ការបង្រ្កាបនៅអ៊ីរ៉ង់ធ្វើ​ឲ្យ​បាតុកម្មថមថយ ខណៈអ្នកស្លាប់កើនលើសពី៣០០០នាក់

យោងតាមការបញ្ជាក់របស់ក្រុមសិទ្ធិមនុស្សកាលពីថ្ងៃសុក្រ​​ទី​១៦​ខែ​មករា​ឆ្នាំ​២០២៦ និង​ត្រូវ​​បាន​ចុះ​ផ្សាយ​ដោយ​ទីភ្នាក់ងារ​ព័ត៌មាន​រ៉យទ័រ ការបង្រ្កាបយ៉ាងសាហាវពីសំណាក់រដ្ឋាភិបាលបានធ្វើ​ឲ្យ​បាតុកម្មនៅទូទាំងប្រទេសអ៊ីរ៉ង់មានសភាពស្ងប់ស្ងាត់ទៅវិញ​ភាគច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងធំៗដូចជាទីក្រុងតេហេរ៉ង់ត្រូវបានរាយការណ៍ថាមានភាពស្ងប់ស្ងាត់ ប៉ុន្តែ​ការបាត់បង់ជីវិតមនុស្សក្នុងភាពវឹកវរនេះបានកើនឡើងដល់កម្រិតដែលមិនធ្លាប់មានពីមុនមក។ ក្រុមសិទ្ធិមនុស្ស HRANA ដែលមានមូលដ្ឋាននៅសហរដ្ឋអាមេរិក បានរាយការណ៍ថា ចំនួនអ្នកស្លាប់​កើនឡើងដល់ ៣០៩០នាក់ ដែលក្នុងនោះមានបាតុករជិត ២៩០០នាក់ ដែលនេះជាជម្លោះក្នុងស្រុកដ៏សាហាវបំផុតចាប់តាំងពីបដិវត្តន៍ឥស្លាមឆ្នាំ​១៩៧៩។ ទោះបីជាមានវត្តមានកងកម្លាំងសន្តិសុខ និងយន្តហោះគ្មានមនុស្សបើកយ៉ាងច្រើនក៏ដោយ ក៏នៅតែមានសេចក្តីរាយការណ៍អំពីការប៉ះទង្គិចគ្នាតិចតួចនៅតាមតំបន់ដាច់ស្រយាល ហើយប្រព័ន្ធផ្សព្វផ្សាយរដ្ឋបានបញ្ជាក់ពីការបន្តចាប់ខ្លួនមនុស្សជាបន្តបន្ទាប់។

នៅទីក្រុងវ៉ាស៊ីនតោន ប្រធានាធិបតី ដូណាល់ ត្រាំ បានអះអាងថា ភាពតានតឹងបានថយចុះដោយសារតែរូបលោក ដោយបានលើកឡើងថា មេដឹកនាំអ៊ីរ៉ង់បានលុបចោលការសម្លាប់បាតុករដោយការព្យួរកចំនួនជាង ៨០០នាក់ ដែលបានគ្រោងទុក បន្ទាប់ពីលោកបានគំរាមប្រើកម្លាំងយោធាជ្រៀតជ្រែក។

ទោះបីជាទីក្រុងតេហេរ៉ង់មិនទាន់បានបញ្ជាក់ជាផ្លូវការអំពីការលុបចោលនេះក៏ដោយ ក៏លោកត្រាំ បានផ្ដល់យោបល់ថា ទង្វើនេះ «មានឥទ្ធិពលយ៉ាងខ្លាំង» ដល់ការសម្រេចចិត្តរបស់លោក ក្នុងការផ្អាកការវាយប្រហារដែលអាចកើតមាន៕

ប្រែសម្រួល៖ ឈាង