ព័ត៌មានអន្ដរជាតិ

ចិនតបវិញ កិច្ចព្រមព្រៀងពាណិជ្ជកម្មកាណាដា មិនបានវាយប្រហារ អាមេរិក ទេ

បានផុស

៣ ខែ មុន

នៅ

ថ្ងៃអង្គារ ២៧ មករា ២០២៦

ដោយ

ប្រទេសចិននាថ្ងៃទី២៧មករា បានលើកឡើងពីកិច្ចព្រមព្រៀងពាណិជ្ជកម្មថ្មីៗនេះជាមួយកាណាដា ដោយមិនមានន័យថា ធ្វើឲ្យប្រទេសដទៃទៀតខាតបង់នោះទេ បន្ទាប់ពីលោក ដូណាល់ ត្រាំ បានគំរាមដាក់ពន្ធ ១០០% លើផលិតផលកាណាដា ប្រសិនបើទីក្រុង Ottawa បញ្ចប់កិច្ចព្រមព្រៀងជាមួយទីក្រុងប៉េកាំង។

អ្នកនាំពាក្យក្រសួងការបរទេសចិន លោក Guo Jiakun បានប្រាប់សន្និសីទសារព័ត៌មានជាប្រចាំថា កិច្ចព្រមព្រៀងពាណិជ្ជកម្មនេះ គឺមិនមានគោលបំណងវាយប្រហារទីក្រុងវ៉ាស៊ីនតោនទេ។ កន្លងមក ចិននិងកាណាដាបានបង្កើតភាពជាដៃគូយុទ្ធសាស្ត្រប្រភេទថ្មី ដោយមិនផ្តោតលើភាគីទីបីណាមួយទេ។ នេះបើយោងតាមសារព័ត៌មាន BBC បានចុះផ្សាយ។

លោកក៏បានបន្ថែមដោយធ្វើការធានាអះអាងថា ប្រទេសចិនតែងតែតស៊ូមតិ ដូច្នេះហើយ ប្រទេសនានាគួរតែចាប់ផ្តើមទំនាក់ទំនងរវាងរដ្ឋនិងរដ្ឋដោយផ្នត់គំនិតឈ្នះ-ឈ្នះ ជាជាងផ្នត់គំនិតឈ្នះ-ឈ្នះសូន្យ និងតាមរយៈកិច្ចសហប្រតិបត្តិការជាជាងការប្រឈមមុខដាក់គ្នា។

កិច្ចព្រមព្រៀងនេះត្រូវបានប្រកាសក្នុងអំឡុងពេលដំណើរទស្សនកិច្ចរបស់នាយករដ្ឋមន្ត្រីកាណាដា លោក Mark Carney ទៅកាន់ទីក្រុងប៉េកាំងក្នុងខែមករា ខណៈដែលលោកកំពុងស្វែងរកការឃ្លាតឆ្ងាយពីអាមេរិក ដែលមានភាពចលាចលក្រោមការដឹកនាំរបស់លោកត្រាំ។

យ៉ាងណាមិញ នាយករដ្ឋមន្ត្រីកាណាដាស្រាប់តែប្រកាសវិញថា កាណាដាគ្មានបំណងក្នុងការបន្តកិច្ចព្រមព្រៀងពាណិជ្ជកម្មសេរីជាមួយប្រទេសចិនទៀតទេ បន្ទាប់ពីលោកត្រាំគំរាមដាក់ពន្ធគយ១០០ភាគរយ ក្នុងករណីប្រទេសនេះនៅតែបន្តកិច្ចព្រមព្រៀងជាមួយចិន។

កាណាដា និងសហរដ្ឋអាមេរិកត្រូវបានជាប់គាំងនៅក្នុងសង្គ្រាមពាណិជ្ជកម្មចាប់តាំងពីរដ្ឋបាលលោកត្រាំ ដាក់ពន្ធនាំចូលលើប្រទេសជិតខាងភាគខាងជើងរបស់ខ្លួន។ កាលពីថ្ងៃអាទិត្យលោកត្រាំបានសរសេរនៅលើប្រព័ន្ធផ្សព្វផ្សាយសង្គមថា ការចរចារវាងទីក្រុង Ottawa និងទីក្រុងប៉េកាំងមានន័យថា ចិនបានកាន់កាប់ប្រទេសកាណាដាដ៏រុងរឿងមួយដោយជោគជ័យ និងពេញលេញ។

បន្ទាប់ពីការអត្ថាធិប្បាយរបស់ប្រធានាធិបតីត្រាំរួចភ្លាម លោក Scott Bessent រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកបានប្រាប់ប្រព័ន្ធផ្សព្វផ្សាយថា «យើងមិនអាចអនុញ្ញាតឲ្យប្រទេសកាណាដា ក្លាយជាកន្លែងបើកចំហដែលចិនចាក់ទំនិញថោកៗរបស់ពួកគេចូលទៅក្នុងសហរដ្ឋអាមេរិកបានទេ»៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖