ព័ត៌មានអន្ដរជាតិ

វិបត្តិនៅ Greenland រុញច្រានអឺរ៉ុប ឲ្យចាកឆ្ងាយពីអាមេរិក

បានផុស

៦ ខែ មុន

នៅ

ថ្ងៃពុធ ២១ មករា ២០២៦

ដោយ

រដ្ឋមន្ត្រីការបរទេសដាណឺម៉ាក Lars Lokke Rasmussen និងតំណាងការបរទេស Greenland គឺ Vivian Motzfeldt បានធ្វើដំណើរទៅកាន់សេតវិមានជួបជាមួយអនុប្រធានាធិបតីអាមេរិក JD Vance និងរដ្ឋមន្ត្រីការបរទេស Marco Rubio ដើម្បីពិភាក្សាអំពីអនាគតរបស់កោះ។ បន្ទាប់ពីពិភាក្សា ដោយស្មោះត្រង់ និងស្ថាបនា ប្រហែល២ម៉ោង ភាគីទាំងពីរមិនបានឈានដល់ការឯកភាពគ្នាណាមួយលើបញ្ហានេះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមក ភាគីទាំងពីរបានយល់ព្រមបង្កើតក្រុមការងារកម្រិតខ្ពស់ ដើម្បីបន្តពិភាក្សាអំពីការព្រួយបារម្ភរបស់ប្រធានាធិបតីត្រាំអំពី Greenland ដោយសង្ឃឹមថា កិច្ចខិតខំប្រឹងប្រែងនេះអាច ជួយកាត់បន្ថយភាពតានតឹងទ្វេភាគី។ ប៉ុន្តែបីថ្ងៃក្រោយ លោក Rasmussen បែរជាអះអាងថា ខ្លួនពិតជាមានការភ្ញាក់ផ្អើលជាខ្លាំង នៅពេលត្រាំប្រកាសពីការដាក់ពន្ធ ១០ភាគរយលើប្រទេសអឺរ៉ុបចំនួន៨ រួមទាំងដាណឺម៉ាកផងដែរ ចំពោះការបញ្ជូនកងទ័ពទៅកាន់ Greenland សម្រាប់គោលបំណងមិនច្បាស់លាស់។

ប្រធានគណៈកម្មការអឺរ៉ុប Ursula von der Leyen និងប្រធានក្រុមប្រឹក្សាអឺរ៉ុប Antonio Costa បានចេញសេចក្តីថ្លែងការណ៍រួមមួយថា ការប្រកាសរបស់លោកត្រាំ ត្រូវបានឆ្លើយតបជាមួយនឹងប្រតិកម្មយ៉ាងខ្លាំងពីបណ្តាប្រទេសនៅអឺរ៉ុប។ ពន្ធគយនឹងធ្វើឲ្យទំនាក់ទំនងអន្តរអាត្លង់ទិកចុះខ្សោយ និងហានិភ័យនាំឲ្យមានការវិវឌ្ឍន៍ដ៏គ្រោះថ្នាក់។

យោងតាមអ្នកសង្កេតការណ៍ ភាពចម្រូងចម្រាសលើកោះបានបណ្តាលឲ្យទំនាក់ទំនងរវាងប្រទេសដាណឺម៉ាក និងអាមេរិកផ្លាស់ប្តូរជារៀងរហូត ដែលនាំឲ្យមានការផ្លាស់ប្តូរនៅក្នុងរបៀបដែលសម្ព័ន្ធមិត្តអឺរ៉ុបមើលឃើញទីក្រុងវ៉ាស៊ីនតោន។

លោក Mikkel Runge Olesen អ្នកស្រាវជ្រាវជាន់ខ្ពស់នៅវិទ្យាស្ថានសិក្សាអន្តរជាតិដាណឺម៉ាកលើកឡើងថា អ្នកនយោបាយដាណឺម៉ាកដូចជានាយករដ្ឋមន្ត្រី Mette Frederiksen និងអតីតអគ្គលេខាធិការណាតូ Anders Fogh Rasmussen បានគាំទ្រយ៉ាងខ្លាំងចំពោះទំនាក់ទំនងឆ្លងមហាសមុទ្រអាត្លង់ទិកជាមួយអាមេរិក។ ប៉ុន្តែនៅចំពោះមុខអាកប្បកិរិយាឈ្លានពានកាន់តែខ្លាំងឡើងរបស់ត្រាំចំពោះ Greenland បានក្លាយជាមនុស្សដែលពិបាកចុះចូលបំផុតនៅពេលនេះ។

ការដាក់ពង្រាយកងទ័ពដោយប្រទេសអឺរ៉ុបទៅកាន់ Greenland សូម្បីតែក្នុងទ្រង់ទ្រាយតូចក៏ដោយ នៅតែផ្ញើសារដ៏រឹងមាំមួយ។ តាមរយៈការពង្រឹងជំហររបស់ប្រទេសដាណឺម៉ាក ចលនានេះនឹងធ្វើឲ្យវាកាន់តែពិបាកក្នុងការជ្រើសរើសជម្រើសផ្សេងទៀតក្រៅពីការទូត នេះបើតាមសម្តីរបស់ Christine Nissen អ្នកវិភាគនៅវិទ្យាស្ថានសម្រាប់ការសិក្សាអឺរ៉ុប ដែលមានមូលដ្ឋាននៅទីក្រុង Copenhagen។

ដោយសារការភ្ញាក់ផ្អើលនេះ អ្នកសង្កេតការណ៍សុទ្ធតែអះអាងថា អឺរ៉ុបអាចនឹងកាន់តែមានភាពស្អិតរមួត។ បន្ទាប់ពីរុស្ស៊ី អាមេរិកឥឡូវនេះគឺជាមហាអំណាចទីពីរដែលដាក់សម្ពាធលើអឺរ៉ុប។ ការពិតនេះបង្កើតការលើកទឹកចិត្តសម្រាប់សំឡេងដើម្បីរួបរួមគ្នាដើម្បីគាំទ្រអឺរ៉ុបដែលរឹងមាំជាងនិងកាន់តែជិតស្និទ្ធគ្នា។ ដូច្នេះសកម្មភាពរបស់ប្រធានាធិបតីអាមេរិក គឺដូចជាការស៊ុតបញ្ចូលទីខ្លួនឯងដែរ។ ជាពិសេស យើងបានរៀនថាយើងមិនគួរប្រថុយនឹងការពឹងផ្អែកលើអាមេរិកម្តងទៀតទេ ព្រោះអាចមានប្រធានាធិបតីត្រាំម្នាក់ទៀតនាពេលអនាគត។ យើងនឹងមិនអនុញ្ញាតឲ្យហេដ្ឋារចនាសម្ព័ន្ធបច្ចេកវិទ្យា អាវុធ និងសន្តិសុខរបស់យើង ត្រូវបានចងភ្ជាប់ទៅនឹងនរណាម្នាក់ដែលមិនអាណិតអាសូរចំពោះអឺរ៉ុបទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖