ត្រាំ ព្រមានម្តងទៀត! អ៊ីរ៉ង់នឹងជួបថ្ងៃដ៏សែនអាក្រក់ ហើយប្រជាជនពួកគេនឹងសោកស្តាយបំផុត

សហរដ្ឋអាមេរិកនិងអ៊ីរ៉ង់ នៅតែបោះសម្តីឌឺដងដាក់គ្នាមិនឈប់ ដោយឥឡូវនេះ ប្រមុខសេតវិមាន ដូណាល់ ត្រាំ បានគំរាមជាថ្មីថា អ៊ីរ៉ង់នឹងជួបថ្ងៃដ៏សែនអាក្រក់ហើយប្រជាជនរបស់ពួកគេនឹងសោកស្តាយបំផុត បើទីក្រុងតេហេរ៉ង់ មិនឈានដល់កិច្ចព្រមព្រៀងណាមួយ ជាមួយអាមេរិកទេនោះ។

តាមរយៈសារបង្ហោះលើបណ្តាញសង្គម Truth Social កាលពីថ្ងៃចន្ទទី២៣ខែកុម្ភៈ (ត្រូវនឹងថ្ងៃអង្គារនៅកម្ពុជា), ក្នុងចំណុចមួយគួរឲ្យចាប់អារម្មណ៍គឺលោកត្រាំព្រមានថា៖ «ខ្ញុំចង់បានកិច្ចព្រមព្រៀងជាជាងមិនមាន ប៉ុន្តែប្រសិនបើយើងមិនអាចសម្រេចកិច្ចព្រមព្រៀងបានទេ វានឹងក្លាយជាថ្ងៃដ៏អាក្រក់បំផុតសម្រាប់ប្រទេសនោះ ហើយអ្វីដែលគួរឲ្យសោកស្តាយបំផុត គឺសម្រាប់ប្រជាជនរបស់គេ ព្រោះពួកគេអស្ចារ្យនិងល្អណាស់ ហើយរឿងបែបនេះមិនគួរកើតឡើងចំពោះពួកគេទាល់តែសោះ»។

ក្នុងការបង្ហោះនោះដែរ មេដឹកនាំអាមេរិកបានបញ្ជាក់ច្បាស់ៗ អំពីតួនាទីផ្ទាល់របស់ខ្លួន ក្នុងការសម្រេចចិត្តវាយប្រហារលើអ៊ីរ៉ង់ ប៉ុន្តែលោកសង្ឃឹមថា របបដឹកនាំមួយនេះនឹងត្រៀមខ្លួនរួចរាល់ក្នុងការធ្វើកិច្ចព្រមព្រៀង ជាជាងរុញច្រានលោកឲ្យឈានដល់ចំណុចនៃការសម្រេចចិត្តបែបនោះ។

ការព្រមានជាថ្មីរបស់លោកត្រាំនេះ កើតឡើងមុនពេលសហរដ្ឋអាមេរិកនិងអ៊ីរ៉ង់ នឹងបើកកិច្ច​ចរចានុយក្លេអ៊ែរជុំទី៣ នៅថ្ងៃព្រហស្បតិ៍នេះ ក្នុងទីក្រុងហ្សឺណែវប្រទេសស្វីស ក្រោមការសម្របសម្រួលពីប្រទេសអូម៉ង់។

តាមការផ្សាយរបស់ Reuters, រដ្ឋមន្ត្រីការបរទេសអូម៉ង់ Badr Albusaidi បានបញ្ជាក់ថា មានការខិតខំប្រឹងប្រែងជាវិជ្ជមានដើម្បីឈានទៅរកកិច្ចព្រមព្រៀងចុងក្រោយ បើទោះលោក ត្រាំ ព្រមានពី «រឿងអាក្រក់» ប្រសិនបើកិច្ចចរចាបរាជ័យក៏ដោយ។

ចំណុចចម្រូងចម្រាសធំបំផុតគឺការចម្រាញ់សារធាតុអ៊ុយរ៉ាញ៉ូម និងការដាក់ទណ្ឌកម្មសេដ្ឋកិច្ច។ បេសកជនអាមេរិក Steve Witkoff បានលើក​ឡើង​ពី​ចម្ងល់​​ថា ហេតុអ្វីបានជាអ៊ីរ៉ង់មិនព្រមចុះចាញ់ ក្រោមសម្ពាធយោធា។

ជាការឆ្លើយតប រដ្ឋមន្ត្រីការបរទេសអ៊ីរ៉ង់ Abbas Araqchi ប្រាប់ទៅវិញថា អ៊ីរ៉ង់​នឹង​មិនចុះចាញ់ឡើយ ប៉ុន្តែនៅតែចង់បានដំណោះស្រាយតាមផ្លូវការទូត ខណៈមានសេចក្តីរាយការណ៍ថា អ៊ីរ៉ង់អាចនឹងយល់ព្រមបញ្ជូនអ៊ុយរ៉ាញ៉ូមពាក់កណ្តាលទៅក្រៅប្រទេស ជាថ្នូរនឹងការលុបទណ្ឌកម្មសេដ្ឋកិច្ច៕

អត្ថបទ៖ សុខ សុវណ្ណ