ខ្យល់ពុល បន្តវាយលុក បាងកក និងខេត្តថៃ ចំនួន១៨ទៀត

បញ្ហាខ្យល់ពុលក្នុងប្រទេសថៃ បន្តធ្ងន់ធ្ងរនៅឡើយ ដោយគិតត្រឹមព្រឹកថ្ងៃអង្គារទី៣០ខែធ្នូឆ្នាំ២០២៥ កំហាប់ភាគល្អិត PM2.5​ ក្នុងកម្រិតគ្រោះថ្នាក់ បានគ្របដណ្តប់ទីក្រុងបាងកក និងខេត្តចំនួន១៨។

តាមការផ្សាយរបស់ Khaosod, នៅទីក្រុងបាងកក ខ្យល់ពុលបានវាយប្រហារតំបន់ចំនួន៦៥ ដោយមជ្ឈមណ្ឌលទំនាក់ទំនងបញ្ហានៃការបំពុលខ្យល់បានឲ្យដឹងថា PM2.5 បានឈានដល់កម្រិតគ្រោះថ្នាក់ដល់សុខភាព ខណៈកន្លែងខ្លះឡើងដល់ ៦៧.១ មីក្រូក្រាមក្នុងមួយម៉ែត្រគូបនៃខ្យល់ លើសកម្រិតសុវត្ថិភាពដែលកំណត់ដោយរដ្ឋាភិបាលថៃ នៅត្រឹម៣៧.៥មីក្រូក្រាមក្នុងមួយម៉ែត្រគូបនៃខ្យល់ប៉ុណ្ណោះ។

ក្រៅពីបាងកក ខេត្តទាំង១៨ដែលត្រូវខ្យល់ពុលគ្រោះថ្នាក់គ្របដណ្តប់ មានដូចជា៖ Nakhon Pathom, Nonthaburi, Samut Sakhon, Samut Prakan, Phitsanulok, Uthai Thani, Sing Buri, Ang Thong, Suphan Buri, Phra Nakhon Si Ayutthaya, Ratchaburi, Samut Songkhram, Phetchaburi, Nong Khai, Yasothon, Khon Kaen, Kalasin, និង Maha Sarakham។

៥ថ្ងៃមុននេះ PM2.5 ក៏គ្របដណ្តប់សឹងពាក់កណ្តាលប្រទេសថៃផងដែរ ហើយនៅកន្លែងខ្លះ ខ្យល់ពុលបានឈានដល់កម្រិតពណ៌ក្រហម ដែលគ្រោះថ្នាក់ធ្ងន់ធ្ងរដល់សុខភាពមនុស្ស។

ទិន្នន័យពីទីភ្នាក់ងារអភិវឌ្ឍន៍បច្ចេកវិទ្យាអវកាសនិងភូមិសាស្ត្រព័ត៌មានថៃ (Gistda) បានឲ្យដឹងថា ទីក្រុងបាងកកនិងខេត្តថៃចំនួន៣៦ ត្រូវគ្របដណ្តប់ដោយខ្យល់ពុលកម្រិតចន្លោះ ៣៧.៦ដល់៧៨.៧ មីក្រូក្រាមក្នុងមួយម៉ែត្រគូបនៃខ្យល់។

សម្រាប់តួលេខដែលធ្វើឲ្យពលរដ្ឋថៃភ្ញាក់ផ្អើល! ក្នុងឆ្នាំ២០២៥ ប្រជាជនប្រទេសនេះរហូតដល់ទៅជាង ១០លាននាក់មានបញ្ហាសុខភាពធ្ងន់ធ្ងរ ដោយសារតែឥទ្ធិពលនៃខ្យល់ពុល PM2.5។

ក្នុងចំណោមមនុស្សទាំងជាង១០លាននាក់នោះ ភាគច្រើនមានបញ្ហាផ្លូវដង្ហើម ដូចជាជំងឺហឺតនិងជំងឺស្ទះសួតរ៉ាំរ៉ៃ ហើយអ្នកខ្លះមានឡើងកន្ទួលលើស្បែកនិង បញ្ហាភ្នែក។ ក្នុងករណីធ្ងន់ធ្ងរបំផុត អ្នកជំងឺផ្លូវដង្ហើមខ្លះ ត្រូវការជំនួយពីម៉ាស៊ីនដកដង្ហើមជាចាំបាច់ដើម្បីរស់ ហើយខ្លះឈានដល់ការជំងឺមហារីកសួតតែម្តង៕

អត្ថបទ៖ សុខ សុវណ្ណ