ដាណឺម៉ាក ស្នើ ណាតូ ចាប់ផ្តើមបេសកកម្មនៅ Greenland ចំពេលវ៉ាស៊ីនតោនដាក់សម្ពាធកាន់តែខ្លាំង

ប្រទេសដាណឺម៉ាកកាលពីថ្ងៃចន្ទទី១៩មករា បានជំរុញឲ្យអង្គការណាតូចាប់ផ្តើមប្រតិបត្តិការឃ្លាំមើលទៅកាន់ Greenland ដើម្បីពង្រឹងការការពារកោះនេះ ខណៈដែលសម្ពាធកើនឡើងពីទីក្រុងវ៉ាស៊ីនតោន លើអ្វីដែលខ្លួនមើលឃើញថា មិនគ្រប់គ្រាន់សម្រាប់សន្តិសុខនៅតំបន់អាកទិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters បន្ទាប់ពីកិច្ចប្រជុំជាមួយអគ្គលេខាធិការណាតូ លោក Mark Rutte នៅទីស្នាក់ការកណ្តាលណាតូក្នុងទីក្រុងព្រុចសែល រដ្ឋមន្ត្រីក្រសួងការពារជាតិដាណឺម៉ាក Troels Lund Poulsen មានប្រសាសន៍ថា «ខ្ញុំជឿជាក់ថាឥឡូវនេះយើងអាចបង្កើតក្របខ័ណ្ឌមួយ សម្រាប់របៀបដែលរឿងនេះអាចធ្វើបាន ហើយខ្ញុំចង់ឲ្យប្រទេសទាំងអស់ក្លាយជាផ្នែកមួយនៃ Arctic Sentry (ជាឈ្មោះបេសកកម្មរបស់ណាតូ) យ៉ាងហោចណាស់ប្រទេសណាតូទាំងអស់ដែរ»។

រដ្ឋមន្ត្រីក្រសួងការពារជាតិដាណឺម៉ាកក៏បានបញ្ជាក់បន្ថែមទៀតថា លោកបានពិភាក្សាអំពីសារៈសំខាន់នៃតំបន់អាកទិក រួមទាំង Greenland ចំពោះសន្តិសុខរួមគ្នា អមដោយមន្ត្រីការបរទេសជាន់ខ្ពស់ Greenland ដែលនៅតែបន្តធ្វើការជាមួយគ្នាជាសម្ព័ន្ធមិត្តលើបញ្ហាសំខាន់ៗទាំងនេះ។

នៅក្នុងកិច្ចប្រជុំដដែលនោះ រដ្ឋមន្ត្រីក្រសួងការពារជាតិស៊ុយអែតលោក Pal Jonson ក៏បានលើកឡើងថា ប្រតិបត្តិការរបស់អង្គការណាតូអាចជាទិសដៅត្រឹមត្រូវ ចំពេលមានការអះអាងដដែលៗពីលោកត្រាំថាត្រូវធ្វើបន្ថែមទៀតដើម្បីទប់ស្កាត់ ការគំរាមកំហែងពីប្រទេសចិន និងរុស្ស៊ី ទៅកាន់ Greenland។

ក្នុងរយៈពេលប៉ុន្មានថ្ងៃកន្លងមកនេះ ដាណឺម៉ាកបានដឹកនាំបេសកកម្មឈ្លបយកការណ៍ជាមួយប្រទេសអឺរ៉ុបជាច្រើននៅ Greenland ដើម្បីរៀបចំផែនការពីរបៀបប្រើប្រាស់ទឹកដីនេះឲ្យបានល្អបំផុត និងពង្រឹងវត្តមានយោធារបស់ខ្លួន។ ប៉ុន្តែការដាក់ពង្រាយនេះ ជំនួសឲ្យការបំពេញចិត្តលោកត្រាំ ហាក់ដូចជាបានជំរុញឲ្យគាត់ដាក់ពន្ធគយសរុប ១០% លើប្រទេសទាំងអស់ដែលចូលរួមក្នុងបេសកកម្មនេះទៅវិញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោកត្រាំ នឹងត្រូវចារក្នុងប្រវត្តិសាស្ត្រ បើគ្រប់គ្រងកោះ Greenland ពិតមែន