពាន​សាសនា​ដោយ​កងទ័ព​ថៃ នៅ​ក្នុង​ជម្លោះ​ព្រំដែន​ជាមួយ​កម្ពុជា។ ដោយ​ថ្កោលទោស​សកម្មភាព​កងទ័ព​ថៃ អ្នក​ប្រើប្រាស់​បណ្ដាញ​សង្គម​​​បាន​​នាំ​គ្នា​ទាមទារ​ឲ្យ​មាន​អន្តរាគមន៍​ការទូត​ពី​រដ្ឋាភិបាល​ឥណ្ឌា៕

ប្រែសម្រួល៖ ឈាង