ចិន-រុស្ស៊ី-អ៊ីរ៉ង់ នឹងជួបជុំគ្នានៅច្រកសមុទ្រ Hormuz សម្រាប់សមយុទ្ធត្រីភាគីដ៏​ធំ

ផ្ទៃទឹកដ៏សំខាន់នៃច្រកសមុទ្រ Hormuz ហៀបនឹងមានភាពអ៊ូអរ ខណៈដែលរុស្ស៊ី ចិន និងអ៊ីរ៉ង់ បានបញ្ជូននាវាចម្បាំងសម្រាប់សមយុទ្ធជើងទឹកចម្រុះដ៏ធំមួយ។

លោក Nikolai Patrushev ទីប្រឹក្សាកំពូលរបស់ប្រធានាធិបតីរុស្ស៊ី វ្ល៉ាឌីមៀរ ពូទីន តាម​រយៈ​សារព័ត៌មាន​អ៊ីរ៉ង់ ​WANA News បានបញ្ជាក់ថា សមយុទ្ធ «Maritime Security Belt» ឆ្នាំ២០២៦ បានកំពុង​រៀបចំ​ហើយ ដែលបង្ហាញពីការពង្រឹងសម្ព័ន្ធភាពយោធារវាងប្រទេសទាំងបី។ ការបង្ហាញកម្លាំងជើងទឹកដ៏ធំនេះ កើតឡើងចំពេលដែលមានភាពតានតឹងជាសកល ដោយដាក់យោធាដ៏មានឥទ្ធិពលបំផុតទាំងបីរបស់ពិភពលោក​ឲ្យ​មកជួបគ្នានៅក្នុងចំណុចយុទ្ធសាស្ត្រដឹកជញ្ជូនប្រេងដ៏សំខាន់បំផុតរបស់ផែនដី។ យ៉ាង​ណាមិញ គេ​នៅ​មិន​ទាន់​ដឹង​កាល​បរិច្ឆេទ​ច្បាស់​លាស់​នៃ​សមយុទ្ធ​ត្រីភាគី​នេះ​​នៅ​ឡើយទេ តែ​តាម​ការផ្សាយ​របស់​សារព័ត៌មាន​អ៊ីរ៉ង់​មួយ​ចំនួន វា​អាច​កើត​ឡើង​នា​ចុង​ខែ​កុម្ភៈ​នេះ។

ទោះបីជាពេលវេលានៃសមយុទ្ធនេះអាចបង្ក​ឲ្យ​មានការចាប់អារម្មណ៍ខ្លាំង វាមិនមែនជាភាពជាដៃគូថ្មីថ្មោងឡើយ ដ្បិតសមយុទ្ធ «Maritime Security Belt» ត្រូវបានប្រារព្ធឡើងជារៀងរាល់ឆ្នាំតាំងពីឆ្នាំ២០១៩មកម្ល៉េះ។ ទោះជាយ៉ាងណាក៏ដោយ លើកទី៨នេះត្រូវបានវិមានក្រឹមឡាំងពិពណ៌នាថាជា «ផែនការសម្របសម្រួល» ដើម្បីបង្ហាញពីស្ថិរភាពនៅក្នុងតំបន់។ ក្នុងសមយុទ្ធនេះ គេនឹងឃើញអង្គភាពជើងទឹកធម្មតារបស់អ៊ីរ៉ង់ និងឆ្មាំបដិវត្តន៍អ៊ីរ៉ង់ ធ្វើការរួមគ្នាជាមួយនាវាទំនើបៗរបស់រុស្ស៊ី និងចិន ដែលបង្កើតបានជាសមរភូមិត្រីភាគីនៅក្នុងតំបន់ដែលធ្លាប់តែគ្រប់គ្រងដោយកងទ័ពជើងទឹកលោកខាងលិច។

គោលដៅផ្លូវការនៃបេសកកម្មនេះ គឺផ្តោតលើ «ផលប្រយោជន៍សាធារណៈ» ដូចជាការការពារផ្លូវពាណិជ្ជកម្មសកលពីក្រុមចោរសមុទ្រ ការអនុវត្តប្រតិបត្តិការស្វែងរកនិងសង្គ្រោះរួមគ្នា និងការធ្វើសមយុទ្ធប្រឆាំងភេរវកម្ម។ ប៉ុន្តែលើសពីសកម្មភាពមនុស្សធម៌ សារដែលពួកគេចង់បញ្ជូនគឺច្បាស់ណាស់៖ មូស្គូ ប៉េកាំង និងតេហេរ៉ង់ កំពុងពង្រឹងសម្ព័ន្ធភាពដែនសមុទ្រដែលអាចការពារផ្លូវថាមពលដ៏សំខាន់។ ខណៈដែលនាវាចម្បាំងកំពុងចូលក្នុងទីតាំងរៀងៗខ្លួន ពិភពលោកកំពុងតាមដានមើលថា តើសមយុទ្ធ «Maritime Security Belt» នេះនឹងផ្លាស់ប្តូរតុល្យភាពអំណាចនៅភាគខាងជើងមហាសមុទ្រឥណ្ឌាយ៉ាងដូចម្តេច៕

ប្រែសម្រួល៖ ឈាង