ព័ត៌មានជាតិ

ក្រៅពីស្វាគមន៍ដោះលែងទាហានកម្ពុជា អាមេរិកត្រៀមជួយកម្ពុជានិងថៃ អនុវត្តសេចក្តីថ្លែងការណ៍រួមពេញលេញ

បានផុស

៤ ខែ មុន

នៅ

ថ្ងៃព្រហស្បតិ៍ ១ មករា ២០២៦

ដោយ

សហរដ្ឋអាមេរិក បានចេញសេចក្តីថ្លែងការណ៍ អបអរសាទរដោយការដោះលែងវីរៈយុទ្ធកម្ពុជាទាំង១៨រូបនៅថ្ងៃទី៣១ខែធ្នូឆ្នាំ២០២៥ ដោយរដ្ឋាភិបាលថៃ បន្ទាប់ពីយោធាថៃបានចាប់ឃុំខ្លួនដោយខុសច្បាប់ចាប់តាំងពីចុងខែកក្កដា។

លោក THOMAS PIGOTT អ្នកនាំពាក្យរងនៃក្រសួងការបរទេសសហរដ្ឋអាមេរិក។ ក្រសួងការបរទេសអាមេរិក

លោក THOMAS PIGOTT អ្នកនាំពាក្យរងនៃក្រសួងការបរទេសសហរដ្ឋអាមេរិក បានចេញសេចក្តីថ្លែងការណ៍ចុះថ្ងៃទី៣១ ខែធ្នូ ឆ្នាំ ២០២៥ ម៉ោងនៅសហរដ្ឋអាមេរិក (ត្រូវព្រឹកថ្ងៃទី១ខែមករាឆ្នាំ២០២៦ ម៉ោងនៅកម្ពុជា) បានឲ្យដឹងថា សហរដ្ឋអាមេរិក សូមស្វាគមន៍ចំពោះកិច្ចខិតខំប្រឹងប្រែងប្រកបដោយការប្តេជ្ញាចិត្តខ្ពស់របស់រដ្ឋាភិបាលកម្ពុជា និងរដ្ឋាភិបាលថៃ ក្នុងការរក្សាកិច្ចព្រមព្រៀងបទឈប់បាញ់កាលពីថ្ងៃទី ២៧ខែធ្នូ។

សាររបស់អ្នកនាំពាក្យក្រសួងការបរទេសអាមេរិក បានលើកឡើងថា៖«យើងសូមស្វាគមន៍ចំពោះការដោះលែងទាហានកម្ពុជាចំនួន ១៨ នាក់ ដោយភាគីថៃ ដែលនេះគឺជាជំហានវិជ្ជមានមួយឆ្ពោះទៅរកការកសាងទំនាក់ទំនងជាប្រទេសជិតខាង និងទំនុកចិត្តឡើងវិញ។ សហរដ្ឋអាមេរិក ត្រៀមខ្លួនជាស្រេចក្នុងការគាំទ្រដល់រដ្ឋាភិបាលកម្ពុជា និងថៃ ខណៈដែលប្រទេសទាំងពីរបន្តអនុវត្តវិធានការសំខាន់ៗ ដែលបានព្រមព្រៀងគ្នានៅក្នុងសេចក្តីថ្លែងការណ៍រួម កាលពីថ្ងៃទី ២៦ ខែតុលា»។

សាររបស់អ្នកនាំពាក្យនោះ បានបន្តថា៖«សកម្មភាពនេះបានបង្ហាញពីការប្តេជ្ញាចិត្តរបស់ប្រទេសទាំងពីរ ចំពោះសន្តិភាពយូរអង្វែង តាមរយៈការអនុវត្តបទប្បញ្ញត្តិនៃកិច្ចព្រមព្រៀងសន្តិភាពនៅទីក្រុងកូឡាឡាំពួ»។

ប្រទេសថៃ បានសម្រេចចិត្តដោះលែងយោធាកម្ពុជាទាំង១៨រូប នៅថ្ងៃទី៣១ខែធ្នូឆ្នាំ២០២៥ បន្ទាប់ពីរដ្ឋមន្ត្រីការប្រទេសចិន លោក វ៉ាង យី បានជួបពិភាក្សាត្រីភាគីជាមួយរដ្ឋមន្ត្រីការបរទេសកម្ពុជានិងថៃ នៅថ្ងៃទី២៩ខែធ្នូឆ្នាំ២០២៥ ដែលគេមើលឃើញថា ថៃរងសម្ពាធឲ្យដោះលែងជាចំបាច់ ដោយសារតែការខកខានរបស់ពួកគេក្នុងការបំពេញកាតព្វកិច្ចដែលថៃបានសន្យាជាមួយសហគមន៍អន្តរជាតិ៕

រ៉ាន់ រើយ