លោកត្រាំ​ព្រមានថា​ អ៊ីរ៉ង់​កំពុង​សម្ងំ​អភិវឌ្ឍ​មីស៊ីល ដែល​បាញ់​ដល់​ដី​អាមេរិក

ប្រធានាធិបតី ដូណាល់ ត្រាំ បានប្រកាសក្នុងសេចក្តីថ្លែងការណ៍គោលនយោបាយជាតិ​លើកដំបូងនៃអាណត្តិទីពីររបស់លោកថា ប្រទេសអ៊ីរ៉ង់កំពុងអភិវឌ្ឍមីស៊ីលរយៈចម្ងាយឆ្ងាយ ដែលអាចបាញ់ដល់ដែនដីសហរដ្ឋអាមេរិក។

យោង​តាម​ការ​ចុះ​ផ្សាយ​របស់ The Hill កាល​ពីថ្ងៃ​អង្គារ​ទី​២៤​ខែ​កុម្ភៈ​ឆ្នាំ​២០២៦ លោកប្រធានាធិបតីបានសង្កត់ធ្ងន់ថា លោកនឹង «មិនអនុញ្ញាត​ឲ្យប្រទេសដែលគាំទ្រភេរវកម្មលេខមួយលើពិភពលោក» នេះ មានអាវុធនុយក្លេអ៊ែរជាដាច់ខាត។ ការព្រមាននេះធ្វើឡើង ទោះបីជារបាយការណ៍ពីទីភ្នាក់ងារចារកម្មការពារជាតិ (DIA) បង្ហាញថា អ៊ីរ៉ង់មិនទាន់មានមីស៊ីលឆ្លងទ្វីប (ICBM) ដាក់ពង្រាយនៅឡើយ ប៉ុន្តែអាចមានសមត្ថភាពអភិវឌ្ឍវាបាននៅឆ្នាំ​២០៣៥ តាមរយៈបច្ចេកវិទ្យាបាញ់បង្ហោះយានអវកាស។

បច្ចុប្បន្ន មន្ទីរបញ្ចកោណបានពង្រាយកម្លាំងយោធាយ៉ាង​ច្រើន​សន្ធឹកសន្ធាប់នៅក្បែរប្រទេសអ៊ីរ៉ង់ រួមមាននាវាចម្បាំងរាប់សិបគ្រឿង ក្រុមនាវាផ្ទុកយន្តហោះចម្បាំងចំនួនពីរ និងប្រព័ន្ធការពារអាកាសជាច្រើន។ ដ្បិត​មានការត្រៀមលក្ខណៈផ្នែកយោធាក៏ដោយ លោកត្រាំ​បានលើកឡើងថា លោកចង់ដោះស្រាយបញ្ហា​តាមរយៈការទូត។ ជាមួយ​កិច្ចខិតខំប្រឹងប្រែង​​នេះ បេសកជនពិសេសលោក Steve Witkoff និងកូនប្រសារលោកត្រាំ គឺលោក Jared Kushner គ្រោងនឹងជួបពិភាក្សាជាមួយមន្ត្រីអ៊ីរ៉ង់នៅទីក្រុងហ្សឺណែវ នាថ្ងៃព្រហស្បតិ៍សប្ដាហ៍​នេះ ដើម្បីចរចាលើបញ្ហានុយក្លេអ៊ែរបន្ថែម​​ទៀត៕

ប្រែសម្រួល៖ ឈាង