ត្រាំទម្លាយសារសម្ងាត់ជាមួយលោក Macron និងមេណាតូ ខ្ទេចគ្មានសល់

ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី ២០ ខែមករា បានបង្ហោះរូបភាពនៃសារឯកជនរវាងប្រធានាធិបតីបារាំង លោក Emmanuel Macron និងអគ្គលេខាធិការអង្គការណាតូ លោក Mark Rutte ដែលរួមមានខ្លឹមសារនៃកិច្ចសហប្រតិបត្តិការនៅមជ្ឈិមបូព៌ា ក៏ដូចជាសំណើមួយដើម្បីកាត់បន្ថយភាពតានតឹងរវាងអឺរ៉ុប និងបញ្ហា Greenland។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារសម្ងាត់ចេញផ្សាយដោយ Reuters លោក Macron បានសរសេរជាភាសាអង់គ្លេសថា «មិត្តរបស់ខ្ញុំ យើងយល់ស្របទាំងស្រុងលើបញ្ហាស៊ីរី។ យើងអាចធ្វើរឿងអស្ចារ្យអំពីអ៊ីរ៉ង់។ ប៉ុន្តែ ខ្ញុំមិនយល់ពីអ្វីដែលអ្នកកំពុងធ្វើជាមួយ Greenland នោះទេ។ ចូរយើងកសាងរឿងអស្ចារ្យជាមួយគ្នា»។

មេដឹកនាំបារាំងក៏បានស្នើឲ្យរៀបចំកិច្ចប្រជុំរវាងគណៈប្រតិភូ G7 នៅទីក្រុងប៉ារីស នៅថ្ងៃទី ២២ខែមករា បន្ទាប់ពីការបញ្ចប់វេទិកាសេដ្ឋកិច្ចពិភពលោក (WEF) នៅទីក្រុង Davos ប្រទេសស្វីស។ លោកស្នើឲ្យអញ្ជើញតំណាងបន្ថែមទៀតមកពីអ៊ុយក្រែន ដាណឺម៉ាក ស៊ីរី និងរុស្ស៊ីចូលរួមនៅខាងក្រៅ និងអញ្ជើញសមភាគីរបស់លោកត្រាំទៅញ៉ាំអាហារពេលល្ងាចនៅទីក្រុងប៉ារីស មុនពេលចាកចេញទៅកាន់សហរដ្ឋអាមេរិក។

យ៉ាងណាមិញ មន្ត្រីបារាំងម្នាក់ដែលជិតស្និទ្ធនឹងលោក Macron ក្រោយមកស្រាប់តែចេញការបញ្ជាក់ទៅកាន់ប្រព័ន្ធផ្សព្វផ្សាយថា សារដែលលេចធ្លាយរវាងលោកត្រាំ និងប្រធានាធិបតី បារាំងគឺជាការពិតទាំំងអស់។

នៅក្នុងការបង្ហោះមួយទៀតនៅថ្ងៃដដែលនោះ លើបណ្តាញសង្គម Truth Social លោកត្រាំបានចេញផ្សាយសារមួយដែលបង្ហាញពីអគ្គលេខាធិការអង្គការណាតូ លោក Mark Rutte ដែលលើកសរសើរសមិទ្ធផលរបស់អាមេរិកនៅក្នុងប្រទេសស៊ីរី តំបន់ហ្គាហ្សា និងអ៊ុយក្រែន។ លោក Rutte និយាយថា លោកនឹងបញ្ជាក់ពីរឿងទាំងនេះនៅក្នុងសុន្ទរកថារបស់លោកនៅទីក្រុង Davos ហើយសន្យាថានឹងស្វែងរកមធ្យោបាយឆ្ពោះទៅមុខលើតំបន់ Greenland។

ថ្លែងទៅកាន់ប្រព័ន្ធផ្សព្វផ្សាយនៅតាមផ្លូវទៅកាន់ទីក្រុង Davos ត្រាំបានបញ្ជាក់ថា លោកបានបង្ហាញសារពីមេដឹកនាំអឺរ៉ុបទាំងពីរ ពោលគឺដើម្បីបញ្ជាក់ពីទស្សនៈរបស់ពួកគេលើកិច្ចការអន្តរជាតិ។ សារទាំងនោះក៏បង្ហាញពីមេដឹកនាំអឺរ៉ុបម្នាក់ៗបង្ហាញពីសុច្ឆន្ទៈសម្រាប់ការសន្ទនា បន្ទាប់ពីលោកត្រាំបានគំរាមកំហែងដាក់ពន្ធលើប្រទេសចំនួន ៨ ដែលកំពុងប្រឆាំងនឹងកិច្ចខិតខំប្រឹងប្រែងរបស់អាមេរិកក្នុងការគ្រប់គ្រងតំបន់ Greenland។

ដោយឡែក នៅក្នុងការបង្ហោះមួយផ្សេងទៀតនៅលើ Truth Social លោកត្រាំបានចែករំលែករូបភាពផ្ទាល់ខ្លួនអមដោយរដ្ឋមន្ត្រីការបរទេស Marco Rubio និងអនុប្រធានាធិបតី JD Vance ដោយដាំទង់ជាតិសហរដ្ឋអាមេរិកនៅលើកោះ Greenland នៅជាប់នឹងសញ្ញាមួយដែលសរសេរថា «Greenland: ទឹកដីសហរដ្ឋអាមេរិក EST 2026»។ នៅក្នុងន័យនេះលោកចង់បញ្ចាក់ជំហរថា សហរដ្ឋអាមេរិកត្រូវតែដណ្តើមយកការគ្រប់គ្រងកោះ Greenland ដែលជាទឹកដីពាក់កណ្តាលស្វយ័តរបស់ដាណឺម៉ាក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ដាណឺម៉ាក ស្នើ ណាតូ ចាប់ផ្តើមបេសកកម្មនៅ Greenland ចំពេលវ៉ាស៊ីនតោនដាក់សម្ពាធកាន់តែខ្លាំង