លោកត្រាំ បដិសេធបន្ត​សន្ធិសញ្ញានុយក្លេអ៊ែរចាស់ តែ​ទាមទារឲ្យ​មាន​កិច្ចព្រមព្រៀងសកលថ្មី

សសរស្តម្ភដ៏សំខាន់នៃសន្តិសុខសកលដែលមានអាយុកាលជិត​​២ទសវត្សរ៍បានរលាយរលត់ទៅជាស្ថាពរ បន្ទាប់ពីសន្ធិសញ្ញា New START បានផុតកំណត់កាលពីថ្ងៃព្រហស្បតិ៍​ទី៥​ខែ​កុម្ភៈ​ឆ្នាំ​២០២៦ ដែលបន្សល់ទុក​ឲ្យ​មហាអំណាចនុយក្លេអ៊ែរធំបំផុតទាំងពីររបស់ពិភពលោកគ្មានកិច្ចព្រមព្រៀងចងកាតព្វកិច្ចផ្លូវច្បាប់ជាមួយគ្នាជាលើកដំបូង។

ប្រធានាធិបតីអាមេរិក ដូណាល់ ត្រាំ បានសម្រេចចិត្តបដិសេធសំណើរបស់លោកប្រធានាធិបតីរុស្ស៊ី វ្ល៉ាឌីមៀរ ពូទីន ក្នុងការបន្តសុពលភាពសន្ធិសញ្ញានេះរយៈពេលមួយឆ្នាំទៀត ដោយលោកបានរិះគន់យ៉ាងធ្ងន់ៗថា កិច្ចព្រមព្រៀងដែលចុះហត្ថលេខាកាលពីឆ្នាំ២០១០ គឺជាការចរចាដ៏អាក្រក់ និងកំពុងត្រូវបានរំលោភបំពានយ៉ាងខ្លាំង។ លោកត្រាំ បានទទូច​ឲ្យ​អ្នកជំនាញនុយក្លេអ៊ែរចាប់ផ្តើមរៀបចំសន្ធិសញ្ញាថ្មីដែលទំនើប និងប្រសើរជាងមុន ដើម្បីធានាបាននូវស្ថិរភាពយូរអង្វែងសម្រាប់ពេលអនាគត។

ស្របពេលដែលលោកត្រាំ​ចង់​ឲ្យ​មានកិច្ចព្រមព្រៀងថ្មី លោកក៏បានបង្ហាញបំណងចង់​ឲ្យ​មានការចូលរួមពីប្រទេសចិន ដែលជាមហាអំណាចដែលមានឃ្លាំងអាវុធនុយក្លេអ៊ែរកំពុងកើនឡើងយ៉ាងឆាប់រហ័ស ទោះបីជាក្រសួងការបរទេសចិនបានប្រកាសបដិសេធ​ចូលរួមក្នុងកិច្ចព្រមព្រៀងកាត់បន្ថយអាវុធនេះក៏ដោយ។ រដ្ឋាភិបាល​ក្រុង​វ៉ាស៊ីតោនបានបញ្ជាក់ថា ការចរចាជាមួយរុស្ស៊ីនឹងនៅតែបន្ត ខណៈដែលវិមានក្រឹមឡាំងបានបង្ហាញការសោកស្តាយចំពោះការផុតកំណត់នៃសន្ធិសញ្ញា New START ប៉ុន្តែនៅតែត្រៀមខ្លួនជាស្រេចក្នុងកិច្ច​សន្ទនា បើអាមេរិកបង្ហាញជំហរស្ថាបនាចំពោះសំណើរបស់លោកពូទីន។ រុស្ស៊ីបានអះអាងថា ខ្លួននឹងនៅតែរក្សាវិធីសាស្ត្រប្រកបដោយការទទួលខុសត្រូវចំពោះស្ថិរភាពនុយក្លេអ៊ែរ ដោយផ្អែកលើផលប្រយោជន៍ជាតិរបស់ខ្លួនជាចម្បង។

ក្នុងដំណាក់កាលដ៏រសើបនេះ ការផុតកំណត់នៃសន្ធិសញ្ញា New START បានកើតឡើងស្របពេលជាមួយនឹងការសម្រេចចិត្តដ៏សំខាន់មួយ គឺការបន្តកិច្ចសន្ទនាយោធាជាន់ខ្ពស់រវាងអាមេរិក និងរុស្ស៊ីឡើងវិញជាលើកដំបូង ចាប់តាំងពីត្រូវបានផ្អាកកាលពីឆ្នាំ២០២១ មុនពេលមានការឈ្លានពាននៅ​ប្រទេស​អ៊ុយក្រែន។ ការព្រមព្រៀងនេះបានកើតឡើងបន្ទាប់ពីជំនួបមន្ត្រីជាន់ខ្ពស់នៅទីក្រុង Abu Dhabi ដែលត្រូវបានគេមើលឃើញថាជាយន្តការដ៏សំខាន់សម្រាប់រក្សាសន្តិភាពតាមរយៈភាពរឹងមាំ និងបង្កើនតម្លាភាពដើម្បីកាត់បន្ថយភាពតានតឹង។ ដ្បិត​ពិភពលោកលែងមានច្បាប់កំណត់ចំនួនក្បាលគ្រាប់នុយក្លេអ៊ែរ និងប្រព័ន្ធបាញ់បង្ហោះដូចមុន ប៉ុន្តែការបើកច្រកសន្ទនាយោធានេះ គឺជាក្តីសង្ឃឹមថ្មីមួយក្នុងការទប់ស្កាត់ការប៉ះទង្គិចគ្នាដោយអចេតនាក្នុងយុគសម័យដែលគ្មានសន្ធិសញ្ញាគ្រប់​គ្រងអាវុធបែប​នេះ៕

ប្រែសម្រួល៖ ឈាង