អាមេរិក ចោទប្រកាន់ចិនថាលួចធ្វើតេស្ត​នុយក្លេអ៊ែរ​ក្នុង​​រូង​ក្រោមដី

ពិភពការទូតនុយក្លេអ៊ែរកាន់តែមានភាពតានតឹងខ្លាំង បន្ទាប់ពីសហរដ្ឋអាមេរិកបានចោទប្រកាន់ចិនជាផ្លូវការថា បានលួចធ្វើតេស្តនុយក្លេអ៊ែរសម្ងាត់ក្នុងខែមិថុនា ឆ្នាំ២០២០ ដោយប្រើបច្ចេកទេសលាក់បាំងការផ្ទុះក្នុងរូងក្រោមដី។ នេះ​បើ​យោង​តាម​ការ​ចុះ​ផ្សាយ​របស់​ទីភ្នាក់ងារ​ព័ត៌មាន​ Reuters នាថ្ងៃទី​៧ ខែ​កុម្ភៈ ឆ្នាំ​២០២៦។

យោង​តាម​រ៉យទ័រ ការចោទប្រកាន់ដ៏ធ្ងន់ធ្ងរនេះ កើតឡើងចំពេលដែលសន្ធិសញ្ញានុយក្លេអ៊ែរចុងក្រោយរវាងអាមេរិក និងរុស្ស៊ីបានផុតកំណត់ ដែលមានន័យថា ជាលើកដំបូងក្នុងរយៈពេលជាង៥០ឆ្នាំ មហាអំណាចនុយក្លេអ៊ែរលែងមានច្បាប់រឹតត្បិតលើចំនួនអាវុធរបស់ខ្លួនទៀតហើយ។

ការទម្លាយព័ត៌មាននេះហាក់ដូចជាត្រូវបានគណនាទុកជាមុន។ បន្ទាប់ពីសន្ធិសញ្ញ New START បានបញ្ចប់នៅថ្ងៃទី៥កុម្ភៈ រដ្ឋបាលលោក ដូណាល់ ត្រាំ កំពុងជំរុញ​ឲ្យ​មានកិច្ចព្រមព្រៀងថ្មីមួយដែលរួមមានទាំងរុស្ស៊ី និងចិន។ មន្ត្រីអាមេរិកព្រមានថា ចិនកំពុងពង្រីកកម្លាំងរបស់ខ្លួនយ៉ាងលឿន ហើយអាចនឹងមានក្បាលគ្រាប់លើសពី ១០០០គ្រាប់ នៅឆ្នាំ២០៣០។ ទោះបីជាក្រុម​ត្រួតពិនិត្យអន្តរជាតិនិយាយថា ពួកគេមិនបានរកឃើញការផ្ទុះកាលពីឆ្នាំ​២០២០​ក៏ដោយ ក៏អាមេរិកនៅតែអះអាងថាការធ្វើតេស្តសម្ងាត់ពិតជាមានមែន ហើយខ្លួននឹងបន្តធ្វើទំនើបកម្មអាវុធនុយក្លេអ៊ែរផ្ទាល់ខ្លួនដើម្បីរក្សាឧត្តមភាព។

ភាគីចិនបានវាយបកវិញដោយហៅការចោទប្រកាន់នេះថាជា «រឿងប្រឌិត» និងជាយុទ្ធសាស្ត្រ «សង្គ្រាមត្រជាក់»។ ទីក្រុងប៉េកាំងប្រកែកថា ឃ្លាំងអាវុធរបស់ខ្លួនដែលមាន ៦០០គ្រាប់ គឺនៅតិចតួចណាស់បើធៀបនឹង ៤០០០គ្រាប់ ដែលអាមេរិក និងរុស្ស៊ីមានម្នាក់ៗ ដូច្នេះខ្លួនមិនទាន់ចង់ចូលរួមក្នុងការចរចាត្រីភាគីឡើយ។ នៅពេលដែលគ្មានច្បាប់សម្រាប់គោរព ហើយទំនុកចិត្តធ្លាក់ចុះដល់កម្រិតទាបបំផុត អ្នកជំនាញបារម្ភថាពិភពលោកកំពុងឈានចូលដល់ការប្រណាំងប្រជែងអាវុធសាជាថ្មី៕

ប្រែសម្រួល៖ ឈាង