ដាណឺម៉ាក រិះគន់លោកត្រាំ ដែលគំរាមយក Greenland ក្រោយអន្តរាគមន៍នៅវ៉េណេស៊ុយអេឡា

មេដឹកនាំនៃប្រទេសដាណឺម៉ាក និងកោះ Greenland បានចេញមុខរិះគន់យ៉ាងខ្លាំងក្លាចំពោះ​លោក ដូណាល់ ត្រាំ កាលពីថ្ងៃអាទិត្យ​​ទី​៤​ខែ​មករា​ឆ្នាំ​២០២៦ ដោយហៅការអំពាវនាវជាថ្មីរបស់​ប្រធានាធិបតី​រូប​នេះ​​​​ដែល​ចង់​គ្រប់គ្រងទឹកដីនៅតំបន់អាកទិក​ថាជាទង្វើ «មិនសមហេតុផល» និង «ខ្វះការគោរព»។

យោង​តាម​ India Today ភាពតានតឹងនេះបានកើតឡើងបន្ទាប់ពីកិច្ចសម្ភាសន៍តាមទូរសព្ទជាមួយទស្សនាវដ្តី The Atlantic ដែលក្នុងនោះលោកត្រាំ បានសង្កត់ធ្ងន់ថា អាមេរិក «ពិតជាត្រូវការ» Greenland ដើម្បីការពារជាតិ ដែលជាជំហរមួយកំពុងបង្កការព្រួយបារម្ភកាន់តែខ្លាំង បន្ទាប់ពីកងកម្លាំងអាមេរិកបានចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ កាលពី​សប្តាហ៍មុន។

នាយករដ្ឋមន្ត្រីដាណឺម៉ាក លោកស្រី Mette Frederiksen បានជំរុញឲ្យទីក្រុងវ៉ាស៊ីនតោន «បញ្ឈប់ការគំរាមកំហែង» ប្រឆាំងនឹងសម្ព័ន្ធមិត្តដ៏ជិតស្និទ្ធជាប្រវត្តិសាស្ត្រ​របស់​ខ្លួន ដោយបញ្ជាក់ថា អាមេរិកគ្មានសិទ្ធិតាមផ្លូវច្បាប់ក្នុងការកាត់យកផ្នែកណាមួយនៃប្រទេស​ដាណឺម៉ាកឡើយ។ ការព្រួយបារម្ភរបស់​ដាណឺម៉ាក កាន់តែផ្ទុះឡើងថែមទៀត ក្រោយពេលលោកស្រី Katie Miller ប្រពន្ធរបស់ជំនួយការជាន់ខ្ពស់លោកត្រាំ បានបង្ហោះរូបភាពកោះ Greenland គ្របដណ្តប់ដោយទង់ជាតិអាមេរិក រួមជាមួយពាក្យថា «ក្នុងពេលឆាប់ៗនេះ (SOON)»។ នាយករដ្ឋមន្ត្រី Greenland លោក Jens-Frederik Nielsen បានច្រានចោលការលើកឡើងនេះថាជាការមិនគោរពច្បាប់អន្តរជាតិ ដោយអះអាងយ៉ាងច្បាស់ថា ទឹកដីស្វយ័តមួយនេះ «មិនមែនសម្រាប់លក់ឡើយ»។

ជម្លោះការទូតនេះបានកើតឡើង ខណៈដែលរដ្ឋបាលលោកត្រាំ កំពុងបង្កើនការយកចិត្តទុកដាក់លើតំបន់អាកទិក ដោយលើកឡើងពីសារៈសំខាន់ជាយុទ្ធសាស្ត្រសម្រាប់ប្រព័ន្ធការពារមីស៊ីល និងប្រភពរ៉ែដ៏សម្បូរបែប។ កាលពីខែមុន លោកត្រាំ បានតែងតាំងអភិបាលរដ្ឋ Louisiana លោក Jeff Landry ជាប្រេសិតពិសេសប្រចាំកោះ Greenland។ លោក Landry បានពណ៌នាថា​ តួនាទីរបស់​លោក​​មាន​គោលបំណង​​ធ្វើឲ្យកោះ Greenland ក្លាយជាផ្នែកមួយនៃ​សហរដ្ឋ​អាមេរិក៕

ប្រែសម្រួល៖ ឈាង