ព័ត៌មានអន្ដរជាតិ

ចិនថា អាមេរិកបញ្ឆេះសង្គ្រាម ក្រោយការសម្រេចលក់អាវុធធុនធ្ងន់ឱ្យតៃវ៉ាន់

បានផុស

៦ ខែ មុន

នៅ

ថ្ងៃសុក្រ ២៦ ធ្នូ ២០២៥

ដោយ

រដ្ឋាភិបាលចិន កាលពីថ្ងៃព្រហស្បតិ៍ទី២៥ បានរិះគន់សហរដ្ឋអាមេរិកដែលបានលក់សព្វាវុធឱ្យតៃវ៉ាន់ និងបានហៅថាជាទង្វើមិនល្អ ក៏ដូចជាការរុញឱ្យមានភ្លើងសង្រ្គាមកាន់តែក្តៅ និងជំរុញឱ្យមានការគំរាមកំហែងច្រកសមុទ្រតៃវ៉ាន់។ បើតាមភ្នាក់ងារសារព័ត៌មាន Agencies/rj ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីសប្តាហ៍មុន សហរដ្ឋអាមេរិកបានប្រកាសថា ខ្លួនលក់អាវុធឱ្យតៃវ៉ាន់ក្នុងតម្លៃ ១១.១ប៊ីលានដុល្លារ ដែលជាតម្លៃមួយដ៏ថ្លៃនិងមានអាវុធធុនធ្ងន់ជាច្រើនមិនធ្លាប់មានលើកោះនេះ។

អ្នកនាំពាក្យក្រសួងការពារជាតិចិន លោក Zhang Xiaogang បាននិយាយថា៖«ភាគីអាមេរិកបានក្បត់ពាក្យសម្តីរបស់ខ្លួន ញុះញង់បង្កើតឱ្យមានសង្គ្រាមកាន់តែខ្លាំង និងបានពន្លឿនការគំរាមកំហែងឱ្យមានសង្គ្រាមនៅច្រកសមុទ្រតៃវ៉ាន់»។

លោក Zhang បានបន្តទៀតថា សហរដ្ឋអាមេរិកគឺជាអ្នកបង្កហេតុហើយវាជាសកម្មភាពដែលខុសធ្ងន់ធ្ងរណាស់។

លោកបានបន្តថា ការលូកដៃរបស់សហរដ្ឋអាមេរិកគឺនាំឱ្យមានភាពអវិជ្ជមានផ្នែកទំនាក់ទំនងកាទូតរបស់តៃវ៉ាន់ ជាពិសេសបានជ្រៀតជ្រែកចូលក្នុងកិច្ចការផ្ទៃក្នុងរបស់ចិន។ វាជាការបង្ហាញឱ្យឃើញថាជាទង្វើខុសធ្ងន់ធ្ងរដល់កងកម្លាំងឯករាជ្យពិសេសរបស់តៃវ៉ាន់ ដែលបំផ្លាញយ៉ាងខ្លាំងក្លាដល់សន្តិភាពនានា និងស្ថិរភាពនៅច្រកសមុទ្រតៃវ៉ាន់។

អ្នកនាំពាក្យក្រសួងការពារជាតិចិន ក៏បានជំរុញឱ្យសហរដ្ឋអាមេរិកគួរយល់ដឹងឱ្យបានស៊ីជម្រៅពីបញ្ហារបស់តៃវ៉ាន់ ដោយគោរពតាមគោលការណ៍ចិនតែមួយ និងសេចក្តីថ្លែងការណ៍រួមបីចំណុចរបស់ចិន-អាមេរិក។

លោកក៏បានបន្ថែមថា សហរដ្ឋអាមេរិកគួរតែប្រុងប្រយ័ត្នបំផុតក្នុងការដោះស្រាយបញ្ហាទាក់ទងនឹងកោះតៃវ៉ាន់ បញ្ឈប់ការបំពាក់អាវុធដល់ដែនកោះនេះតាមគ្រប់មធ្យោបាយទាំងអស់ និងចាត់វិធានការជាក់ស្តែងដើម្បីរក្សាស្ថានភាពនៃទំនាក់ទំនងភាគីជារួម និង រវាងប្រជាជាតិទាំងពីរនិងយោធាទាំងពីរ៕

ប្រែសម្រួល៖ ណឺ មិនា