ចិនបដិសេធជ្រៀតជ្រែក Greenland និងព្រមានអឺរ៉ុប កុំពឹងផ្អែកលើអាមេរិកពេក

យោងតាម Reuters កាលពីថ្ងៃទី២១មករា ប្រទេសចិនបានដកខ្លួនចេញពីជម្លោះ Greenland ជាផ្លូវការ ដោយបដិសេធ ខ្លួនមិនប្រកួតប្រជែងដើម្បីទទួលបានឥទ្ធិពលនៅបស្ចិមលោកទេ ខណៈការប៉ុនប៉ងរបស់សហរដ្ឋអាមេរិកដើម្បីគ្រប់គ្រងកោះ បានគំរាមកំហែងដល់ការផ្លាស់ប្តូរសក្ដានុភាពអំណាចនៃសម្ព័ន្ធភាពសន្តិសុខឆ្លងអាត្លង់ទិក ដែលមានអាយុកាលរាប់ទសវត្សរ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកត់សម្គាល់នេះបានកើតឡើង បន្ទាប់ពីមហិច្ឆតារបស់ប្រធានាធិបតីសហរដ្ឋ ដូណាល់ ត្រាំ ក្នុងការដណ្តើមយកអធិបតេយ្យភាពលើ Greenland ពីប្រទេសដាណឺម៉ាក បានបង្កឲ្យមានភាពមិនស្រួលក្នុងចំណោមសមាជិកណាតូ និងជំរុញឲ្យអ្នកធ្វើគោលនយោបាយអឺរ៉ុបពិចារណាឡើងវិញ អំពីការពឹងផ្អែកជាប្រពៃណីរបស់ពួកគេលើសហរដ្ឋអាមេរិកសម្រាប់សន្តិសុខ។

អ្នកនាំពាក្យក្រសួងការបរទេសចិន លោក Guo Jiakun បានបានប្រាប់សន្និសីទសារព័ត៌មានថា «ទីក្រុងប៉េកាំងមិនមានបំណងជ្រៀតជ្រែកក្នុងបញ្ហា Greenland ទេ» ដោយពណ៌នាអំពីប្រទេសចិនថា ជាកម្លាំងវិជ្ជមាន ស្ថិរភាព និងស្ថាបនា ដែលប្តេជ្ញាចិត្តចំពោះការចូលរួមដោយមិត្តភាព ផ្អែកលើការគោរពគ្នាទៅវិញទៅមក។

ទោះបីជាប្រកាសជំហរមិនជ្រៀតជ្រែកជាផ្លូវការក៏ដោយ ប្រព័ន្ធផ្សព្វផ្សាយរដ្ឋចិនបានជំរុញឲ្យអឺរ៉ុបពិចារណាឡើងវិញអំពីការពឹងផ្អែករបស់ខ្លួនលើអាមេរិកសម្រាប់សន្តិសុខ។ អត្ថបទនិពន្ធរបស់ Global Times បានកត់សម្គាល់ថា អឺរ៉ុបបានពឹងផ្អែកខ្លាំងពេកលើទីក្រុងវ៉ាស៊ីនតោន ខណៈពេលដែលមិនអើពើនឹងដៃគូសក្តានុពលផ្សេងទៀត រួមទាំងប្រទេសចិន និងរុស្ស៊ី។

ស្រដៀងគ្នានេះដែរ កាសែត China Daily បានហៅជម្លោះ Greenland ជាការរំលឹកថា អឺរ៉ុបត្រូវតែជំរុញស្វ័យភាពជាយុទ្ធសាស្ត្រ និងធ្វើពិពិធកម្មភាពជាដៃគូ ដើម្បីចៀសវាងការត្រូវបានបញ្ជាដោយសម្ព័ន្ធមិត្តលេចធ្លោតែមួយ។ ជាក់ស្ដែង គឺគំរាមកំហែងនឹងទម្លាក់ពន្ធពាណិជ្ជកម្មលើអឺរ៉ុប ប្រសិនបើពួកគេប្រឆាំងនឹងការទាមទាររបស់គាត់ ក្នុងការទិញយកកោះអាកទិក។

ចិនទំនងជារក្សាជំហរប្រុងប្រយ័ត្ន និងមិនសូវលេចធ្លោ ខណៈពេលដែលបន្តជំរុញការលើកឡើងថា អឺរ៉ុបគួរតែកាត់បន្ថយការពឹងផ្អែកលើសហរដ្ឋអាមេរិកសម្រាប់សន្តិសុខ។ ទីក្រុងប៉េកាំងអាចទាញយកប្រយោជន៍ពីបណ្តាញការទូតដើម្បីលើកទឹកចិត្តប្រទេសអឺរ៉ុបឲ្យស្វែងរកភាពជាដៃគូចម្រុះជាមួយតួអង្គ មិនមែនអាមេរិកក្នុងវិស័យសន្តិសុខ និងពាណិជ្ជកម្ម។

ទន្ទឹមនឹងនេះ អឺរ៉ុបប្រឈមមុខនឹងសម្ពាធក្នុងការធ្វើឲ្យមានតុល្យភាពសាមគ្គីភាពឆ្លងមហាសមុទ្រអាត្លង់ទិកជាមួយនឹងស្វ័យភាពជាយុទ្ធសាស្ត្រ ដោយសម្រេចចិត្តថា តើត្រូវរុញច្រានប្រឆាំងនឹងសម្ពាធរបស់មេរិក ចូលរួមជាមួយប្រទេសចិន និងមហាអំណាចផ្សេងទៀត ឬស្វែងរកការសម្របសម្រួលដែលការពារទាំងសន្តិសុខ និងផលប្រយោជន៍សេដ្ឋកិច្ច។ ដូច្នេះ ជម្លោះនៅ Greenland អាចក្លាយជាកាតាលីកររយៈពេលវែង សម្រាប់ការវាយតម្លៃឡើងវិញរបស់អឺរ៉ុបអំពីយុទ្ធសាស្ត្រការពារជាតិ និងភូមិសាស្ត្រនយោបាយ ទោះបីជាគ្មានការចូលរួមដោយផ្ទាល់ពីចិនក៏ដោយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

វិបត្តិនៅ Greenland រុញច្រានអឺរ៉ុប ឲ្យចាកឆ្ងាយពីអាមេរិក