ថៃ នឹងត្រូវគ្របដណ្តប់ដោយខ្យល់ពុលដ៏គ្រោះថ្នាក់ ពេញមួយសប្តាហ៍

ថៃ បានចេញការព្រមានថា ខ្យល់ពុលដ៏គ្រោះថ្នាក់ នឹងគ្របដណ្តប់ប្រទេសនេះ ពេញមួយសប្តាហ៍ ដោយភាគកណ្តាលនិងខាងលិច នឹងរងគ្រោះដោយកំហាប់ភាគល្អិត PM2.5 ធ្ងន់ធ្ងរជាងគេ។

សារព័ត៌មាន Khaosod បានដកស្រង់ប្រភពពីមជ្ឈមណ្ឌលទំនាក់ទំនងគ្រប់គ្រងការបំពុលខ្យល់ ដែលព្យាករថា នៅរយៈពេល៧ថ្ងៃបន្ទាប់ ស្ថានភាពខ្យល់ពុលនៅថៃ នឹងឈានដល់កម្រិតគ្រោះថ្នាក់លើសស្តង់ដារសុវត្ថិភាព។ 

ការព្រមាននេះកើតឡើង ស្របពេលខេត្តចំនួន៣១ក្នុងប្រទេសថៃ ត្រូវគ្របដណ្តប់ដោយខ្យល់ពុលក្នុងកម្រិតគ្រោះថ្នាក់ ដែលប៉ះពាល់ដល់សុខភាពមនុស្ស។

មជ្ឈមណ្ឌលទំនាក់ទំនងគ្រប់គ្រងការបំពុលខ្យល់ បានឲ្យដឹងថា គិតត្រឹមម៉ោង៧ព្រឹកថ្ងៃចន្ទទី១៦ខែកុម្ភៈ PM2.5 ក្នុងខេត្តចំនួន៣១ បានកើនលើសកម្រិតស្តង់ដារហើយ។

ក្នុងចំណោមខេត្តទាំង៣១ តំបន់ដែលមានខ្យល់ពុលខ្លាំងបំផុតគឺភាគកណ្តាលនិងខាងលិច ដោយ PM2.5 ខ្ពស់បំផុតបានឈានដល់ ៦០.៧មីក្រូក្រាមក្នុងមួយម៉ែត្រគូបនៃខ្យល់ បន្ទាប់មកគឺប៉ែកឦសាន ដែល PM2.5 ខ្ពស់បំផុតបានឈានដល់ ៥៩.៣មីក្រូក្រាមក្នុងមួយម៉ែត្រគូបនៃខ្យល់៕ 

អត្ថបទ៖ សុខ សុវណ្ណ