លោកត្រាំ ហៅខ្លួនឯងថាជា «ប្រធានាធិបតីស្ដីទីវ៉េណេស៊ុយអេឡា»

ប្រធានាធិបតី​អាមេរិក លោក ដូណាល់ ត្រាំ បានបង្កើនជំហររដ្ឋបាលរបស់លោកលើប្រទេសវ៉េណេស៊ុយអេឡា ដោយបានបង្ហោះរូបភាពកែច្នៃរបស់លោកដែលមានស្លាកឈ្មោះថាជា «ប្រធានាធិបតីស្ដីទីនៃវ៉េណេស៊ុយអេឡា» នៅលើបណ្តាញសង្គម Truth Social។

ការបង្ហោះ​នា​ថ្ងៃ​ទី​១២​ខែ​មករា​​នេះ ដែល​មាន​ការ​សរសេរ​ថា «អ្នក​កាន់​​តំណែងក្នុងខែមករា​ឆ្នាំ២០២៦» បានធ្វើឡើងបន្ទាប់ពីប្រតិបត្តិការយោធាដ៏សំខាន់របស់​ក្រុង​វ៉ាស៊ីនតោន​កាលពីថ្ងៃទី៣​ខែមករា​ឆ្នាំ២០២៦ ដែលហៅ​ថា ប្រតិបត្តិការ «Absolute Resolve»។ ក្នុងអំឡុងពេលវាយឆ្មក់នៅទីក្រុងការ៉ាកាស កងកម្លាំងពិសេសអាមេរិកបានចាប់ខ្លួនប្រធានាធិបតី Nicolas Maduro និងភរិយា លោកស្រី Cilia Flores ហើយត្រូវបានបញ្ជូនទៅកាន់ទីក្រុងញូវយ៉ក ដើម្បីប្រឈមមុខនឹងការចោទប្រកាន់ពីបទភេរវកម្មគ្រឿងញៀន និងការជួញដូរអាវុធ។

ខណៈដែលអនុប្រធានាធិបតី លោកស្រី Delcy Rodriguez បានស្បថចូលកាន់តំណែងជាប្រធានាធិបតីបណ្តោះអាសន្នរបស់វ៉េណេស៊ុយអេឡា និងបន្តដឹកនាំរដ្ឋាភិបាលក្នុងស្រុក លោកប្រធានាធិបតីត្រាំបានអះអាងថា អាមេរិកនឹង«គ្រប់គ្រង»ប្រទេស​វ៉េណេស៊ុយអេឡា និងទ្រព្យសម្បត្តិប្រេងដ៏ច្រើនសន្ធឹកសន្ធាប់ក្នុងអំឡុងពេលអន្តរកាល។

ទោះបីជាការបង្ហោះលើបណ្តាញសង្គមរបស់លោកត្រាំ​មានលក្ខណៈបង្កហេតុក៏ដោយ ក៏រដ្ឋបាលរបស់លោកកំពុងបន្តយុទ្ធសាស្ត្រពីរក្នុងពេលតែមួយ។ ក្រុមការងារការទូត និងសន្តិសុខអាមេរិកកាលពីពេលថ្មីៗនេះ បានធ្វើដំណើរទៅកាន់ទីក្រុងការ៉ាកាស ដើម្បីវាយតម្លៃលើការបើកស្ថានទូតអាមេរិកឡើងវិញ ដែលនេះជាសញ្ញានៃជំហានដំបូងឆ្ពោះទៅរកការបង្កើតទំនាក់ទំនងផ្លូវការជាមួយរដ្ឋាភិបាលលោកស្រី Rodriguez ខណៈដែលអាមេរិកនៅតែរក្សាការគ្រប់គ្រងលើធនធានថាមពលយុទ្ធសាស្ត្ររបស់​​ប្រជាជាតិ​អាមេរិកឡាទីន​មួយ​នេះ៕

ដោយ៖ ឈាង