ម៉ិកស៊ិក បញ្ជូន​ជំនួយ​ឲ្យ​គុយបា មិនខ្វល់​ការរឹតបន្តឹង​របស់លោកត្រាំ

ដោយមិនខ្វល់ពីការរឹតបន្តឹង និង​ហ៊ុមព័ទ្ធរបស់សហរដ្ឋអាមេរិក លោកស្រី​ប្រធានាធិបតី​ Claudia Sheinbaum បានបញ្ជូនកងទ័ពជើងទឹកម៉ិកស៊ិក​​ឲ្យ​ទម្លុះភាពឯកោរបស់គុយបា ដោយបានដឹកជញ្ជូនស្បៀងអាហារ និងសម្ភារៈអនាម័យជាង៨០០​តោន ទៅកាន់កោះដែលកំពុងជួបវិបត្តិមួយនេះ។

ប្រធានាធិបតីអាមេរិក ដូណាល់ ត្រាំ បាន​បង្កើនទណ្ឌកម្មដែលធ្វើ​ឲ្យ​បណ្តាញអគ្គិសនីរបស់គុយបាត្រូវគាំង និងធ្វើ​ឲ្យ​រូបិយប័ណ្ណចុះខ្សោយ ប៉ុន្តែ​លោកស្រី Sheinbaum កំពុងដាក់ទីតាំងម៉ិកស៊ិកជាខ្សែជីវិតមនុស្សធម៌ និងជាស្ពានការទូតដ៏សំខាន់។ នាវាជើងទឹកចំនួនពីរ​គ្រឿង​បាន​ទៅ​ដល់កាលពីថ្ងៃព្រហស្បតិ៍​ទី​១២​កុម្ភៈ ដោយដឹក​នូវទំនិញចាំបាច់ដូចជា ទឹកដោះគោ សាច់ និងអង្ករ ហើយមេដឹកនាំម៉ិកស៊ិករូបនេះបានសន្យាថា នឹងមាន«ការគាំទ្រក្នុងទម្រង់ផ្សេងទៀត» នៅពេលនាវាត្រឡប់មកវិញ។

បេសកកម្មមនុស្សធម៌នេះ កើតឡើងចំពេលមានភាពតានតឹងផ្នែកការទូតក្នុងតំបន់អាមេរិកខាងជើង ខណៈដែលលោកស្រី Sheinbaum កំពុងស្វែងរកកិច្ចព្រមព្រៀងដ៏ផុយស្រួយជាមួយទីក្រុងវ៉ាស៊ីនតោន ដើម្បីបន្តការដឹកជញ្ជូនប្រេងឡើងវិញ។ កន្លងមក ម៉ិកស៊ិកបានក្លាយជាអ្នកផ្គត់ផ្គង់ប្រេងឆៅចម្បងរបស់គុយបា បន្ទាប់ពីការនាំចេញរបស់វ៉េណេស៊ុយអេឡាបានដួលរលំក្រោមការរារាំងរបស់អាមេរិក ប៉ុន្តែការដឹកជញ្ជូនទាំងនោះត្រូវបានបញ្ឈប់ បន្ទាប់ពីរដ្ឋបាលលោកត្រាំ បានចេញក្រឹត្យគំរាមកំហែងយកពន្ធលើប្រទេសណាដែលផ្គត់ផ្គង់ប្រេង​ឲ្យ​គុយបា។ រដ្ឋបាលរបស់លោកស្រី Sheinbaum កំពុងព្យាយាមបញ្ចុះបញ្ចូលក្រសួងការបរទេសអាមេរិក ដោយលើកឡើងថា ម៉ិកស៊ិកអាចធ្វើជាច្រកផ្លូវសម្រាប់កិច្ចសន្ទនា ដើម្បីស្វែងរកដំណោះស្រាយដោយសន្តិវិធីដែលគោរពអធិបតេយ្យភាពរបស់គុយបា និងបញ្ឈប់ «ការច្របាច់ក» លើប្រជាជន១១​លាននាក់។

ស្ថានភាពជាក់ស្តែងនៅក្នុងប្រទេសគុយបានៅតែមានសភាពធ្ងន់ធ្ងរ ដោយជើងហោះហើរអន្តរជាតិមានការធ្លាក់ចុះ និងការដាច់ចរន្តអគ្គិសនីប្រចាំថ្ងៃបានបង្កជាអាសន្នជាតិ ដែលលទ្ធផលទាំងនេះស្របទៅនឹងការប្ដេជ្ញា​របស់លោកត្រាំ ក្នុងការចង់ឃើញរដ្ឋាភិបាលគុយបាដួលរលំ។ ទោះជាយ៉ាងណាក៏ដោយ លោកស្រី Sheinbaum នៅតែប្រកាន់ជំហរថា ទណ្ឌកម្មបច្ចុប្បន្នបានធ្វើ​ឲ្យ​ប៉ះពាល់ដល់ប្រជាជនគុយបាខ្លាំងជាងគណបក្សកុម្មុយនិស្តដែលជាគោលដៅ៕

ប្រែសម្រួល៖ ឈាង