ព័ត៌មានអន្ដរជាតិ

ហ្វីលីពីនរងការផ្ទុះភ្នំភ្លើងចំនួន២ បង្ខំជម្លៀសប្រជាជនឲ្យចាកចេញបន្ទាន់

បានផុស

៥ ខែ មុន

នៅ

ថ្ងៃសៅរ៍ ២១ កុម្ភៈ ២០២៦

ដោយ

អាជ្ញាធរប្រទេសហ្វីលីពីនបានជម្លៀសប្រជាជនពីតំបន់ភ្នំភ្លើងដែលមានសកម្មកាន់តែខ្លាំងឡើងក្នុងប្រទេសនេះ បន្ទាប់ពីភ្នំភ្លើងចំនួនពីរហូរចេញកម្អែលភ្នំភ្លើង និងផ្ទុះនៅថ្ងៃព្រហស្បតិ៍ និងថ្ងៃសុក្រ។

យោងតាម Khaleej Times នៅថ្ងៃទី២០ខែកុម្ភៈឱ្យដឹងថា វិទ្យាស្ថានភ្នំភ្លើង និងរញ្ជួយដីហ្វីលីពីន (Phivolcs) ថាភ្នំភ្លើង Mayon និង Kanlaon មានភាពសកម្មកាន់តែខ្លាំងឡើង ដោយព្រមានប្រជាជននៅឱ្យឆ្ងាយពីការផ្ទុះទាំងពីរ។

ផ្ទុះភ្នំភ្លើងនៅហ្វីលីពីន។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យាស្ថាន Phivolcs បានបន្តថា ភ្នំភ្លើង Mayon ក្នុងខេត្ត Albay ភាគខាងត្បូងទីក្រុងម៉ានីល កត់សម្គាល់ឃើញមានការហូរចេញនៃកម្អែលភ្នំភ្លើងនៅលើជ្រោះបីនៃកោណដ៏ល្អឥតខ្ចោះរបស់វា ហូរចុះមករហូតដល់កម្ពស់ ៣.៨ គីឡូម៉ែត្រ។

គួរបញ្ជាក់ថា ភ្នំភ្លើងនេះក៏បានបង្កឱ្យមានការរញ្ជួយដីភ្នំភ្លើង ការធ្លាក់ថ្មជិត ៤០០ដុំ និងសកម្មភាព pyroclastic (សញ្ញាផ្ទុះភ្នំភ្លើង) ចំនួន៩ អំឡុងពេលថ្ងៃ។ ជាពិសេសបញ្ចេញផ្សែងស្ពាន់ធ័រឌីអុកស៊ីតចំនួន ៧ ០០០ តោនទៅលើអាកាសផងដែរ។

ក្រុម Phivolcs ក៏ដូចជាអង្គភាពរដ្ឋាភិបាលក្នុងតំបន់បានដាក់តំបន់គ្រោះថ្នាក់ជាអចិន្ត្រៃយ៍ប្រវែង៦គីឡូម៉ែត្រជុំវិញភ្នំភ្លើង បង្ខំឱ្យគ្រួសារជាច្រើនពន្យារពេលស្នាក់នៅក្នុងតំបន់ជម្លៀសដែលបានកំណត់។

នៅកោះ Negros ភាគកណ្តាលប្រទេសហ្វីលីពីន ភ្នំភ្លើង Kanlaon ត្រូវបានគេកត់ត្រាថាផ្ទុះខ្លាំងក្លា មានរយៈពេលពីរនាទី បន្ទាប់ពីការផ្ទុះដ៏ធំមួយផ្សេងទៀតនៅថ្ងៃព្រហស្បតិ៍។

យ៉ាងណា ហេតុការណ៍នេះបានបញ្ចេញផេះដ៏យូរ និងបង្កឱ្យមានការរញ្ជួយដីភ្នំភ្លើងចំនួន ១១លើក។ ផ្សែងផេះរបស់វាមានកម្ពស់ពីរគីឡូម៉ែត្រ ហើយបានរសាត់ឆ្ពោះទៅកាន់ទីក្រុងភាគខាងលិច និងខាងត្បូងនៃកោះ។

មន្ត្រីក្រុង La Carlota បានរាយការណ៍ថា៖ « គ្រួសារចំនួន ៣០ បន្ថែមទៀតត្រូវបានជម្លៀសចេញពីការផ្ទុះកាលពីម្សិលមិញ។ តំបន់គ្រោះថ្នាក់ជាអចិន្ត្រៃយ៍របស់ភ្នំភ្លើង Kanlaon មានចម្ងាយបួនគីឡូម៉ែត្រ។ ហើយសកម្មភាពណាមួយដែលទាក់ទងនឹងអាកាសចរណ៍នៅជិតភ្នំភ្លើងទាំងពីរ ត្រូវហាមឃាត់ជាបណ្តោះអាសន្ន»។

ចំណែក ក្រសួងធនធានមនុស្ស និងបរិស្ថាន (DSWD) រំឭកថា វាស្ថិតក្នុងស្ថានភាពប្រុងប្រយ័ត្នខ្ពស់ បន្ទាប់ពីការផ្ទុះភ្នំភ្លើង Kanlaon កាលពីថ្ងៃព្រហស្បតិ៍។ ក្រសួងក៏បានរៀបចំកញ្ចប់អាហារសម្រាប់គ្រួសារ អាហារក្រៀម និងសម្ភារៈសង្គ្រោះបន្ទាន់ចំនួន ១៦ ០០០មុខ សម្រាប់ចែកចាយយ៉ាងរហ័ស៕

ប្រែសម្រួល៖ ណឺ មិនា